மும்பை, டிசம்பர் 11: இந்திய ரிசர்வ் வங்கியின் புதிய ஆளுநர் சஞ்சய் மல்ஹோத்ரா மும்பையில் பெரிய வங்கிகளின் தலைமை நிர்வாகிகளைச் சந்தித்து ஒரு முக்கிய உத்தரவு பிறப்பித்துள்ளார். பிப்ரவரி 2025 முதல் ரிசர்வ் வங்கி ரெப்போ விகிதத்தை 1.25% (125 அடிப்படைப் புள்ளிகள்) குறைத்து 5.25% ஆகக் கொண்டு வந்துள்ளது. இந்தக் குறைப்பின் முழுப் பலனையும் வாடிக்கையாளர்களுக்கு உடனடியாகக் கொண்டு சேர்க்க வேண்டும் என்று அவர் வலியுறுத்தினார்.
ரிசர்வ் வங்கியின் இந்த நடவடிக்கை பொருளாதாரத்தைத் தூண்டுவதற்காக எடுக்கப்பட்டது. இப்போது வங்கிகள் இதை உடனே செயல்படுத்தினால் வீட்டுக் கடன், வாகனக் கடன், தனிநபர் கடன் வாங்கியவர்களுக்கு மாதாந்திர EMI கணிசமாகக் குறையும். குறிப்பாக வீட்டுக் கடன் வாங்கியவர்களுக்கு இது மிகப் பெரிய நிவாரணமாக அமையும்.
உதாரணமாக:
- ₹50 லட்சம் வீட்டுக் கடன் (20 ஆண்டுகள்) எடுத்திருந்தால் மாத EMI சுமார் ₹1,960 முதல் ₹2,000 வரை குறையும். மொத்தக் கடன் காலத்தில் ₹4.7 லட்சம் வரை சேமிப்பு கிடைக்கும்.
- ₹30 லட்சம் கடன் எடுத்திருந்தால் மாத EMI-யில் ₹1,176 வரை குறையும்.
கடன் வாங்கியவர்கள் இரண்டு விருப்பங்களில் ஒன்றைத் தேர்வு செய்யலாம்:
- மாத EMI தொகையைக் குறைத்துக் கொள்ளலாம்.
- அதே EMI-யைத் தொடர்ந்து செலுத்தி கடன் செலுத்தும் காலத்தைக் (tenure) குறைத்துக் கொள்ளலாம். இதனால் வட்டி மிகக் குறைவாகச் செலுத்த நேரிடும்.
பல வங்கிகள் இதுவரை இந்த மாற்றத்தைத் தானாகவே செய்து விடுகின்றன. ஆனால் சட்டப்படி கடனாளியின் விருப்பத்தைப் பெற வேண்டும். HDFC, SBI, ICICI போன்ற சில வங்கிகள் ஏற்கனவே வாடிக்கையாளர்களுக்கு மெசேஜ் அனுப்பி விருப்பம் கேட்டு வருகின்றன. உங்கள் வங்கி இன்னும் தகவல் தரவில்லை என்றால், கிளைக்குச் சென்று அல்லது மின்னஞ்சல் மூலம் ஒரு கடிதம் அளித்து EMI குறைக்க வேண்டுமா அல்லது காலத்தைக் குறைக்க வேண்டுமா என்று தெரிவிக்கலாம்.
இதையும் படிங்க: இந்தியாவுக்கு 50% வரி!! ட்ரம்ப் மிரட்டலால் மெக்சிகோ அடாவடி! ஏற்றுமதியாளர்களுக்கு சிக்கல்!
வீடு வாங்க நினைத்து தயங்கியவர்களுக்கு இது சிறந்த நேரம். ரெப்போ விகிதக் குறைப்பு காரணமாக வீட்டுக் கடன் வட்டி இப்போது 7.5% முதல் 8.25% வரை குறைந்துள்ளது. அதனால் புதிய கடன் எடுப்பவர்களுக்கு மாத EMI மிகக் குறைவாக இருக்கும். வீடு வாங்கும் கனவு இப்போது எளிதாக நிறைவேறும் வாய்ப்பு உருவாகியுள்ளது.
ரிசர்வ் வங்கி ஆளுநர் வலியுறுத்தியதால் வங்கிகள் விரைவில் இந்தப் பலனை வாடிக்கையாளர்களுக்கு வழங்கும் என்று எதிர்பார்க்கப்படுகிறது. உங்கள் EMI குறையும் என்ற நல்ல செய்தி உங்களை வந்தடைய இன்னும் சில நாட்களே உள்ளன!
இதையும் படிங்க: டெல்லி பறக்கு நயினார் நாகேந்திரன்! அமித் ஷாவுடன் மீட்டிங்! சூடுபிடிக்கும் தேர்தல் களம்!