பஞ்சாப் மாநிலம் பதான்கோட் மாவட்டத்தில் பாகிஸ்தான் உளவு அமைப்பான ஐஎஸ்ஐ-க்கு உளவு பார்த்த குற்றச்சாட்டில் 15 வயது சிறுவன் ஒருவன் போலீசாரால் கைது செய்யப்பட்டுள்ளான். இந்த சிறுவன் கடந்த ஒரு ஆண்டாக நாட்டின் பாதுகாப்பு தொடர்பான முக்கிய தகவல்களை ஐஎஸ்ஐ ஏஜென்ட்களுக்கு பகிர்ந்து வந்ததாக போலீசார் தெரிவித்துள்ளனர்.

கைது செய்யப்பட்ட சிறுவன் ஜம்மு காஷ்மீரின் சாம்பா மாவட்டத்தைச் சேர்ந்தவன் என்று கூறப்படுகிறது. சமூக வலைதளங்கள் வாயிலாக பாகிஸ்தான் ஏஜென்ட்களால் தொடர்பு கொள்ளப்பட்ட இவன், உணர்ச்சிவசப்படுத்தப்பட்டு உளவு பார்க்க வைக்கப்பட்டதாக போலீசார் கூறுகின்றனர். குறிப்பாக, அவனது தந்தை கொல்லப்பட்டதாக பொய் தகவல் சொல்லி அவனை மூளைச்சலவை செய்துள்ளனர். ஆனால் விசாரணையில் அது பொய்யானது என தெரியவந்தது.

பதான்கோட் மூத்த காவல் கண்காணிப்பாளர் தல்ஜீந்தர் சிங் தில்லான் கூறுகையில், "இந்த சிறுவன் நாட்டின் பாதுகாப்பு தொடர்பான தகவல்களை பாகிஸ்தான் தீவிரவாத அமைப்புகள், ஐஎஸ்ஐ மற்றும் பாகிஸ்தான் ராணுவ அதிகாரிகளுக்கு வழங்கி வந்தான். சமூக வலைதளங்கள் வாயிலாக அவன் ஏமாற்றப்பட்டான். முக்கிய இடங்களின் வீடியோக்களை அனுப்பியுள்ளான்" என்றார்.

இதையும் படிங்க: பாகிஸ்தானுக்கு உளவு பார்த்த விவகாரம்! ஆயுதம் கடத்தவும், ஊடுருவவும் உதவி!! அருணாச்சலில் 2 பேர் கைது!

இந்த கைது நாட்டின் பாதுகாப்புக்கு பெரும் அச்சுறுத்தலை ஏற்படுத்தியுள்ளது. ஐஎஸ்ஐ சிறுவர்களை இலக்கு வைத்து உளவு பார்க்க முயல்வது மிகவும் கவலை அளிக்கிறது என்று போலீசார் தெரிவித்தனர். பஞ்சாப் மாநிலத்தில் மேலும் சில சிறுவர்கள் ஐஎஸ்ஐ ஏஜென்ட்களுடன் தொடர்பில் இருக்கலாம் என சந்தேகிக்கப்படுகிறது. இதனால் மாநிலம் முழுவதும் போலீசார் உஷார் நிலையில் உள்ளனர்.

கடந்த ஆண்டு 'ஆபரேஷன் சிந்தூர்' நடவடிக்கைக்குப் பிறகு பாகிஸ்தான் உளவாளிகளை கைது செய்யும் நடவடிக்கைகள் தீவிரப்படுத்தப்பட்டுள்ளன. பஞ்சாப், ஹரியானா, உத்தரப் பிரதேசம் உள்ளிட்ட மாநிலங்களில் 20க்கும் மேற்பட்டோர் கைது செய்யப்பட்டுள்ளனர். இந்த சிறுவன் கைது தொடர்பாக மேலும் விசாரணை நடந்து வருகிறது. அவனுடன் தொடர்புடையவர்களும் கைது செய்யப்படுவார்கள் என்று போலீசார் தெரிவித்தனர்.

இந்த சம்பவம் எல்லைப் பகுதிகளில் வசிக்கும் இளைஞர்கள் மற்றும் சிறார்களை சமூக வலைதளங்களில் ஏமாற்றி உளவு பார்க்கும் பாகிஸ்தான் தந்திரத்தை வெளிச்சத்துக்கு கொண்டு வந்துள்ளது. பொதுமக்கள் விழிப்புணர்வுடன் இருக்க வேண்டும் என்று அதிகாரிகள் அறிவுறுத்தியுள்ளனர்.

இதையும் படிங்க: உலகப் புகழ்பெற்ற அலங்காநல்லூர் ஜல்லிக்கட்டு... முதல்வர் ஸ்டாலின் தொடங்கி வைப்பார்..! அமைச்சர் மூர்த்தி பேட்டி...!