ஜம்மு காஷ்மீரில் முதல்வர் ஒமர் அப்துல்லா தலைமையிலான அமைச்சரவையில் நேற்று அக்டோபர் 27 அன்று மாற்றம் செய்யப்பட்டது. இந்த மாற்றம் விமர்சனங்களையும் எதிர்ப்புகளையும் எழுப்பியுள்ளது.

அமைச்சரவையில் காஷ்மீர் பள்ளத்தாக்கிலிருந்து ஏழு அமைச்சர்களும் ஜம்மு பிரிவிலிருந்து இரண்டு அமைச்சர்களும் மட்டுமே உள்ளனர். ஜம்மு, சம்பா, கதுவா, உதாம்பூர், ரம்பான், தோடா, கிஷ்த்வார், ரியாசி ஆகிய ஜம்மு பிரிவின் பத்து மாவட்டங்களில் எட்டு மாவட்டங்களுக்கு எவ்விதப் பிரதிநிதித்துவமும் இல்லை.

1953 ஆம் ஆண்டுக்குப் பிறகு முதல்முறையாக ஜம்முவில் மொத்தம் உள்ள பத்து மாவட்டங்களில் எட்டினைச் சேர்ந்த எம்எல்ஏக்களுக்கு அமைச்சர் வாய்ப்பு அளிக்கப்படவில்லை என அந்தப் பிராந்தியப் பிரதிநிதிகள் கருத்து தெரிவிக்கின்றனர். ஜம்மு ஒட்டுமொத்தமாகப் புறக்கணிக்கப்பட்டுள்ளதாக அவர்கள் குறிப்பிடுகின்றனர்.

இதையும் படிங்க: எல்லைப் பாதுகாப்பு ரகசியங்கள் லீக்?! ராணுவ அதிகாரியின் மனைவி மீது சீன உளவு குற்றச்சாட்டு! தீவிர விசாரணை!

ஒமர் அப்துல்லாவின் அமைச்சரவையில் சதீஷ் ஷர்மா மற்றும் துணை முதல்வர் சுரிந்தர் சவுத்ரி என இரு இந்து அமைச்சர்கள் இடம்பெற்றிருந்தனர். தற்போது சதீஷ் ஷர்மா நீக்கப்பட்டதால் அமைச்சரவையில் ஒரே ஒரு இந்து அமைச்சர் மட்டுமே உள்ளார். இதன் மூலம் 70 ஆண்டுகளில் அமைச்சரவையில் இந்துக்களுக்கான பிரதிநிதித்துவம் முதல்முறையாகக் குறைக்கப்பட்டுள்ளது என விமர்சனங்கள் எழுந்துள்ளன.

அமைச்சரவையில் சேர்க்க பல இந்து எம்எல்ஏக்கள் இருந்தபோதிலும் ஒமர் அப்துல்லாவின் அரசு பிராந்திய சமநிலை மற்றும் மத சமநிலையைக் கடைபிடிக்கவில்லை என்று குற்றச்சாட்டுகள் எழுந்துள்ளன.

முன்னாள் முதல்வர்கள் பக்ஷி குலாம் முகமது, ஷேக் அப்துல்லா, பரூக் அப்துல்லா, முப்தி முகமது சையத், குலாம் நபி ஆசாத் உள்ளிட்டோரின் ஆட்சியிலும் இந்துக்களுக்கு அமைச்சரவையில் வாய்ப்பு வழங்கப்பட்டு வந்தது என சுட்டிக்காட்டப்படுகிறது.

நேற்றைய மாற்றத்தில் காஷ்மீர் பள்ளத்தாக்கைச் சேர்ந்த நான்கு தேசிய மாநாட்டு கட்சி எம்எல்ஏக்கள் அமைச்சர்களாகச் சேர்க்கப்பட்டனர். சுதந்திர எம்எல்ஏவாக இருந்த சதீஷ் ஷர்மா நீக்கப்பட்டார். இதனால் அமைச்சரவையின் மொத்த உறுப்பினர் எண்ணிக்கை ஒன்பதாக உயர்ந்துள்ளது. இந்த மாற்றம் ஜம்மு பிராந்தியத்தில் அதிருப்தியை ஏற்படுத்தியுள்ளதுடன் அரசியல் வட்டாரங்களில் விவாதப் பொருளாகியுள்ளது.

இதையும் படிங்க: காஷ்மீரில் அதிரடி வேட்டை! பயங்கரவாதிகளின் கூட்டாளிகள் 5 பேர் கைது! பதுங்கு குழி தகர்ப்பு!