கேரளாவின் புகழ்பெற்ற சபரிமலை அய்யப்பன் கோவிலில் 2019ல் நடந்த புனரமைப்பு பணிகளின் போது கருவறை துவார பாலகர் சிலைகளிலும் கதவுகளிலும் பதிக்கப்பட்டிருந்த தங்க கவசங்களில் இருந்து சுமார் 4 கிலோ தங்கம் திருடப்பட்ட சம்பவம் பெரும் அதிர்ச்சியை ஏற்படுத்தியது. 

கோவிலை நிர்வகிக்கும் திருவிதாங்கூர் தேவசம் போர்டு அளித்த புகாரின் பேரில் போலீசார் வழக்குப்பதிவு செய்தனர். கேரள உயர் நீதிமன்ற உத்தரவுப்படி அமைக்கப்பட்ட சிறப்பு புலனாய்வு குழு (எஸ்ஐடி) இந்த வழக்கை விசாரித்து வருகிறது. இதுவரை தேவசம் போர்டு முன்னாள் தலைவர், நிர்வாக அதிகாரி உட்பட ஒன்பது பேர் கைது செய்யப்பட்டுள்ளனர்.

இந்த வழக்கில் திருடப்பட்ட தங்கம் வெளிநாடுகளுக்கு கடத்தப்பட்டிருக்கலாம் என்ற சந்தேகம் சிபிஐக்கு எழுந்துள்ளது. அதன்படி முன்னாள் தூதரக ஊழியர்களிடம் சிபிஐ அதிகாரிகள் விசாரணையைத் தொடங்கியுள்ளனர். 

இதையும் படிங்க: தங்கம் திருடியவர்கள் யாரப்பா..? ‘தோழர்கள்’ தானே ஐயப்பா!! கேரளாவில் காங்கிரசை ஜெயிக்க வைத்த பலே பாடல்

இந்நிலையில் இந்த வழக்கு ஜனவரி 5 ஆம் தேதி கேரள உயர் நீதிமன்றத்தில் விசாரணைக்கு வந்தது. நீதிபதிகள் ராஜா விஜயராகவன் மற்றும் ஜெயக்குமார் அடங்கிய அமர்வு வழக்கை இரண்டு வாரங்களுக்கு ஒத்திவைத்தது.

அதேநேரம் சிறப்பு புலனாய்வு குழுவுக்கு மேலும் ஆறு வாரங்கள் அவகாசம் வழங்கி நீதிபதிகள் உத்தரவிட்டனர். ஏற்கனவே ஜனவரி 19 ஆம் தேதி இடைக்கால அறிக்கை தாக்கல் செய்ய உத்தரவிடப்பட்டிருந்த நிலையில், இந்த கூடுதல் அவகாசம் வழங்கப்பட்டுள்ளது. வழக்கின் சிக்கலான தன்மை மற்றும் விசாரணையின் ஆழம் கருதி இந்த முடிவு எடுக்கப்பட்டதாக தெரிகிறது.

சபரிமலை கோவில் தங்கம் திருட்டு வழக்கு கேரளாவில் மட்டுமல்லாமல் தேசிய அளவிலும் கவனத்தை ஈர்த்துள்ளது. பக்தர்களிடையே பெரும் அதிர்ச்சியை ஏற்படுத்திய இந்த சம்பவம் கோவில் நிர்வாகத்தில் வெளிப்படைத்தன்மை மற்றும் பாதுகாப்பு குறித்த கேள்விகளை எழுப்பியுள்ளது. 

விசாரணை முழுமையாக முடிந்து குற்றவாளிகள் சட்டத்தின் முன் நிறுத்தப்பட வேண்டும் என்று பக்தர்களும் பொதுமக்களும் எதிர்பார்க்கின்றனர். இந்த வழக்கின் முன்னேற்றம் தொடர்ந்து கவனிக்கப்படும் ஒன்றாக உள்ளது.

இதையும் படிங்க: சபரிமலை ஐயப்பன் கோயில் வருமானம் ரூ.210 கோடி!! திருவிதாங்கூர் தேவசம்போர்டு அறிவிப்பு!