கர்நாடக மாநில முதல்வர் சித்தாராமையா தனது பதவியை ராஜினாமா செய்ய முன்வந்துள்ளதாக காங்கிரஸ் வட்டாரங்கள் உறுதிப்படுத்தியுள்ளன. 2023 சட்டமன்றத் தேர்தலில் காங்கிரஸ் வெற்றி பெற்றபோது, முதல்வர் பதவியை 2.5 ஆண்டுகள் வீதம் பகிர்ந்து கொள்ளும் உடன்பாட்டின் அடிப்படையில் இந்த முடிவு எடுக்கப்பட்டுள்ளது. துணை முதல்வர் டி.கே. சிவகுமார் விரைவில் முதல்வர் பொறுப்பேற்கும் வாய்ப்பு உருவாகியுள்ளது.

கடந்த 2023-ம் ஆண்டு மே மாதம் கர்நாடகத்தில் காங்கிரஸ் ஆட்சி அமைக்கப்பட்டபோது, கட்சி மேலிடத் தலைவர்களான மல்லிகார்ஜுன கார்கே மற்றும் ராகுல் காந்தியின் முன்னிலையில் சித்தாராமையா - டி.கே. சிவகுமார் இடையே முக்கிய உடன்பாடு எட்டப்பட்டதாக அரசியல் வட்டாரங்கள் தெரிவிக்கின்றன. அதன்படி, மொத்த ஐந்தாண்டு ஆட்சிக் காலத்தில் முதல் 2.5 ஆண்டுகள் சித்தாராமையாவும், அடுத்த 2.5 ஆண்டுகள் சிவகுமாரும் முதல்வர் பதவி வகிக்கவேண்டும் என முடிவு செய்யப்பட்டது. இந்த ஒப்பந்தம் கட்சியின் உள் ஒற்றுமையை வலுப்படுத்தும் வகையில் அமைந்திருந்தது.

இருப்பினும், இந்த உடன்பாட்டின் காலக்கெடு நெருங்கியதால் கடந்த சில மாதங்களாக காங்கிரஸ் கட்சியில் தீவிர விவாதங்கள் நடைபெற்று வந்தன. இந்நிலையில், 2028 சட்டமன்றத் தேர்தல் தயாரிப்பு, கர்நாடகத்தில் உள்ள 4 காலியாகும் ராஜ்யசபா இடங்களுக்கான தேர்தல் மற்றும் மாநில சட்டமேலவைத் தேர்தல் உள்ளிட்ட முக்கிய விவகாரங்களை விவாதிக்க கட்சி மேலிடம் சித்தாராமையா மற்றும் சிவகுமாரை டெல்லிக்கு அழைத்திருந்தது.

இதையும் படிங்க: அச்சுறுத்தும் எபோலா..!! 21 நாட்கள் தனிமை கட்டாயம்..!! அதிரடி காட்டும் கனடா..!!

அதன்படி நேற்று டெல்லியில் நடைபெற்ற உயர்மட்டக் கூட்டத்தில் காங்கிரஸ் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி, பொதுச் செயலாளர் கே.சி. வேணுகோபால், கர்நாடகப் பொறுப்பாளர் ரண்தீப் சிங் சுர்ஜேவாலா உள்ளிட்டோர் பங்கேற்றனர். கூட்டத்தில் ராஜ்யசபா தேர்தல் விவகாரங்கள் முதன்மையாக விவாதிக்கப்பட்டன. அதன்பின்னர், சித்தாராமையா மற்றும் சிவகுமாரை தனித்தனியாகவும், ஒன்றாகவும் சந்தித்து ராகுல் காந்தியும் கார்கேயும் நீண்ட நேரம் ஆலோசனை நடத்தினர். 

ராகுல் காந்தியின் வேண்டுகோளுக்கு இணங்க சித்தாராமையா முதல்வர் பதவியை ராஜினாமா செய்ய ஒப்புக்கொண்டதாக தகவல்கள் வெளியாகியுள்ளன. எனினும், மாநிலங்களவை உறுப்பினர் பதவி உள்ளிட்ட தேசிய அளவிலான பொறுப்புகளை அவர் ஏற்கத் தயக்கம் காட்டியதாகக் கூறப்படுகிறது. சிவகுமார் தரப்பில் முதல்வர் மாற்றத்துக்கு வலுவான அழுத்தம் இருந்ததும் இதற்குக் காரணமாகச் சொல்லப்படுகிறது.

வரும் வியாழக்கிழமை (மே 28) பிற்பகல் 2 மணிக்கு மாநில ஆளுநர் தாவாச்சந்த் கெலாட்டை சித்தாராமையா சந்திக்க உள்ளார். அடுத்த நாள் வெள்ளிக்கிழமை (மே 29) காங்கிரஸ் சட்டப்பேரவைக் குழுக் கூட்டத்துக்கு அழைப்பு விடுக்கப்பட்டுள்ளது. இதற்கிடையில், கே.சி. வேணுகோபால் மற்றும் ரண்தீப் சுர்ஜேவாலா இன்று பெங்களூரு வருகை தரவுள்ளனர். காங்கிரஸ் தலைமை, சித்தாராமையாவுக்கு ராஜ்யசபா இடம் ஒதுக்கி, கட்சியில் தேசிய அளவிலான முக்கிய பொறுப்பு வழங்க முடிவு செய்துள்ளதாகவும் தெரிவிக்கப்படுகிறது. இந்த மாற்றம் கர்நாடக அரசியலில் புதிய சமன்பாட்டை உருவாக்கும் என எதிர்பார்க்கப்படுகிறது. 
 

இதையும் படிங்க: 10 வயது சிறுமி வன்கொடுமை; முதல்வர் விஜய் மௌனம் காப்பது ஏன்? இடதுசாரிகள் ஆர்ப்பாட்டம்!