மும்பை: மும்பையின் மலாட் பகுதியில் உள்ள மருத்துவமனை ஒன்றில் 80 வயது முதியவரின் சடலம் சுமார் 4 ஆண்டுகளாக பிரீஸரில் பாதுகாத்து வைக்கப்பட்டிருந்த சம்பவம் அதிர்ச்சியை ஏற்படுத்தியுள்ளது. அருகில் வசிப்பவர்கள் அளித்த புகாரைத் தொடர்ந்து போலீசார் நடத்திய விசாரணையில் இந்த விவரம் தெரியவந்துள்ளது.

மலாட் பகுதியில் உள்ள குறிப்பிட்ட மருத்துவமனையில் இருந்து சமீபத்தில் கடுமையான துர்நாற்றம் வீசியதாக அப்பகுதி மக்கள் போலீசாரிடம் தெரிவித்தனர். இதையடுத்து போலீசார் மருத்துவமனைக்குச் சென்று ஆய்வு மேற்கொண்டனர். அப்போது அங்கிருந்த பிரீஸரை சோதனை செய்தபோது, அதற்குள் முதியவரின் சடலம் பாதுகாக்கப்பட்ட நிலையில் இருப்பது தெரியவந்ததாக கூறப்படுகிறது.

இதையடுத்து போலீசார் அந்த முதியவரின் குடும்பத்தினரை தொடர்பு கொண்டு விசாரணை நடத்தினர். மும்பையில் வசித்து வரும் குடும்பத்தினர், அந்த முதியவர் 2022-ம் ஆண்டு மாரடைப்பு காரணமாக உயிரிழந்ததாக தெரிவித்தனர். இதற்கான மருத்துவ மற்றும் மரண ஆவணங்களையும் போலீசாரிடம் சமர்ப்பித்ததாக கூறப்படுகிறது.

இதையும் படிங்க: ரூ.3,383 கோடி சொத்து.. திடீரென பிச்சைக்காரராக மாறிய பாஜக எம்எல்ஏ! மும்பையில் நடந்த நெகிழ்ச்சி சம்பவம்!

முதியவரின் சடலத்தை ஏன் இத்தனை ஆண்டுகளாக பாதுகாத்து வைத்திருந்தார்கள் என்பது குறித்து போலீசார் விசாரணை மேற்கொண்டனர். அதற்கு குடும்பத்தினர், அவருடைய மரணத்தை ஏற்றுக்கொள்ள முடியாமல் மிகவும் மன உளைச்சலில் இருந்ததாகவும், சடலத்தை முடிந்தவரை நீண்ட காலம் பாதுகாக்க விரும்பியதாகவும் தெரிவித்ததாக கூறப்படுகிறது.

மேலும், எதிர்காலத்தில் அமெரிக்காவில் உள்ள கிரையோனிக்ஸ் மையம் ஒன்றுக்கு சடலத்தை மாற்றும் நோக்கமும் இருந்ததாக குடும்பத்தினர் போலீசாரிடம் தெரிவித்ததாக தகவல் வெளியாகியுள்ளது. இதற்காக வெளிநாட்டு நிறுவனத்தின் உதவியை நாடியிருந்ததாகவும் அவர்கள் கூறியதாக தெரிவிக்கப்படுகிறது.

குடும்பத்தினர் வழங்கிய ஆவணங்கள் மற்றும் கிடைத்த தகவல்களின் அடிப்படையில், முதியவரின் மரணத்தில் சந்தேகத்திற்கிடமான அம்சங்கள் இதுவரை கண்டறியப்படவில்லை என போலீசார் தெரிவித்துள்ளனர். மேலும், இந்த விவகாரத்தில் குற்றப் பின்னணி இருப்பதற்கான ஆதாரங்களும் இதுவரை கிடைக்கவில்லை என கூறப்படுகிறது.

இதுவரை இந்த சம்பவம் தொடர்பாக வழக்குப்பதிவு செய்யப்படவில்லை என்றாலும், சடலம் நீண்ட காலமாக பிரீஸரில் வைக்கப்பட்டிருந்தது தொடர்பாக போலீசார் தொடர்ந்து விசாரணை நடத்தி வருகின்றனர். குடும்பத்தினரின் தகவல்கள், மருத்துவ ஆவணங்கள் மற்றும் சடலம் பாதுகாக்கப்பட்ட விதம் உள்ளிட்ட பல்வேறு அம்சங்கள் குறித்து அதிகாரிகள் ஆய்வு செய்து வருகின்றனர்.

இந்த சம்பவம் தொடர்பாக குடும்பத்தினரின் பெயர் உள்ளிட்ட தனிப்பட்ட விவரங்கள் அதிகாரப்பூர்வமாக வெளியிடப்படவில்லை. நான்கு ஆண்டுகளாக சடலம் பாதுகாக்கப்பட்டிருந்தது எப்படி என்பது குறித்தும் போலீசார் தொடர்ந்து விசாரித்து வருகின்றனர்.

இதையும் படிங்க: நடிகர் சுஷாந்த் சிங் பெண் மேலாளர் மர்ம மரணம்! ஆதித்ய தாக்கரே, உத்தவ் தாக்கரே மீது பரபரப்பு குற்றச்சாட்டு!