பார்லிமென்ட் குளிர்கால கூட்டத்தொடர் டிச., 1ல் துவங்குகிறது. இதற்கான ஏற்பாடுகளில், பார்லிமென்ட் பார்லிமென்ட் குளிர்கால கூட்டத்தொடர் டிசம்பர் 1 அன்று தொடங்க உள்ள நிலையில், ராஜ்யசபா செயலகம் வெளியிட்டுள்ள புதிய விதிமுறை கையேட்டில், எம்.பி.க்களுக்கு கடுமையான நடத்தை வழிகாட்டுதல்கள் அறிவிக்கப்பட்டுள்ளன.
சபை தலைவரின் முடிவுகள் மற்றும் தீர்ப்புகளை சபைக்குள் அல்லது வெளியே விமர்சிக்கக் கூடாது. ‘ஜெய்ஹிந்த்’, ‘வந்தே மாதரம்’, ‘நன்றி’ போன்ற கோஷங்களை சபையில் எழுப்பக் கூடாது என்பது உள்ளிட்ட விதிகள், கூட்டத்தொடரின் கண்ணியத்தைப் பாதுகாக்க வகைமுறைப்படுத்தப்பட்டுள்ளன.
இது, புதிதாக துணை ஜனாதிபதியாகப் பொறுப்பேற்ற சி.பி.ராதாகிருஷ்ணன் தலைமையில் நடக்கும் முதல் கூட்டத்தொடராகும் என்பதால், அரசியல் வட்டாரத்தில் பெரும் பரபரப்பை ஏற்படுத்தியுள்ளது.
இதையும் படிங்க: தேதி குறிச்சாச்சு! டிச.,1ம் தேதி துவங்குகிறது பார்லி குளிர்கால கூட்டத் தொடர்! அனல் பறக்கும் விவாதம்!
பார்லிமென்ட் குளிர்கால கூட்டத்தொடர் டிசம்பர் 1 முதல் 19 வரை 15 நாட்கள் நடைபெறும். இதற்கான ஏற்பாடுகளில் பார்லிமென்ட் அதிகாரிகள் முதல் கடைநிலை ஊழியர்கள் வரை தீவிரமாக ஈடுபட்டுள்ளனர். கடந்த மழைக்கால கூட்டத்தொடரில் ராஜ்யசபா தலைவர் ஜக்தீப் தன்கரின் திடீர் ராஜினாமா கிளறிய புயலுக்குப் பின், துணை ஜனாதிபதியாக சி.பி.ராதாகிருஷ்ணன் புதிதாகப் பொறுப்பேற்றுள்ளார்.
இந்நிலையில், அவர் ராஜ்யசபா தலைவராக சபையை எவ்வாறு வழிநடத்துவார் என்பதில் அனைத்து கட்சியினரும் ஆர்வமுடன் காத்திருக்கின்றனர். இந்த எதிர்பார்ப்புக்கு மத்தியில், ராஜ்யசபா செயலகம் குளிர்கால கூட்டத்தொடருக்கான ‘ராஜ்யசபா உறுப்பினர்களுக்கான கையேட்டு’ (Handbook for Members of Rajya Sabha) வெளியிட்டுள்ளது. இதில், பார்லிமென்ட் வழக்கங்கள், மரபுகள் மற்றும் நடத்தை விதிமுறைகள் விரிவாக விளக்கப்பட்டுள்ளன.
இந்த விதிமுறைகளின் முக்கிய விவரங்கள்: சபையில் எந்தப் பொருளையும் (எக்ஸிபிட்ஸ்) எடுத்து வந்து காட்சிப்பொருளாக வைக்கவோ அல்லது காட்டவோ கூடாது. விவாதத்தின் போது ஒரு எம்.பி., மற்றொரு எம்.பி.யையோ அல்லது அமைச்சரையோ விமர்சித்தால், அதற்குப் பதில் அளிக்கும் போது விமர்சனம் செய்த எம்.பி., சபையில் இருந்திருக்க வேண்டும். பதிலுரையின் போது அந்த எம்.பி., சபைக்கு வெளியே இருந்தால், அது பார்லிமென்ட் விதிகளை மீறும் செயலாகக் கருதப்படும்.
