சிக்கனம் மற்றும் சேமிப்பின் முக்கியத்துவத்தை உணர்த்திடும் உலகச் சிக்கன நாள் ஆண்டுதோறும் அக்டோபர் 30-ஆம் தேதி கடைப்பிடிக்கப்படுவதையொட்டி, தமிழ்நாடு முதலமைச்சர் ச. ஜோசப் விஜய் பொதுமக்களுக்குத் தனது வாழ்த்துச் செய்தியைத் தெரிவித்துள்ளார்.

இது தொடர்பாக முதலமைச்சர் வெளியிட்டுள்ள செய்திக்குறிப்பில் சிக்கனம் மற்றும் சேமிப்பின் அவசியத்தை அனைவருக்கும் உணர்த்திடும் வகையில் ஆண்டுதோறும் அக்டோபர் திங்கள் 30-ஆம் நாள் உலகச் சிக்கன நாளாகக் கடைப்பிடிக்கப்பட்டு வருகிறது.

சிக்கனத்தின் அருமை குறித்துப் பெருமைமிகு அய்யன் திருவள்ளுவர்,

‘அளவறிந்து வாழாதான் வாழ்க்கை உளபோல

இல்லாகித் தோன்றாக் கெடும்’

என்ற குறளில், தன் வருமானத்தின் அளவை உணராமல் வரம்பின்றி வாழ்பவனுடைய வாழ்க்கையானது, எல்லா வளங்களும் இருப்பது போலத் தோன்றி முடிவில் எதுவுமில்லாமல் சிதைந்து கெட்டுவிடும் என்று மிக அழகாகக் குறிப்பிட்டுள்ளார்.

இதையும் படிங்க: சமூகநீதி சாதிவாரி சர்வேக்கு அமைச்சரவை ஒப்புதல்: பாமக தலைவர் அன்புமணி இராமதாஸ் வரவேற்பு!

பொதுவாகச் செலவு செய்தது போக எஞ்சியதைச் சேமிக்காமல், முதலில் சேமிப்பை ஒதுக்கிவிட்டு, அதன்பிறகு எஞ்சிய தொகையை மட்டுமே செலவு செய்யும் பழக்கத்தைக் கடைப்பிடித்தால் எதிர்காலத்தில் எப்போதும் தன்னம்பிக்கையுடனும், பாதுகாப்பாகவும் வாழ முடியும். இன்று நாம் செய்யக்கூடிய சிறுசேமிப்புதான், எதிர்பாராத ஆபத்துக் காலங்களிலும் நெருக்கடி நேரங்களிலும் நமக்குப் பெரும் துணையாக நிற்கும். 'சிறுதுளி பெருவெள்ளம்' என்பதற்கிணங்க, நாம் அன்றாடம் சேமிக்கும் ஒவ்வொரு சிறிய தொகையும் நமது எதிர்காலத்தை ஒளிமயமாக்கும்.

ஒவ்வொருவரும் தங்களின் நிதி நிலையைச் சரியாக அறிந்து, அதற்கு ஏற்றாற்போலத் திட்டமிட்டுச் செலவழிக்க வேண்டும். மாறாக, ஆடம்பரத்திற்காகக் கடன் வாங்கிச் செலவு செய்வது தனிநபரையும் அவரது குடும்பத்தையும் மீளமுடியாத நிதி நெருக்கடியில் தள்ளிவிடும்.

எனவே, பொதுமக்கள் அனைவரும் தங்களின் மாதாந்திர வருவாயில் ஒரு குறிப்பிட்ட பகுதியைத் தவறாமல் சேமிக்க வேண்டும். அத்தகைய சேமிப்பும் பாதுகாப்பானதாக அமைய அருகிலுள்ள அஞ்சலகங்களில் சிறுசேமிப்புக் கணக்கைத் தொடங்கிடக் கேட்டுக்கொள்கிறேன். சேமிப்பின் மூலம் சிறப்பான வாழ்வுக்கு வழிவகுப்போம் என்று இந்த உலகச் சிக்கன நாளில் நாம் அனைவரும் உறுதியேற்போம்" என்று முதலமைச்சர் விஜய் அழைப்பு விடுத்துள்ளார்.

இதையும் படிங்க: தமிழகத்தில் சட்டம்-ஒழுங்கு சீர்குலைந்துள்ளதாக தவெக அரசு மீது பாஜக தேசிய தலைமை விமர்சனம்!