வடகிழக்கு மாநிலமான மணிப்பூரில் மீண்டும் பதற்றம் தலைதூக்கியுள்ளது. குக்கி மற்றும் நாகா சமூகங்களைச் சேர்ந்த ஆயுதக் குழுக்களிடையே நடைபெற்ற மோதல்களில் 8 பேர் பரிதாபமாக உயிரிழந்துள்ளனர். உக்ருல் மற்றும் காம்ஜோங் மாவட்டங்களில் இந்த வன்முறை வெடித்தது.
காம்ஜோங் மாவட்டத்தின் நாகா பெரும்பான்மை பகுதியில் அமைந்துள்ள குக்கி ஆதிக்க கிராமமான சசாட்டில், 42 வயதான ஒரு பெண் கழுத்தில் துப்பாக்கிச் சூட்டுக்கு உள்ளாகி உயிரிழந்தார். இதைத் தொடர்ந்து இரு தரப்பு ஆயுதக் குழுக்களிடையே கடும் துப்பாக்கிச் சண்டை வெடித்தது.
இந்த மோதலில் 22 வயதான ஒரு இளைஞரும் பலியானார். மேலும் பத்து வீடுகள் தீக்கிரையாக்கப்பட்டன. உக்ருல் மாவட்டத்தில் செபு யாலேன் அருகே சந்தேகத்திற்குரிய போராளிகள் ஒரு வாகனத்தின் மீது துப்பாக்கிச் சூடு நடத்தியதில் 40 வயதான நபர் ஒருவர் உயிரிழந்தார். காம்ஜோங் பகுதியில் மேலும் இரண்டு நாகா இனத்தவர் சுட்டுக் கொல்லப்பட்டதாகவும் தகவல்கள் வெளியாகின.
இதையும் படிங்க: மீண்டும் பதற்றத்தில் மணிப்பூர்!! ஆயுதக் குழுக்களின் தாக்குதல்.. 4 பேர் பலி..!! பீதியில் உறைந்த மக்கள்!!
நிலைமை கட்டுக்குள் வராமல் போகும் அபாயம் இருந்ததால், மாவட்ட நிர்வாகம் பிஎன்எஸ்எஸ் சட்டப்பிரிவு 162-ன் கீழ் தடை உத்தரவு பிறப்பித்துள்ளது. இதன்படி ஐந்து அல்லது அதற்கு மேற்பட்டோர் ஒன்றுகூடுவது தடைசெய்யப்பட்டுள்ளது. போலீசார் மற்றும் பாதுகாப்புப் படையினர் பகுதியில் குவிக்கப்பட்டுள்ளனர்.
கடந்த 2023 மே மாதம் மெய்தி மற்றும் குக்கி சமூகங்களிடையே வெடித்த இனக் கலவரத்தில் 300-க்கும் மேற்பட்டோர் உயிரிழந்தனர். அதற்குப் பிறகு பல மாதங்கள் பதற்றம் நீடித்தது. 2025 பிப்ரவரியில் ஜனாதிபதி ஆட்சி அமல்படுத்தப்பட்டது. 2026 பிப்ரவரியில் அது திரும்பப் பெறப்பட்டு, யும்னம் கெம்சந்த் சிங் முதல்வராகப் பதவியேற்றார். எனினும், இந்த ஆண்டு பிப்ரவரி முதல் குக்கி-நாகா மோதல்கள் மீண்டும் தலைதூக்கியுள்ளன. இதில் 40-க்கும் மேற்பட்டோர் உயிரிழந்துள்ளனர். உக்ருல், காம்ஜோங், காங்போக்பி உள்ளிட்ட மாவட்டங்களில் வன்முறை அதிகரித்து வருகிறது.
அடுத்த ஆண்டு சட்டமன்றத் தேர்தல் நடைபெறவுள்ள நிலையில், 60 தொகுதிகளைக் கொண்ட மணிப்பூரில் பாஜக ஆட்சி நீடிக்கிறது. தொடரும் பதற்றம் பாதுகாப்பு குறித்த கவலைகளை அதிகரித்துள்ளது. அமைதிக்கான முயற்சிகள் தொடர்ந்தாலும், எல்லைப் பகுதிகளில் ஆயுதக் குழுக்களின் நடவடிக்கைகள் நிலைமையை மேலும் சிக்கலாக்குகின்றன.
இதையும் படிங்க: மீண்டும் பதற்றத்தில் மணிப்பூர்!! ஆயுதக் குழுக்களின் தாக்குதல்.. 4 பேர் பலி..!! பீதியில் உறைந்த மக்கள்!!