தமிழ்நாட்டில் புதிய ஒருங்கிணைந்த சட்டப்பேரவை மற்றும் தலைமைச் செயலக வளாகம் அமைக்கப்படும் என முதலமைச்சர் விஜய் கடந்த செப்டம்பர் 3ஆம் தேதி சட்டப்பேரவையில் அறிவித்திருந்தார்.

இதனைத் தொடர்ந்து, சென்னை மயிலாப்பூர் பகுதியில் உள்ள சுமார் 25.55 ஏக்கர் நிலத்தில் புதிய சட்டப்பேரவை மற்றும் தலைமைச் செயலக வளாகம் அமைப்பதற்கு தமிழக அரசு செப்டம்பர் 8ஆம் தேதி அரசாணை வெளியிட்டது. அரசாணை (Ms) எண் 564-ன் அடிப்படையில், சுமார் 20 லட்சம் சதுர அடி பரப்பளவில், ரூ.1,200 கோடி மதிப்பீட்டில் இந்த ஒருங்கிணைந்த வளாகம் அமைக்க திட்டமிடப்பட்டுள்ளது.

பட்டினப்பாக்கம் ஃபோர்ஷோர் எஸ்டேட் பகுதியில் உள்ள இந்த நிலம் தமிழ்நாடு வீட்டு வசதி வாரியம், சென்னை மாநகராட்சி மற்றும் வருவாய்த் துறையின் கட்டுப்பாட்டில் உள்ள நிலங்களை உள்ளடக்கியதாக அரசாணையில் குறிப்பிடப்பட்டுள்ளது. திட்டத்திற்கான விரிவான திட்ட அறிக்கையை மூன்று மாதங்களுக்குள் தயாரித்து சமர்ப்பிக்க பொதுப்பணித்துறைக்கு உத்தரவிடப்பட்டதுடன், கட்டட வடிவமைப்பு உள்ளிட்ட பணிகளுக்காக மூன்று குழுக்களும் அமைக்கப்பட்டுள்ளன.

இதையும் படிங்க: போட்டுறா வெடியா...!! - மீனவர்கள் எதிர்ப்புக்கு அடிபணிந்த தவெக... பட்டினம்பாக்கத்தில் புதிய தலைமைச்செயலகம் அமைக்கும் ஆணை ரத்து?

எதற்காக எதிர்ப்பு?

புதிய தலைமைச் செயலகம் அமைக்க தேர்வு செய்யப்பட்டுள்ள பட்டினப்பாக்கம் பகுதி, பாரம்பரியமாக மீனவ மக்கள் வசித்து வரும் கடலோரப் பகுதியாகும். இந்த நிலம் தங்களது பாரம்பரிய நிலம் என்றும், கடந்த காலங்களில் குடியிருப்புகள் அமைப்பதற்காக தங்களிடம் இருந்து நிலம் பெறப்பட்டதாகவும் அப்பகுதி மீனவர்கள் தெரிவித்து வருகின்றனர். 1956–57 காலகட்டத்தில் முள்ளிக்குப்பம் மீனவர்களிடம் இருந்து நிலம் பெறப்பட்டதாகவும், தற்போது அந்த நிலமே புதிய தலைமைச் செயலகத்திற்காக ஒதுக்கப்பட்டுள்ளதாகவும் மீனவ அமைப்புகள் கூறுகின்றன.

மேலும், புதிய தலைமைச் செயலகம் அமைக்கப்பட்டால் தங்களது வாழ்வாதாரம் பாதிக்கப்படும், படகுகளை நிறுத்துவது, மீன்பிடி வலைகளை பழுது பார்ப்பது மற்றும் உலர்த்துவது, மீன் விற்பனை செய்வது உள்ளிட்ட அன்றாட நடவடிக்கைகளில் கட்டுப்பாடுகள் ஏற்படும் என மீனவர்கள் அச்சம் தெரிவித்துள்ளனர்.

அதேபோல், தலைமைச் செயலகம் போன்ற மிகப்பெரிய அரசு வளாகம் அமைந்தால் அப்பகுதியில் பாதுகாப்பு ஏற்பாடுகள் அதிகரிக்கலாம் என்றும், கடற்கரைக்குச் செல்லும் தங்களது வழித்தடங்கள் கட்டுப்படுத்தப்படலாம் என்றும் மீனவ மக்கள் கவலை தெரிவித்துள்ளனர்.

