சமூக வலைதளங்களில் குறைந்த விலையில் மளிகை பொருட்கள் வழங்குவதாக வெளியாகும் கவர்ச்சி விளம்பரங்களை நம்பி பொதுமக்கள் பணத்தை இழக்க வேண்டாம் என்று சைபர் குற்றத்தடுப்பு பிரிவு போலீசார் எச்சரித்துள்ளனர். குறிப்பாக, ரூ.2,299க்கு 40 வகையான மளிகை பொருட்களை வீடு தேடி வந்து வழங்குவதாக வெளியாகும் விளம்பரங்கள் மூலம் புதிய வகை ஆன்லைன் மோசடி நடைபெறுவதாக போலீசார் தெரிவித்துள்ளனர்.

சமூக வலைதளங்களில் வெளியாகும் இந்த விளம்பரங்களில், குறைந்த விலையில் அரிசி, பருப்பு, எண்ணெய் உள்ளிட்ட 40 வகையான மளிகை பொருட்கள் அடங்கிய தொகுப்பு ரூ.2,299க்கு வழங்கப்படும் என்றும், வீட்டுக்கே பொருட்கள் டெலிவரி செய்யப்படும் என்றும் தெரிவிக்கப்படுகிறது. இந்த விளம்பரங்களை பார்த்து ஆர்வம் ஏற்படும் வகையில் பல்வேறு சலுகைகளும் குறிப்பிடப்படுகின்றன.

விளம்பரத்தில் கொடுக்கப்பட்டுள்ள இணைப்பை பொதுமக்கள் கிளிக் செய்யும்போது, அவர்களது செல்போன் எண் குறிப்பிட்ட வாட்ஸ் அப் குழுவில் சேர்க்கப்படுவதாக போலீசார் கூறுகின்றனர். அந்த குழுவில் மோசடி கும்பலைச் சேர்ந்தவர்கள் வாடிக்கையாளர்களைப் போல செயல்படுவதாகவும் எச்சரிக்கை விடுக்கப்பட்டுள்ளது.

இதையும் படிங்க: குழந்தைகள் தொடர்பான ஆபாச உள்ளடக்கம்! இந்திய அரசின் அழுத்தம் எதிரொலி? கூகுள் எடுத்த முக்கிய முடிவு!

குறைந்த விலையில் மளிகை பொருட்கள் வாங்கியதாகவும், பொருட்கள் தங்கள் வீடுகளுக்கு வந்து சேர்ந்ததாகவும் கூறி போலியான புகைப்படங்கள் மற்றும் பதிவுகளை அவர்கள் வெளியிடுகின்றனர். இதன் மூலம் புதிதாக குழுவில் சேர்க்கப்பட்டவர்களுக்கு அந்த சலுகை உண்மையானது போன்ற நம்பிக்கையை ஏற்படுத்த முயற்சிப்பதாக கூறப்படுகிறது.

இதனை நம்பும் சிலர், குழுவில் வழங்கப்படும் சலுகைகள் மற்றும் பரிசு அறிவிப்புகளால் ஈர்க்கப்பட்டு ரூ.2,299 தொகையை செலுத்துகின்றனர். ஆனால் பணம் செலுத்திய பின்னர் பொருட்கள் வீட்டுக்கு வருவதில்லை. இதன் பின்னரே தாங்கள் மோசடி செய்யப்பட்டிருப்பதை பலர் உணர்கின்றனர்.

இத்தகைய விளம்பரங்கள் பணத்தை மட்டுமின்றி, தனிப்பட்ட தகவல்களையும் திருடும் நோக்கத்தில் உருவாக்கப்பட்டிருக்கலாம் என்று போலீசார் எச்சரித்துள்ளனர். சந்தேகத்திற்கிடமான இணையதள இணைப்புகளை கிளிக் செய்வதையும், தெரியாத நபர்களுக்கு OTP, PIN, வங்கி கணக்கு அல்லது கார்டு விவரங்களை பகிர்வதையும் பொதுமக்கள் தவிர்க்க வேண்டும்.

ஆன்லைனில் குறைந்த விலையில் பொருட்கள் கிடைப்பதாக வரும் விளம்பரங்களை அவசரப்பட்டு நம்பாமல், விற்பனையாளரின் நம்பகத்தன்மையை சரிபார்த்த பிறகே பணம் செலுத்த வேண்டும் என்றும் சைபர் குற்றத்தடுப்பு பிரிவு போலீசார் அறிவுறுத்தியுள்ளனர்.

இதையும் படிங்க: Facebook, Instagram விளம்பரங்களை நம்பாதீங்க! ஆபாச ஆப் பெயரில் ஆண்ட்ராய்டு போனுக்குள் புகும் ஆபத்து!