வடகிழக்கு பருவமழையை எதிர்கொள்ள தமிழக அரசு தயாராகி வரும் நிலையில், மழைக்கால முன்னெச்சரிக்கை நடவடிக்கைகள் குறித்து முதலமைச்சர் விஜய் இன்று முக்கிய ஆலோசனை நடத்துகிறார்.

சென்னை தலைமைச் செயலகத்தில் இன்று மதியம் 12 மணியளவில் நடைபெறும் இந்தக் கூட்டத்தில் அமைச்சர்கள் மற்றும் பல்வேறு துறைகளைச் சேர்ந்த உயர் அதிகாரிகள் பங்கேற்கின்றனர். பருவமழையால் ஏற்படக்கூடிய பாதிப்புகளை முன்கூட்டியே தடுப்பது, மழைநீர் தேங்கும் பகுதிகளை கண்டறிந்து நடவடிக்கை எடுப்பது உள்ளிட்ட அம்சங்கள் குறித்து ஆலோசிக்கப்பட உள்ளன.

குறிப்பாக, நீர்நிலைகளில் மேற்கொள்ளப்பட்டுள்ள தூர்வாரும் பணிகள், நீர்வழிப் பாதைகளில் உள்ள ஆக்கிரமிப்புகளை அகற்றும் நடவடிக்கைகள் மற்றும் மழைநீர் வடிகால் கட்டமைப்புகளின் தற்போதைய நிலை குறித்து அதிகாரிகளிடம் முதலமைச்சர் விஜய் கேட்டறிய உள்ளதாகத் தெரிவிக்கப்படுகிறது.

இதையும் படிங்க: 40 ஆண்டுகளில் இல்லாத அளவுக்கு எல் நினோ தீவிரம்? இந்தியாவுக்கு காத்திருக்கும் மிகப்பெரிய ஆபத்து!

வடகிழக்கு பருவமழையின் தாக்கம் அதிகமாக இருக்கும் என எதிர்பார்க்கப்படும் கடலோர மற்றும் வட உள் மாவட்டங்களில் மேற்கொள்ளப்பட்டுள்ள முன்னெச்சரிக்கை ஏற்பாடுகளும் இந்தக் கூட்டத்தில் முக்கியமாக எடுத்துக்கொள்ளப்பட உள்ளன.

சென்னை, திருவள்ளூர், காஞ்சிபுரம், செங்கல்பட்டு, வேலூர், ராணிப்பேட்டை, திருப்பத்தூர், கிருஷ்ணகிரி, விழுப்புரம், கடலூர், மயிலாடுதுறை, நாகப்பட்டினம், திருவாரூர், தஞ்சாவூர், புதுக்கோட்டை, ராமநாதபுரம் உள்ளிட்ட மாவட்டங்களில் மழைக்கால பணிகள் எந்த அளவுக்கு தயாராக உள்ளன என்பது குறித்து சம்பந்தப்பட்ட அதிகாரிகள் விளக்கம் அளிக்க உள்ளனர்.

மேலும், வங்கக்கடலில் உருவாகக்கூடிய காற்றழுத்தத் தாழ்வு பகுதிகள் மற்றும் புயல்களை எதிர்கொள்வதற்கான தயார் நிலை குறித்தும் ஆலோசிக்கப்பட உள்ளது. புயல் மற்றும் கனமழை நேரங்களில் பொதுமக்களை பாதுகாப்பாக தங்க வைப்பதற்காக அடையாளம் காணப்பட்டுள்ள நிவாரண முகாம்கள், அவர்களுக்குத் தேவையான உணவு, குடிநீர், மின்சாரம் உள்ளிட்ட அத்தியாவசிய வசதிகள் தடையின்றி கிடைப்பதற்கான ஏற்பாடுகள் குறித்தும் அதிகாரிகளிடம் முதலமைச்சர் கேட்டறிய உள்ளார்.

இதனிடையே, டெல்டா மாவட்டங்களின் வேளாண் பணிகளும் இந்த ஆலோசனையில் முக்கிய இடம் பெறுகின்றன. காவிரி நீரை எதிர்பார்த்திருந்த நிலையில் குறுவை சாகுபடி தாமதமாக தொடங்கியதாகக் கூறப்படும் சூழலில், தற்போது வடகிழக்கு பருவமழை தொடங்க உள்ளதால் பயிர்களுக்கு ஏற்படக்கூடிய பாதிப்புகள் குறித்தும் ஆலோசிக்கப்பட உள்ளது.

கனமழையால் குறுவை சாகுபடி பாதிக்கப்பட்டால் விவசாயிகளுக்கு ஏற்படக்கூடிய இழப்புகளை எவ்வாறு ஈடுசெய்வது, தேவையான நிவாரண உதவிகளை வழங்குவது உள்ளிட்ட நடவடிக்கைகள் குறித்தும் கூட்டத்தில் விரிவாக விவாதிக்கப்பட உள்ளதாகத் தெரிகிறது.

பருவமழை தொடங்குவதற்கு முன்பாகவே அனைத்து துறைகளும் ஒருங்கிணைந்து செயல்பட வேண்டியதன் அவசியம் குறித்தும், பாதிப்பு ஏற்படக்கூடிய பகுதிகளில் உடனடி நடவடிக்கைகளை மேற்கொள்ள வேண்டியது குறித்தும் முதலமைச்சர் விஜய் அதிகாரிகளுக்கு அறிவுறுத்த உள்ளதாக எதிர்பார்க்கப்படுகிறது.

இதையும் படிங்க: காலை உணவு திட்ட விரிவாக்கம்: செப்.22ல் தொடங்கி வைக்கும் முதல்வர் விஜய்..!! தவெக அரசின் அடுத்த மூவ்..!!