சபை தலைவரின் தீர்ப்புகள் முன்னுதாரணங்களின் அடிப்படையில் வழங்கப்படுகின்றன. எந்த முன்னுதாரணமும் இல்லாதபோது, பார்லிமென்ட் நடைமுறைகளைப் பின்பற்றியே தீர்ப்பு இருக்கும். அத்தகைய தீர்ப்புகள் அல்லது முடிவுகளை, சபைக்குள் அல்லது வெளியே நேரடியாகவோ மறைமுகமாகவோ விமர்சிக்கக் கூடாது. இது சபையின் கண்ணியத்தைப் பாதிக்கும்.
மேலும், சபையின் கண்ணியமும் தீவிரத்தன்மையும் காக்க, எம்.பி.க்கள் ‘நன்றி’, ‘தங்களுக்கு நன்றி’, ‘ஜெய்ஹிந்த்’, ‘வந்தே மாதரம்’ போன்ற கோஷங்களை எழுப்பக் கூடாது. பிற சுலோகன்களும் தடை செய்யப்பட்டுள்ளன. சபையில் பேசுவதற்கு முன், சபை தலைவரின் அனுமதி (ஐ காட்ச்) பெற வேண்டும். ராஜ்யசபா அல்லது லோக்சபா செயலகம், தலைவர் அல்லது ஸ்பீக்கரின் செயல்பாடுகள் தொடர்பான கேள்விகளுக்கு சபையில் பதில் அளிக்கப்படாது. இத்தகைய விதிகள், கடந்த கூட்டத்தொடர்களில் ஏற்பட்ட சர்ச்சைகள் மற்றும் குழப்பங்களைத் தவிர்க்கும் வகையில் அறிவிக்கப்பட்டுள்ளன.
இந்த விதிமுறைகள், பார்லிமென்ட் கூட்டத்தொடர்களில் அடிக்கடி ஏற்படும் சர்ச்சைகளை நினைவூட்டுகின்றன. கடந்த மழைக்கால கூட்டத்தொடரில், எதிர்க்கட்சிகளின் ஆர்ப்பாட்டங்கள், கோஷங்கள் மற்றும் தலைவர் முடிவுகளுக்கு எதிரான விமர்சனங்கள் காரணமாக கூட்டத்தொடர் முடங்கியது.
இப்போது, புதிய தலைவர் சி.பி.ராதாகிருஷ்ணன் தலைமையில் சபை சீராக இயங்கும் என எதிர்பார்க்கப்படுகிறது. இருப்பினும், எதிர்க்கட்சிகள் இந்த விதிகளை ‘கட்டுப்பாட்டு நடவடிக்கை’ என விமர்சித்து வருகின்றன. கூட்டத்தொடரில் முக்கியமாக விவாதிக்கப்பட உள்ள சட்ட மசோதாக்கள், பட்ஜெட் விவரங்கள் மற்றும் தேசிய பிரச்சினைகள் குறித்து அனைத்து கட்சிகளும் தயாராக உள்ளன.
இந்த அறிவிப்பு, பார்லிமென்ட் செயல்பாடுகளின் தரத்தை உயர்த்தும் என ராஜ்யசபா அதிகாரிகள் கூறுகின்றனர். எம்.பி.க்கள் இவற்றை கண்டிப்பாக பின்பற்ற வேண்டும் என வலியுறுத்தப்பட்டுள்ளது. குளிர்கால கூட்டத்தொடர் சீராகவும் கண்ணியமாகவும் நடைபெறும் என்பதில் அரசு நம்பிக்கை தெரிவித்துள்ளது.
இதையும் படிங்க: மனித இனத்திற்கே சாபக்கேடு! பயங்கரவாதிகளின் கொடூர தாக்குதல்!! கொந்தளிக்கும் அமித் ஷா!