தமிழக வெற்றிக் கழகத்தை விஜய் ஆரம்பித்ததில் இருந்தே சர்ச்சைகளுக்கு பஞ்சமில்லாமல் சென்று கொண்டிருக்கிறது. முதலில் சொந்த கட்சியான தவெகவை அதன் முக்கிய நிர்வாகிகளே கழுவி, கழுவி ஊற்றும் ஆடியோக்கள் அடுத்தடுத்து வெளியாகின. அடுத்ததாக பணம் கொடுத்தால் தான் பதவி கொடுக்கிறார்கள், ரசிகர் மன்றத்தில் இருந்து உழைத்த நிர்வாகிகளுக்கு மதிப்பு இல்லை என மாவட்டந்தோறும் தவெகவினர் போர்க்கொடி தூக்க ஆரம்பித்தார். அதற்கு அடுத்தப்படியாக தவெகவில் சுதந்திரமாக செயல்பட முடியவில்லை, பொதுச்செயலாளர் ஆனந்த் தன்னைத் தவிர வேறு யாரும் பிரபலமடையக்கூடாது என கட்டுப்பாடு விதிக்கிறார் என குற்றச்சாட்டு எழுந்தது. தற்போது தமிழக வெற்றிக் கழகத்தில் இருந்து ஒவ்வொரு நிர்வாகிகளும் மாற்றுக் கட்சிக்கு தாவி வருகின்றனர். 

இவ்வளவு பிரச்சனைக்கு நடுவில் ஆதவ் அர்ஜூனா விஜய்க்கு புது தலைவலியை கொடுத்துள்ளார். மாமல்லபுரம் அருகே உள்ள தனியார் விடுதியில் தமிழக வெற்றிக் கழகத் தலைவர் விஜய் கல்வி விருது வழங்கும் விழா நடைபெற்றது. இந்த விழா ஏற்பாடுகள் குறித்து பார்வையிட, ஆனந்த், ஆதவ் அர்ஜுனா உள்ளிட்ட நிர்வாகிகள் சென்றுள்ளனர். அப்போது ஆதவ் அர்ஜுனா, ஆனந்திடம் பாஜகவே அதிமுகவை கூட்டணியில் இருந்து விலக்கிவிடும் என்றும், எடப்பாடி பழனிசாமியை நம்பி யாரும் கூட்டணி வைக்க முன்வரவில்லை என்றெல்லாம் சிரித்த படி பேசுகிறார். தற்போது சோசியல் மீடியாவில் வைரலாகி வரும் இந்த வீடியோ தமிழக வெற்றிக் கழகத்திற்கு புது சிக்கலாக மாறியுள்ளது. 

ஏனெனில் அந்த வீடியோவில் ஆதவ் அர்ஜுனா எடப்பாடி பழனிசாமி, அண்ணாமலை ஆகியோரை ஒருமையில் விளாசியிருக்கிறார். தங்களது மரியாதைக்குரிய தலைவரை அவதூறாக பேசியதால் ஆதவ் அர்ஜுனா மீது பாஜக மற்றும் அதிமுக தொண்டர்கள் கடும் கோபத்தில் உள்ளனர். எப்படியாவது தமிழக வெற்றிக் கழகத்தை தேசிய ஜனநாயக கூட்டணிக்குள் கொண்டு வந்துவிட வேண்டும் என எடப்பாடி பழனிசாமி தான் இறங்கி வேலை செய்து வந்தார். ஆனால் அவரையே ஒருமையில் பேசி ஆதவ் அவமதித்திருப்பது, வர உள்ள சட்ட மன்ற தேர்தலில் எங்கே தவெக தனித்து விடப்படுமோ? என்ற அச்சத்தை அக்கட்சியினருக்கு ஏற்படுத்தியுள்ளது. 

இதையும் படிங்க: மேலும் ஒரு கட்சி நிர்வாகி அவுட்... தவெகவில் தொடரும் கட்சி தாவல்!!

இதையும் படிங்க: கூட்டணிக்கு வந்தால் துணை முதல்வர் ஆக்குகிறேனு அழைத்தவரே அவர் தான்.. சீமான் பகீர் தகவல்!!