அதிகாரப் பதவியின் மீது ஈர்ப்பு இல்லாமல், பொதுமக்களுக்கு சேவை செய்ய வேண்டும் என்ற எண்ணம் கொண்ட இளைஞர்கள் குடிமைப் பணிக்கு வர வேண்டும் என்று பிரதமர் நரேந்திர மோடி தெரிவித்துள்ளார்.
புதுடெல்லியில் நடைபெற்ற யுபிஎஸ்சி நூற்றாண்டு விழாவில் பேசிய அவர், அரசு பணிக்கான தேர்வு முறையில் விண்ணப்பதாரரின் அறிவை மட்டுமின்றி, அவர் ஏன் பொதுச் சேவைக்கு வர விரும்புகிறார் என்பதையும் அறிய வேண்டிய அவசியம் உள்ளதாகக் கூறினார்.
யூனியன் பப்ளிக் சர்வீஸ் கமிஷனான யுபிஎஸ்சி தொடங்கப்பட்டு 100 ஆண்டுகள் நிறைவடைந்துள்ளன. இதையொட்டி கடந்த ஆண்டு அக்டோபர் 1-ம் தேதி தொடங்கிய நூற்றாண்டு கால கொண்டாட்டங்களின் நிறைவு நிகழ்ச்சி புதுதில்லியில் உள்ள பாரத் மண்டபத்தில் நடைபெற்றது. இதில் பிரதமர் மோடி பங்கேற்று உரையாற்றினார்.
இதையும் படிங்க: மோடியின் பட்டப்படிப்பு விவகாரம்: கெஜ்ரிவாலுக்கு மீண்டும் பின்னடைவு! ₹25,000 அபராதம் உறுதி!
நிகழ்ச்சியில் பேசிய பிரதமர், நாட்டின் வளர்ச்சியில் குடிமைப் பணியாளர்களின் பங்கு முக்கியமானது என்று குறிப்பிட்டார். நாட்டையும், குடிமக்களையும் முதன்மையாகக் கருதி செயல்பட வேண்டியது அவசியம் என்றும் அவர் வலியுறுத்தினார். குடிமக்களுக்கு சேவை செய்வதே அரசுப் பணியின் முக்கிய நோக்கமாக இருக்க வேண்டும் என்பதையும் அவர் தனது உரையில் எடுத்துரைத்தார்.
பொதுச் சேவைக்கு வர விரும்பும் இளைஞர்களை தேர்வு செய்யும் நடைமுறையில் மாற்றங்கள் தேவைப்படுவதாகவும் பிரதமர் குறிப்பிட்டார். தேர்வில் ஒரு விண்ணப்பதாரருக்கு என்ன தெரியும் என்பதை மட்டும் மதிப்பிடாமல், பொதுச் சேவையில் சேர வேண்டும் என்ற அவரது நோக்கம் என்ன என்பதையும் புரிந்துகொள்ளும் வகையில் தேர்வு முறை அமைய வேண்டும் என்று அவர் கூறினார்.
“நாடு முதலில், குடிமக்கள் முதலில்” என்ற அணுகுமுறையை வலியுறுத்திய பிரதமர், அதிகாரத்தை நோக்கமாகக் கொள்ளாமல் சேவை மனப்பான்மையுடன் செயல்படும் இளைஞர்கள் நிர்வாகத்தில் இடம்பெற வேண்டும் என்ற கருத்தை முன்வைத்தார்.
இந்த நிகழ்ச்சியில் யுபிஎஸ்சி நூற்றாண்டை நினைவுகூரும் வகையில் சிறப்பு நினைவு நாணயம் மற்றும் அஞ்சல் தலையை பிரதமர் வெளியிட்டார். மேலும், ‘100 Landmark Judgements – Shaping the Policies of UPSC and Public Service Commissions in India’ என்ற புத்தகமும் வெளியிடப்பட்டது.
மாநில அரசுப் பணியாளர் தேர்வாணையங்களின் தலைவர்கள் மற்றும் உறுப்பினர்கள், மத்திய அரசின் மூத்த அதிகாரிகள், கல்வியாளர்கள், யுபிஎஸ்சி அதிகாரிகள் உள்ளிட்ட பல்வேறு தரப்பினர் விழாவில் பங்கேற்றனர்.
இதையும் படிங்க: சென்னைக்கு படை எடுக்கும் பிரதமர் மோடி - ராகுல்காந்தி! பலத்தை காட்ட தயாராகும் பாஜக - காங்.,!