புதுச்சேரி: தமிழக சட்டசபைத் தேர்தலில் 47 தொகுதிகளில் வெற்றி பெற்ற அ.தி.மு.க. எம்.எல்.ஏ.க்கள், புதுச்சேரியில் உள்ள சொகுசு ரிசார்ட்டில் தங்க வைக்கப்பட்டுள்ள நிலையில், “யாருடனாவது கூட்டணி அமைத்து அமைச்சராகப் போகிறோம்” என்ற உற்சாகத்தில் இருப்பதாக தகவல்கள் வெளியாகியுள்ளன.

ரிசார்ட்டில் தங்கியுள்ள சில அ.தி.மு.க. எம்.எல்.ஏ.க்கள் தெரிவித்தபடி, “தேர்தலில் வெற்றி பெற்றும் எதிர்க்கட்சி அந்தஸ்தை இழந்துவிட்டோம். இதனால் கட்சிக்குள் உட்கட்சி பிரச்னை தலையெடுக்கத் தொடங்கியது. இதைத் தடுக்க பொதுச் செயலர் எடப்பாடி பழனிசாமி எங்களை புதுச்சேரி ரிசார்ட்டுக்கு அழைத்து வந்து தங்க வைத்துள்ளார்” என்றனர்.

முன்னாள் அமைச்சர்கள் உட்பட 35 எம்.எல்.ஏ.க்கள் இங்கு பத்திரமாகத் தங்க வைக்கப்பட்டுள்ளனர். மூன்று வேளை உணவு, நினைத்த நேரத்தில் ஓய்வு, குளியல் என வெயிலுக்கு இதமான சொகுசான சூழலில் அவர்கள் இருப்பதாகக் கூறப்படுகிறது. லீமா ரோஸ் உட்பட ஐந்து பெண் எம்.எல்.ஏ.க்கள் தனியாக தங்க வைக்கப்பட்டுள்ளனர்.

இதையும் படிங்க: உதயநிதி ஸ்டாலின் வீட்டுக்கு அதிகரிக்கும் பாதுகாப்பு!! திமுக + அதிமுக கூட்டணி ஆட்சியா? அதிகரிக்கும் பதற்றம்!

எம்.எல்.ஏ.க்கள் மேலும் கூறியதாவது, “த.வெ.க.வுடன் கூட்டணி வைத்து ஆட்சி அமைக்க பழனிசாமி முடிவு செய்துள்ளார். ஆனால் தி.மு.க. ஆதரவுடன் காங்கிரஸ், வி.சி.க., கம்யூனிஸ்ட் கட்சிகளுடன் விஜய் பேச்சு நடத்தி வருகிறார். அவர்கள் நேரத்தை இழுத்தடித்து வருவதால், அ.தி.மு.க.வுக்கு வாய்ப்பு உள்ளது. உதயநிதி ஸ்டாலின் விஜய் முதல்வராவதை ஏற்றுக்கொள்ளாத நிலையில், தி.மு.க. ஆதரவில் அ.தி.மு.க. ஆட்சி அமைக்கும் சாத்தியமும் இருக்கிறது” என்றனர்.

எந்தக் கூட்டணியில் ஆட்சி அமைக்கப்பட்டாலும், ரிசார்ட்டில் உள்ள பல எம்.எல்.ஏ.க்களுக்கு அமைச்சர் பதவி கிடைக்கும் வாய்ப்பு உள்ளதாக உறுதி அளிக்கப்பட்டுள்ளது. அமைச்சர் பதவி கிடைக்காதவர்களுக்கு வாரியத் தலைவர் உள்ளிட்ட பதவிகள் வழங்கப்படும் எனக் கூறப்பட்டுள்ளது. மேலும், தேர்தல் செலவுகளை ஈடுகட்டும் வகையில் ‘கவனிப்பு’ செய்யப்படும் எனவும் உறுதியளிக்கப்பட்டுள்ளதால், எம்.எல்.ஏ.க்கள் இப்போது இலாகா பங்கீடு கணக்கு போட்டு உற்சாகமாக உள்ளனர்.

தமிழக அரசியல் தற்போது பல திருப்பங்களைச் சந்தித்து வரும் நிலையில், அ.தி.மு.க. எம்.எல்.ஏ.க்களின் ரிசார்ட் தங்கல் மற்றும் அவர்களின் எதிர்பார்ப்புகள் பெரும் பரபரப்பை ஏற்படுத்தியுள்ளன. அடுத்த சில நாட்களில் ஆட்சி அமைப்பு தொடர்பான தெளிவான முடிவு வரும் என எதிர்பார்க்கப்படுகிறது. 

இதையும் படிங்க: தமிழக அமைச்சரவையில் இனி ஓங்கி ஒலிக்கும் பெண் சக்தி!! 23 பெண் எம்.எல்.ஏ-க்கள் தேர்வு!