நாம் தமிழர் கட்சியின் தலைமை ஒருங்கிணைப்பாளர் சீமான், தமிழ்நாடு மின் பகிர்மானக் கழகத்தின் மின் கணக்கீட்டுப் பணிகளைத் தனியாரிடம் ஒப்படைக்கும் தமிழ்நாடு அரசின் முடிவை கடுமையாகக் கண்டித்துள்ளார். அனுபவமற்ற தனியார் நிறுவனப் பணியாளர்களை நியமிப்பதால் மின் கணக்கீடு மேலும் குளறுபடியாக மாறும் என்றும், வீடுகளுக்கான மின் கணக்கீட்டுப் பணிகளைத் தனியாரிடம் ஒப்படைக்கும் இந்த முடிவை அரசு உடனடியாகக் கைவிட வேண்டும் என்றும் அவர் வலியுறுத்தியுள்ளார்.

மின்வாரியப் பணியிடங்களை நிரப்பாமல், பணியாளர் பற்றாக்குறையைக் காரணம் காட்டி மின் கணக்கீட்டுப் பணிகளைத் தனியாரிடம் ஒப்படைக்கும் முடிவு கடும் கண்டனத்திற்குரியது என்று சீமான் குறிப்பிட்டார். மின்சாரம் வெறும் வணிகப் பொருள் மட்டுமல்ல; மக்களின் அன்றாட வாழ்வோடு நேரடியாகப் பிணைந்துள்ள அடிப்படைத் தேவை. அதன் பயன்பாட்டைக் கணக்கிடும் மிக முக்கிய பணியைத் தனியாரிடம் தாரைவார்ப்பது எவ்வகையில் நியாயமாகும் என்று அவர் கேள்வி எழுப்பினார்.

மின்வாரியத்தில் போதிய பணியாளர்கள் இல்லை என்றால், அந்த காலிப்பணியிடங்களை இத்தனை மாதங்களாக ஏன் அரசு நிரப்பவில்லை என்றும், மின்துறையில் போதிய பணியாளர்களை நியமிக்காதது யாருடைய தவறு என்றும் அவர் கேட்டார். அரசின் நிர்வாகத் தவறுக்கு அரசுப் பணியைத் தனியாரிடம் ஒப்படைப்பது எப்படித் தீர்வாகும் என்று கேள்வி எழுப்பிய சீமான், அரசு வேலைக்காக இலட்சக்கணக்கான தமிழ்நாட்டு இளைஞர்கள் காத்திருக்கையில், அவர்களுக்கு நிரந்தரப் பணியை வழங்காமல் இருக்கின்ற பணிகளையே ஒப்பந்த முறையில் தனியாரிடம் ஒப்படைப்பதுதான் அரசின் வேலைவாய்ப்புக் கொள்கையா, இதுதான் மக்களுக்கான மாற்றமா என்று கேட்டார்.

இதையும் படிங்க: ஜீரோ கட்சியை பார்த்து ஹீரோ கட்சி பயப்படுகிறது! மதுராந்தகத்தில் சீமான் அதிரடி பேச்சு!!

தற்போதைய ஆட்சியில் அனுபவமிக்க மின்வாரியப் பணியாளர்கள் எடுத்த கணக்கீடுகளிலேயே இலட்சக்கணக்கான வீடுகளில் குளறுபடிகள் ஏற்பட்ட நிலையில், அனுபவமற்ற தனியார் ஒப்பந்தப் பணியாளர்கள் வீடுதோறும் சென்று கணக்கெடுக்கும்போது தவறான கணக்கீடு ஏற்பட்டால் அதற்கு யார் பொறுப்பேற்பது என்று அவர் கேள்வி எழுப்பினார். 

இதையும் படிங்க: விறுவிறு இடைத்தேர்தல்... களமிறங்கிய சீமான்..! மதுராந்தகத்தில் அனல் பரப்புரை..!!