தமிழக வெற்றிக் கழகத்தின் (தவெக) இரண்டாவது மாநில மாநாடு மதுரை-தூத்துக்குடி தேசிய நெடுஞ்சாலையில் உள்ள பாரபத்தி கிராமத்தில் பிரம்மாண்டமாக நடைபெற்று நிறைவடைந்தது. கட்சித் தலைவர் நடிகர் விஜய் தலைமையில் நடந்த இந்த மாநாட்டில், தமிழகம் முழுவதும் இருந்து சுமார் 2.5 லட்சம் தொண்டர்கள் கலந்து கொண்டனர். 506 ஏக்கர் பரப்பளவில் நடைபெற்ற இந்நிகழ்ச்சியில், 250 ஏக்கர் மாநாட்டு மைதானமாகவும், 300 ஏக்கர் வாகன நிறுத்துமிடமாகவும் பயன்படுத்தப்பட்டது.

மாநாட்டிற்காக 216 மீட்டர் நீளமுள்ள மேடை, 300 மீட்டர் நடைமேடை, 200 உயர் மின்கோபுர விளக்குகள், 2 லட்சம் இருக்கைகள், 100க்கும் மேற்பட்ட கழிப்பறைகள் உள்ளிட்ட வசதிகள் ஏற்படுத்தப்பட்டன. தொண்டர்களுக்கு குடிநீர், பிஸ்கட், குளுக்கோஸ் உள்ளிட்ட ஸ்நாக்ஸ் வழங்கப்பட்டன. மருத்துவ உதவிக்காக 400 மருத்துவர்கள் மற்றும் ட்ரோன் மூலம் அவசர பொருட்கள் விநியோகிக்கப்பட்டன.

இதையும் படிங்க: நாளை தவெக மாநாடு.. தனியார் பள்ளி, கல்லூரிகளுக்கு விடுமுறை.. குஷியில் மாணவர்கள்..!!

விஜய்யின் 35 நிமிட உரையில், 2026 சட்டமன்றத் தேர்தலில் திமுகவுடன் போட்டி, பாஜகவை எதிர்ப்பது, கச்சத்தீவு மீட்பு, நீட் தேர்வு ரத்து உள்ளிட்டவை குறித்து அவர் வலியுறுத்தினார். “சிங்கம் தனியாகவும் வந்து தண்ணி காட்டும்” என்று உருக்கமாகப் பேசி, ஊழல் ஆட்சியை வீழ்த்துவோம் என அறிவித்தார். மாநாட்டில் 6 முக்கிய தீர்மானங்கள் நிறைவேற்றப்பட்டன, இதில் தேர்தல் ஆணைய மாற்றங்களுக்கு எதிர்ப்பு, மீனவர் பிரச்சினைகள் உள்ளிட்டவை அடங்கும். முதல் மாநாட்டில் ஏற்பட்ட சிரமங்களைத் தவிர்க்க, இம்முறை கூடுதல் வசதிகள் செய்யப்பட்டன. இருப்பினும், கூட்ட நெரிசலில் 10 பேர் மயக்கமடைந்தனர். 

லட்சக்கணக்கான தொண்டர்கள் மற்றும் ஆதரவாளர்கள் கலந்துகொண்ட இந்நிகழ்வு, மதுரை-தூத்துக்குடி தேசிய நெடுஞ்சாலையில் கடுமையான போக்குவரத்து நெரிசலை ஏற்படுத்தியது. மாநாட்டிற்காக மாநிலத்தின் பல்வேறு பகுதிகளிலிருந்து வந்த பேருந்துகள், கார்கள் மற்றும் இருசக்கர வாகனங்கள் பாரபத்தி பகுதியை நோக்கி அணிவகுத்ததால், சாலைகளில் நீண்ட வாகன வரிசைகள் உருவாகின. காலை முதல் மாலை வரை நீடித்த மாநாட்டில், தவெக தலைவர் விஜய் உரையாற்றினார். இதனால், மதுரை மற்றும் சுற்றுவட்டார பகுதிகளிலிருந்து ஏராளமானோர் குவிந்தனர். 

பாரபத்தி, மதுரையிலிருந்து 30 கிமீ தொலைவில் உள்ளதால், வாகனங்கள் வலையங்குளம் வழியாக செல்ல முயன்றபோது, போலீசார் மாற்று வழிகளை அறிவித்தனர். இருப்பினும், போதிய முன்னேற்பாடுகள் இல்லாததால், நெரிசல் கட்டுக்கடங்காமல் அதிகரித்தது. இதனால், அவசர பயணிகள், மாணவர்கள் மற்றும் அலுவலக பணியாளர்கள் கடும் அவதிக்கு உள்ளாகினர். எலியார்பத்தி சாலையில் வாகனங்கள் நத்தை போல ஊர்ந்து சென்றன.

மதுரை காவல்துறை, போக்குவரத்தை ஒழுங்குபடுத்த கூடுதல் பணியாளர்களை நியமித்திருந்தாலும், வாகன நெரிசல் மாலை 6 மணி வரை நீடித்தது. சில இடங்களில் பயணிகள் மணிக்கணக்கில் சாலையில் காத்திருக்க வேண்டிய நிலை ஏற்பட்டது. உள்ளூர் வணிகர்கள் மற்றும் பொதுமக்கள் இந்த நெரிசல் குறித்து அதிருப்தி தெரிவித்தனர். 

மாநாட்டிற்கு அரசியல் முக்கியத்துவம் இருந்தாலும், போக்குவரத்து மேலாண்மையில் ஏற்பட்ட குறைபாடுகள் பலரை ஏமாற்றமடையச் செய்தன. எதிர்காலத்தில் இதுபோன்ற நிகழ்வுகளுக்கு முன்கூட்டிய திட்டமிடல் மற்றும் மாற்று வழித்தடங்கள் குறித்து தெளிவான அறிவிப்புகள் தேவை என பொதுமக்கள் கோரிக்கை விடுத்துள்ளனர்.  
 

இதையும் படிங்க: தவெக-வின் 2வது மாநாடு: குடிநீருக்காக தவிக்க வேண்டாம்.. விஜய் படத்துடன் 5 லட்சம் வாட்டர் பாட்டில்கள் தயார்..!!