இந்தியாவின் முன்னணி நிதிச் சேவை நிறுவனமான பேடிஎம் பேமெண்ட்ஸ் வங்கியின் (Paytm Payments Bank) உரிமத்தைத் தமிழ்நாடு மற்றும் நாடு முழுவதும் உள்ள கிளைகளுக்குப் பொருந்தும் வகையில் இன்று முதல் அதிகாரப்பூர்வமாக ரத்து செய்து இந்திய ரிசர்வ் வங்கி (RBI) அதிரடி உத்தரவு பிறப்பித்துள்ளது. பல ஆண்டுகளாக நீடித்த ஒழுங்குமுறை விதிமீறல்களின் உச்சகட்டமாக இந்த நடவடிக்கை எடுக்கப்பட்டுள்ளது.

இன்று (2026 ஏப்ரல் 24) பணி நேரம் முடிந்ததில் இருந்து பேடிஎம் வங்கி எவ்வித 'வங்கிச் சேவைகளிலும்' (Banking activities) ஈடுபடக் கூடாது என ரிசர்வ் வங்கி தடை விதித்துள்ளது. வங்கியின் நிர்வாகம் பொதுமக்களுக்கும் டெபாசிட் செய்தவர்களுக்கும் பாதகமான முறையில் செயல்பட்டதாக ரிசர்வ் வங்கி குற்றம் சாட்டியுள்ளது. வங்கி ஒழுங்குமுறைச் சட்டம் 1949-ன் கீழ் இதற்கான நடவடிக்கை எடுக்கப்பட்டுள்ளது.

வங்கியின் உரிமம் ரத்து செய்யப்பட்டாலும், அதில் பணம் வைத்துள்ள வாடிக்கையாளர்கள் கவலைப்படத் தேவையில்லை என ரிசர்வ் வங்கி உறுதியளித்துள்ளது. வங்கியில் உள்ள மொத்த டெபாசிட் தொகையையும் வாடிக்கையாளர்களுக்குத் திருப்பிச் செலுத்தத் தேவையான போதிய நிதி (Liquidity) வங்கியிடம் உள்ளதாக ஆர்பிஐ தெரிவித்துள்ளது. வங்கியின் பணிகளை முழுமையாக முடிவுக்குக் கொண்டு வர (Winding up) உயர்நீதிமன்றத்தில் ரிசர்வ் வங்கி விண்ணப்பிக்க உள்ளது.

இதையும் படிங்க: குறைகிறதா வீட்டுக் கடன், வாகனக் கடன் வட்டி..?? நாளை முக்கிய முடிவெடுக்கப்போகும் ரிசர்வ் வங்கி..!!

கடந்த சில ஆண்டுகளாகவே பேடிஎம் வங்கி ரிசர்வ் வங்கியின் தீவிர கண்காணிப்பில் இருந்து வந்தது மார்ச் 2022 அன்றுபுதிய வாடிக்கையாளர்களைச் சேர்க்க முதன்முதலில் தடை விதிக்கப்பட்டது. அதனை தொடர்ந்து 
ஜனவரி 2024 அன்று  புதிய டெபாசிட்டுகள் மற்றும் வாலட் (Wallet) டாப்-அப் சேவைகளுக்குத் தடை விதிக்கப்பட்டது. அதனை தொடர்ந்து இன்று ஏப்ரல் 2026 தொடர்ச்சியான விதிகளைப் பின்பற்றத் தவறியதால் தற்போது உரிமம் முழுமையாக ரத்து செய்யப்பட்டுள்ளது.

வாடிக்கையாளர்கள் கவனிக்கும் விதமாக, இந்தத் தடை பேடிஎம் பேமெண்ட்ஸ் வங்கிக்கு மட்டுமே பொருந்தும். பேடிஎம் வாலட் மற்றும் பிற யூபிஐ (UPI) சேவைகள் மற்ற வங்கிகளுடன் (Axis, HDFC, SBI போன்றவை) இணைந்து ஏற்கனவே செயல்பட்டு வருவதால், அந்தச் சேவைகள் வழக்கம் போலத் தொடரும் என எதிர்பார்க்கப்படுகிறது.
 

இதையும் படிங்க: புதிய சுவிட்சிங் சர்வீஸ்..!! அக்கவுண்ட் நம்பர் மாற்றாமல் வங்கியை மாற்றும் வசதி..!! RBI பரிசீலனை..!!