சுதந்திர தினமான இன்று தங்களது அதிகாரப்பூர்வ இன்ஸ்டாகிராம் கணக்கு சில மணி நேரம் முடக்கப்பட்டதாகவும், பின்னர் மீண்டும் செயல்பாட்டுக்கு வந்துள்ளதாகவும் கரப்பான்பூச்சி ஜனதா கட்சி (சிஜேபி) தெரிவித்துள்ளது. சுதந்திர தினத்தன்று கணக்கு முடக்கப்பட்ட சம்பவம் தங்களது குரலை ஒடுக்கும் முயற்சி என அந்தக் கட்சி குற்றம்சாட்டியுள்ளது.

இதுதொடர்பாக சிஜேபி வெளியிட்டுள்ள பதிவில், தங்களை எதிர்ப்பவர்கள் கட்சியின் குரலை ஒடுக்க முயற்சிப்பதாக தெரிவித்துள்ளது. இந்தியாவின் சுதந்திர தினமான ஆகஸ்ட் 15ஆம் தேதி அதிகாரப்பூர்வ சமூக வலைதளக் கணக்கு முடக்கப்பட்டிருப்பது கண்டிக்கத்தக்கது என்றும், இதுபோன்ற நடவடிக்கைகளால் தாங்கள் அஞ்சப்போவதில்லை என்றும் கட்சி கூறியுள்ளது.

சிஜேபி நிறுவனர் அபிஜீத் திப்கேவும் இதுகுறித்து கருத்து தெரிவித்துள்ளார். கட்சியின் அதிகாரப்பூர்வ இன்ஸ்டாகிராம் பக்கம் முடக்கப்பட்டுள்ளதாகக் குறிப்பிட்ட அவர், இந்த நடவடிக்கையை கடுமையாக விமர்சித்துள்ளார்.

இதையும் படிங்க: ஜந்தர் மந்தர் சீசன் 2 விரைவில்! CJP தலைவர் அபிஜித் தீப்கே அறிவிப்பு!

இதற்கிடையே, முடக்கப்பட்டதாக கூறப்பட்ட இன்ஸ்டாகிராம் கணக்கு பின்னர் மீண்டும் செயல்பாட்டுக்கு வந்ததாக சிஜேபி தெரிவித்துள்ளது. இருப்பினும், கணக்கு ஏன் முடக்கப்பட்டது என்பது குறித்து இன்ஸ்டாகிராம் தரப்பில் அதிகாரப்பூர்வ விளக்கம் ஏதேனும் வெளியிடப்பட்டதா என்பது குறித்த தகவல் வெளியாகவில்லை.

சமீப வாரங்களில் பல்வேறு சமூக மற்றும் அரசியல் விவகாரங்களை முன்வைத்து சிஜேபி பிரசாரங்களை மேற்கொண்டு வந்ததாக அந்தக் கட்சி தெரிவித்துள்ளது. குறிப்பாக வேலையின்மை, கல்வி மற்றும் இளைஞர்கள் எதிர்கொள்ளும் பிரச்சினைகள் குறித்து கேள்விகளை எழுப்பி பிரசாரம் மேற்கொள்ளப்பட்டதாக கூறப்படுகிறது.

பிரதமர் நரேந்திர மோடி தனது சுதந்திர தின உரையில் நாட்டின் இளைஞர்களை சந்தித்து அவர்களது பிரச்சினைகள் குறித்து பேச வேண்டும் என்ற கோரிக்கையையும் கட்சி முன்வைத்திருந்ததாக தெரிவிக்கப்பட்டுள்ளது.

மேலும், அரசு மற்றும் கிராமப்புற பள்ளிகளின் நிலை குறித்து விழிப்புணர்வு ஏற்படுத்தும் பிரசாரங்கள், மாணவர்கள் எதிர்கொள்ளும் பிரச்சினைகள் மற்றும் கல்வி தொடர்பான விவகாரங்களை முன்வைத்து போராட்டங்கள் உள்ளிட்ட நடவடிக்கைகளையும் சிஜேபி மேற்கொண்டு வந்ததாக கூறியுள்ளது.

இந்தச் சூழலில் சுதந்திர தினத்தன்று அதிகாரப்பூர்வ இன்ஸ்டாகிராம் கணக்கு முடக்கப்பட்டு, பின்னர் மீண்டும் செயல்பாட்டுக்கு வந்ததாக கட்சி தெரிவித்திருப்பது சமூக வலைதளங்களில் விவாதத்தை ஏற்படுத்தியுள்ளது. கணக்கு முடக்கப்பட்டதற்கான உண்மையான காரணம் என்ன என்பது குறித்து தெளிவான தகவல் வெளியாகாத நிலையில், சிஜேபியின் குற்றச்சாட்டு தொடர்ந்து கவனம் பெற்றுள்ளது.

இதையும் படிங்க: "போராட்டக்காரர்களுக்கு சட்டக் கவசமாக ரூ.1 கோடி நிதி..! CJP கட்சிக்கு வழங்கிய கபில் சிபல்..!!