தமிழக அரசுக்கும் ஆளுநர் ஆர்.என். ரவிக்கும் இடையே கடந்த 2021-ஆம் ஆண்டு அவர் பதவியேற்றதிலிருந்து தொடர்ந்து மோதல் அதிகரித்து வருகிறது. தமிழக சட்டப்பேரவையில் நிறைவேற்றப்பட்ட மசோதாக்களுக்கு ஆளுநர் ஒப்புதல் அளிப்பதில் காலதாமதம் செய்வதாக திமுக அரசு குற்றம்சாட்டுகிறது. இது தொடர்பாக தமிழக அரசு உச்ச நீதிமன்றத்தில் வழக்கு தொடர்ந்தது, மேலும் ஆளுநர்கள் மசோதாக்களுக்கு ஒப்புதல் அளிக்க காலக்கெடு விதிக்க வேண்டும் என உச்ச நீதிமன்றம் தீர்ப்பளித்தது. 

இதேபோல் கடந்த 2024 அக்டோபரில் இந்தி மாத விழாவில் 'தமிழ்த்தாய் வாழ்த்து' பாடலில் 'திராவிடம்' என்ற சொல் தவிர்க்கப்பட்டது, இதனால் ஆளுநர் மீது 'திராவிட ஒவ்வாமை' உள்ளதாக முதலமைச்சர் மு.க. ஸ்டாலின் குற்றம்சாட்டினார். இது பெரும் சர்ச்சையை ஏற்படுத்தியது.

இதையும் படிங்க: தணியாத போர்ப்பதற்றம்.. ஈரானில் இருந்து டெல்லி வந்த மேலும் 272 இந்தியர்கள்..!

2023 மற்றும் 2024-ஆம் ஆண்டுகளில், ஆளுநர் ஆர்.என். ரவி தமிழக அரசு தயாரித்த உரையில் குறிப்பிட்ட சில பகுதிகளை (பெரியார், அம்பேத்கர், மதச்சார்பின்மை போன்றவை) வாசிக்க மறுத்து, சட்டப்பேரவையில் இருந்து வெளியேறினார். மேலும் 2024-ல் தேசிய கீதம் இசைக்கப்படவில்லை என்ற காரணத்தால் உரையை முழுமையாக வாசிக்காமல் வெளியேறினார். இப்படி பல காரணங்களால் தமிழக அரசுக்கும் ஆளுநர் ஆர்.என் ரவிக்கும் இடையே மோதல் போக்கு தொடர்ந்து நீடித்து வருகிறது. இது தமிழக அரசியல் களத்தில் முக்கிய பேசு பொருளாக உள்ளது

அதுமட்டுமின்றி ஆளுநர் ரவி, பொது மேடைகளில் தமிழக அரசை விமர்சிப்பதாகவும், பாஜக-வின் நோக்கங்களை முன்னெடுப்பதற்காக செயல்படுவதாகவும் திமுக மற்றும் கூட்டணிக் கட்சிகள் குற்றம்சாட்டுகின்றன. இதனால் ஆளுநர் ரவியை நீக்கக் கோரி தமிழக அரசு உச்ச நீதிமன்றத்தில் மனுதாக்கல் செய்தது. அந்த மனு 2025 பிப்ரவரியில் தள்ளுபடி செய்யப்பட்டது. இருப்பினும், மசோதாக்களுக்கு ஒப்புதல் அளிக்க காலக்கெடு விதிக்கப்பட்டதால், ஆளுநரின் அதிகாரங்கள் பகுதியளவு கட்டுப்படுத்தப்பட்டுள்ளன.

இந்த நிலையில், கடந்த மாதம் 26-ந் தேதி டெல்லிக்கு ஒரு நாள் பயணமாக சென்று வந்த ஆளுநர் ஆர்.என். ரவி, தற்போது 4 நாள் பயணமாக மீண்டும் டெல்லி சென்றுள்ளார். இன்று காலை 8.55 மணிக்கு ஏர் இந்தியா பயணிகள் விமானத்தில் சென்னையில் இருந்து டெல்லி புறப்பட்டு சென்றுள்ளார். இந்த 4 நாள் பயணத்தில் ஆளுநர் ரவி, மத்திய உள்துறை அமைச்சர் அமித்ஷா உள்ளிட்டோரை சந்தித்து பேசுவார் என்று கூறப்படுகிறது. அப்போது, தமிழகத்தில் நிலவும் சட்டம் - ஒழுங்கு நிலை குறித்து அவர் தெரிவிப்பார் என தெரிகிறது. இதனை தொடர்ந்து வரும் 4ம் தேதி (வெள்ளிக்கிழமை) ஆளுநர் ஆர்.என். ரவி டெல்லியில் இருந்து சென்னை திரும்பவுள்ளார். 

ஒரே வாரத்தில், 2வது முறையாக ஆளுநர் ஆர்.என் ரவி டெல்லி சென்றது அரசியல் வட்டாரத்தில் பரபரப்பை ஏற்படுத்தியுள்ளது. 
 

இதையும் படிங்க: மாறி மாறி அடித்துக்கொள்ளும் ஈரான் - இஸ்ரேல்.. நாடு திரும்பிய மேலும் 280 இந்தியர்கள்..!