போக்குவரத்து நெரிசல், சுற்றுச்சூழல்:

பட்டினப்பாக்கம், சாந்தோம் ஹை ரோடு, கிரீன்வேஸ் ரோடு உள்ளிட்ட பகுதிகளில் ஏற்கனவே போக்குவரத்து நெரிசல் அதிகமாக இருப்பதாகவும், பள்ளிகள் உள்ளிட்ட முக்கிய நிறுவனங்கள் அமைந்துள்ள பகுதியில் புதிய தலைமைச் செயலகம் வந்தால் மேலும் போக்குவரத்து நெரிசல் ஏற்படும் என்றும் எதிர்ப்பாளர்கள் தெரிவித்து வருகின்றனர்.

மேலும், கடலோரப் பகுதியில் இந்தத் திட்டம் செயல்படுத்தப்படுவதால் கடலோரச் சூழலியல், வெள்ளம், புயல் மற்றும் கடல் சீற்றம் உள்ளிட்ட இயற்கை பாதிப்புகள் குறித்தும் அரசியல் கட்சிகள் மற்றும் சுற்றுச்சூழல் சார்ந்த அமைப்புகள் கேள்வி எழுப்பியுள்ளன.

இதனிடையே, புதிய தலைமைச் செயலகம் அமைப்பதற்கான பட்டினப்பாக்கம் இடத்தை மாற்ற வேண்டும் என பல்வேறு அரசியல் கட்சிகளும் வலியுறுத்தி வருகின்றன. சில கட்சிகள் ஏற்கனவே உள்ள நிர்வாகக் கட்டமைப்புகளைப் பயன்படுத்துவது அல்லது சென்னைக்கு வெளியே ஒருங்கிணைந்த நிர்வாக நகரம் அமைப்பது போன்ற மாற்று வழிகளையும் முன்வைத்துள்ளன.

இன்று மீனவர்கள் போராட்டம்: 

இந்த நிலையில், பட்டினப்பாக்கத்தில் புதிய தலைமைச் செயலகம் கட்ட எதிர்ப்பு தெரிவித்து மீனவ கிராம மக்கள் இன்று போராட்டத்தில் ஈடுபட உள்ளனர்.

குறிப்பாக, அரசாணை எண் 564-ஐ உடனடியாக ரத்து செய்ய வேண்டும் என்றும், பட்டினப்பாக்கம், சீனிவாசபுரம், முள்ளிக்குப்பம் உள்ளிட்ட பகுதிகளில் பூர்வீகமாக வசித்து வரும் மீனவ மக்களின் வாழ்வாதாரத்தை பாதிக்கும் வகையில் அறிவிக்கப்பட்டுள்ள புதிய தலைமைச் செயலகம் கட்டும் நடவடிக்கையை உடனடியாகத் திரும்பப் பெற வேண்டும் என்றும் அவர்கள் வலியுறுத்த உள்ளனர்.

இந்தத் திட்டத்திற்கு மீனவ அமைப்புகள் மட்டுமின்றி, பல்வேறு அரசியல் கட்சிகளும் எதிர்ப்பு தெரிவித்து வரும் நிலையில், இன்று மீனவ கிராம மக்கள் ஒன்று கூடி போராட்டத்தில் ஈடுபட உள்ளனர்.

இன்று காலை 10 மணி அளவில் போராட்டம் நடைபெற உள்ள நிலையில், போராட்டத்தைக் கட்டுப்படுத்தும் வகையில் 200-க்கும் மேற்பட்ட போலீசார் அப்பகுதியில் குவிக்கப்பட்டுள்ளனர்.

இதனால், பட்டினப்பாக்கத்தில் புதிய தலைமைச் செயலகம் அமைக்கும் தமிழக அரசின் திட்டத்திற்கு எதிரான போராட்டம் தற்போது கவனம் பெற்றுள்ளது.

இதையும் படிங்க: தகவல் தந்தால் ரூ.8.8 கோடி பரிசு சன்மானம்! இந்தியாவின் மோஸ்ட் வான்டட் கோல்டி பிரார்! தேடும் அமெரிக்கா!