பிரதமர் நரேந்திர மோடியின் வீடியோ பேஸ்புக் தளத்தில் இருந்து திடீரென நீக்கப்பட்ட விவகாரம் தொடர்பாக விளக்கம் பெற, மெட்டா நிறுவன குழுவை இந்தியாவுக்கு வருமாறு மத்திய அரசு அழைத்துள்ளது. ஆகஸ்ட் 5 மற்றும் 6 ஆகிய தேதிகளில் மெட்டா பிரதிநிதிகள் இந்திய அதிகாரிகளை சந்தித்து விளக்கம் அளிக்க உள்ளதாக மின்னணுவியல் மற்றும் தகவல் தொழில்நுட்ப அமைச்சக செயலாளர் எஸ். கிருஷ்ணன் தெரிவித்துள்ளார்.

நீட் தேர்வு வினாத்தாள் கசிவு விவகாரத்தை கண்டித்து டெல்லி ஜந்தர் மந்தரில் நடைபெற்ற போராட்டம் தொடர்பாக பிரதமர் மோடி தனது பேஸ்புக் பக்கத்தில் மாணவர்களுக்கு அறிவுரை வழங்கும் வகையில் ஒரு வீடியோவை வெளியிட்டிருந்தார். அந்த வீடியோ கடந்த மாதம் 28-ம் தேதி திடீரென பேஸ்புக் தளத்தில் இருந்து நீக்கப்பட்டது.

சில மணி நேரங்களுக்கு பின்னர் அந்த வீடியோ மீண்டும் பதிவேற்றம் செய்யப்பட்டது. இதுகுறித்து பேஸ்புக் நிர்வாகம் தொழில்நுட்ப கோளாறு காரணமாக வீடியோ நீக்கப்பட்டதாக விளக்கம் அளித்து மன்னிப்பு கோரியது.

இதையும் படிங்க: "முதலீடே வேலைவாய்ப்பின் திறவுகோல்!" – ரூ.17,900 கோடி திட்டங்களை தொடங்கி வைத்து பிரதமர் மோடி அதிரடி பேச்சு!

இந்த விவகாரம் அரசியல் மற்றும் நிர்வாக மட்டத்தில் கவனத்தை ஈர்த்த நிலையில், தகவல் தொடர்பு மற்றும் தொழில்நுட்ப விவகாரங்களுக்கான நாடாளுமன்ற நிலைக்குழு கூட்டம் நடைபெற்றது. இந்தக் கூட்டத்தில், பேஸ்புக்கின் தாய் நிறுவனமான மெட்டாவின் செயல்பாடுகள் குறித்து விவாதிக்கப்பட்டது.

பிரதமர் போன்ற முக்கிய நபரின் சமூக வலைதள கணக்கு தொடர்பான நடவடிக்கைகள் குறித்து மெட்டா நிறுவனம் கூடுதல் விளக்கம் அளிக்க வேண்டும் என்றும், இதுபோன்ற சம்பவங்கள் மீண்டும் நடைபெறாமல் உறுதி செய்ய வேண்டும் என்றும் நிலைக்குழு கருத்து தெரிவித்துள்ளது. மேலும், மெட்டா தலைமை நிர்வாக அதிகாரி மார்க் ஜுக்கர்பெர்க் மன்னிப்பு கோர வேண்டும் என குழு பரிந்துரைத்ததாக தகவல்கள் வெளியாகின.

இதுகுறித்து மின்னணுவியல் மற்றும் தகவல் தொழில்நுட்ப அமைச்சக செயலாளர் எஸ். கிருஷ்ணன் கூறுகையில், முக்கியமான சமூக வலைதள கணக்குகள் மீது தவறான நடவடிக்கைகள் எடுக்கப்படுவதை அரசு தீவிரமாக கவனித்து வருவதாக தெரிவித்தார்.

மெட்டா போன்ற பெரிய தொழில்நுட்ப நிறுவனங்கள் இந்தியாவில் செயல்படும் போது, நிர்ணயிக்கப்பட்ட நடைமுறைகளை பின்பற்ற வேண்டும் என்றும், இந்த விவகாரம் தொடர்பாக மெட்டா குழுவிடம் அரசு விளக்கம் கேட்கும் என்றும் அவர் கூறினார்.

பிரதமர் மோடியின் வீடியோ நீக்கப்பட்ட விவகாரம் தற்போது சமூக வலைதள நிறுவனங்களின் பொறுப்பு மற்றும் உள்ளடக்க கட்டுப்பாடு தொடர்பான முக்கிய விவாதமாக மாறியுள்ளது.

இதையும் படிங்க: பாகிஸ்தானில் நடைபெறும் எஸ்.சி.ஓ. உச்சி மாநாடு... பிரதமர் மோடிக்கு அதிகாரப்பூர்வ அழைப்பு விடுக்க முடிவு!