தமிழ்த் திரையுலகின் பிரபல இசையமைப்பாளரும், ‘தேனிசைத் தென்றல்’ என்று அன்போடு அழைக்கப்பட்டவருமான தேவா இன்று காலை சென்னையில் காலமானார். அவருக்கு வயது 75. நெஞ்சுவலி காரணமாக இன்று காலையில் சென்னை கோடம்பாக்கம் பகுதியில் உள்ள தனியார் மருத்துவமனையில் அனுமதிக்கப்பட்ட அவர், சிகிச்சை பலனின்றி மாரடைப்பால் உயிரிழந்தார். இந்தச் செய்தி திரையுலகினரையும் இசை ரசிகர்களையும் பெரும் அதிர்ச்சிக்குள்ளாக்கியுள்ளது.

தேவநேசன் சொக்கலிங்கம் என்ற இயற்பெயர் கொண்ட தேவா, 1950ஆம் ஆண்டு நவம்பர் 20ஆம் தேதி சென்னை மைலாப்பூரில் பிறந்தார். தமிழ், தெலுங்கு, மலையாளம், கன்னடம் ஆகிய மொழிகளில் 400க்கும் மேற்பட்ட திரைப்படங்களுக்கு இசையமைத்த அவர், கானா பாடல்களைத் திரையிசையில் பிரபலப்படுத்தியதில் முன்னோடியாகத் திகழ்ந்தார். அண்ணாமலை, பாஷா உள்ளிட்ட ரஜினிகாந்த் படங்களுக்கான இசை மற்றும் பின்னணி இசை இன்றும் ரசிகர்களின் நினைவில் நிற்கிறது.

அவரது மகன் ஸ்ரீகாந்த் தேவாவும் இசையமைப்பாளராகத் திரையுலகில் தொடர்ந்து பணியாற்றி வருகிறார்.தேவாவின் உடல் அவரது இல்லத்தில் வைக்கப்பட்டுள்ள நிலையில், திமுக தலைவர் மு.க.ஸ்டாலின், எதிர்க்கட்சித் தலைவர் உதயநிதி ஸ்டாலின், நாடாளுமன்ற உறுப்பினர் திருச்சி சிவா, தயாநிதி மாறன் உள்ளிட்ட தலைவர்கள் நேரில் சென்று அஞ்சலி செலுத்தினர்.

இதையும் படிங்க: காற்றில் கரைந்த தேனிசை..! ஈடு செய்ய முடியா பேரிழப்பு..! இசையமைப்பாளர் தேவா மறைவுக்கு ஆளுநர் அர்லேகர் இரங்கல்..!

குடும்பத்தினருக்கு ஆறுதல் கூறிய அவர்கள், தேவாவின் இசைப் பங்களிப்பைப் போற்றினர். ஸ்டாலின் தனது இரங்கல் செய்தியில், தேவா பொறாமை, வஞ்சகம் ஏதுமறியாத வெள்ளை மனம் கொண்டவர் என்றும், கானா என்றாலே தேவாதான் என அறியப்பட்டவர் என்றும் குறிப்பிட்டார். அவரது மெல்லிசைத் தென்றல் என்றும் வீசுமென அவர் கூறினார்.திரையுலக பிரபலங்கள் மற்றும் பொதுமக்கள் தொடர்ந்து அஞ்சலி செலுத்தி வருகின்றனர். தேவாவின் மறைவு தமிழ் இசை உலகிற்கு பெரும் இழப்பாக அமைந்துள்ளது.

இதையும் படிங்க: இசை ரசிகர்களுக்கு பேரிழப்பு..! வரலாறு மறக்குமா..? இசையமைப்பாளர் தேவா மறைவு.. முதல்வர் விஜய் இரங்கல்.!!