இந்திய குடியரசுத் தலைவர் திரௌபதி முர்மு நாளை (டிசம்பர் 28) கர்நாடக மாநிலம் கார்வார் துறைமுகத்தில் இருந்து இந்திய கடற்படையின் நீர்மூழ்கிக் கப்பலில் கடல் பயணம் மேற்கொள்ள உள்ளார். இது வரலாற்றுச் சிறப்புமிக்க நிகழ்வாகும், ஏனெனில் இதன் மூலம் திரௌபதி முர்மு இந்தியத் தலைவர்களில் இரண்டாவது நபராக நீர்மூழ்கிக் கப்பல் பயணத்தை மேற்கொள்கிறார். முன்னதாக, மறைந்த முன்னாள் குடியரசுத் தலைவர் ஏ.பி.ஜே. அப்துல் கலாம் 2006-ஆம் ஆண்டு பிப்ரவரி 13-ஆம் தேதி விசாகப்பட்டினத்தில் இருந்து இதே போன்ற பயணத்தை மேற்கொண்டிருந்தார். 

குடியரசுத் தலைவர் மாளிகை வெளியிட்டுள்ள அறிக்கையின்படி, இந்த நீர்மூழ்கிக் கப்பல் பயணம் (sea sortie) கோவா, கர்நாடகா மற்றும் ஜார்கண்ட் மாநிலங்களுக்கு நான்கு நாட்கள் (டிசம்பர் 27 முதல் 30 வரை) அரசுமுறை பயணத்தின் ஒரு பகுதியாக அமைந்துள்ளது. இன்று மாலை கோவாவுக்கு புறப்படும் திரௌபதி முர்மு, அடுத்த நாள் கார்வார் துறைமுகத்துக்கு சென்று நீர்மூழ்கிக் கப்பலில் கடலுக்குள் பயணிக்க உள்ளார்.

இதையும் படிங்க: நாளை வேலூர் வருகிறார் திரவுபதி முர்மு..!! பாதுகாப்பிற்காக 1,200 போலீசார் குவிப்பு..!!

கார்வார் கடம்பா கடற்படைத் தளம் (Project Seabird) இந்தியாவின் மிகப்பெரிய கடற்படை உள்கட்டமைப்பு திட்டமாகும். இங்கு பல நீர்மூழ்கிக் கப்பல்களும் போர்க்கப்பல்களும் நிறுத்தப்பட்டுள்ளன.  இந்த பயணம் இந்திய கடற்படையின் திறன்களை உலகுக்கு வெளிப்படுத்துவதோடு, குடியரசுத் தலைவரின் பாதுகாப்புப் படைகளுடனான நெருக்கத்தை வெளிப்படுத்துகிறது.

கார்வார் துறைமுகம் கர்நாடகாவின் உத்தர கன்னடா மாவட்டத்தில் அமைந்துள்ளது. இது இந்திய கடற்படையின் மேற்கு கடற்பகுதியின் முக்கிய தளமாக உள்ளது. இங்கிருந்து மேற்கொள்ளப்படும் இந்த கடல் பயணம், ஜனாதிபதியின் துணிச்சலான பயணங்களின் தொடர்ச்சியாகக் காணப்படுகிறது. 

திரௌபதி முர்மு ஏற்கனவே இந்திய விமானப்படையின் முன்னணி போர் விமானங்களில் பயணித்து வரலாறு படைத்தவர். 2023-இல் சுகோய்-30 எம்கேஐ போர் விமானத்திலும், இந்த ஆண்டு அக்டோபர் 29-ஆம் தேதி ரபேல் போர் விமானத்திலும் பயணித்து முதல் குடியரசுத் தலைவராக சாதனை புரிந்தார். தற்போது கடல் ஆழத்தில் நீர்மூழ்கிக் கப்பல் பயணம் மூலம் வான், கடல், நீருக்கடியில் என மூன்று பரிமாணங்களிலும் இந்திய பாதுகாப்பு திறனை அனுபவிக்கும் முதல் தலைவராக திரௌபதி முர்மு திகழ உள்ளார்.

இந்த பயணத்தை முன்னிட்டு உத்தர கன்னட மாவட்ட ஆட்சியர் கார்வாரில் இருந்து மஜாலி வரை 18 கி.மீ. தொலைவுக்கு மீன்பிடி நடவடிக்கைகளை தடை செய்து உத்தரவிட்டுள்ளார். பாதுகாப்பு ஏற்பாடுகள் தீவிரப்படுத்தப்பட்டுள்ளன.

பயணத்தின் மற்ற பகுதிகளில், டிசம்பர் 29-ஆம் தேதி ஜார்கண்ட் மாநிலம் ஜாம்ஷெட்பூரில் ஒல் சிக்கி எழுத்துமுறையின் நூற்றாண்டு விழாவிலும், தேசிய தொழில்நுட்ப கழகத்தின் 15-வது பட்டமளிப்பு விழாவிலும் கலந்துகொள்கிறார். டிசம்பர் 30-ஆம் தேதி கும்லாவில் அந்தர்ராஜ்யிய ஜன்சன்ஸ்கிரிதிக் சமாகம் சமாரோஹ் (கார்த்திக் ஜாத்ரா) நிகழ்ச்சியில் உரையாற்ற உள்ளார். இந்த நிகழ்வு இந்தியாவின் பாதுகாப்பு வலிமையை உறுதிப்படுத்துவதாக அமையும் என்று எதிர்பார்க்கப்படுகிறது.

இதையும் படிங்க: நாளை வேலூர் வருகிறார் திரவுபதி முர்மு..!! பாதுகாப்பிற்காக 1,200 போலீசார் குவிப்பு..!!