திமுகவில் கட்சி அமைப்பை புத்துயிருடன் மாற்றும் நோக்கில் இன்று சென்னை அண்ணா அறிவாலயத்தில் நடைபெற்ற செயற்குழுக் கூட்டத்தில் பல முக்கியத் தீர்மானங்கள் நிறைவேற்றப்பட்டுள்ளன. இளைஞர்களுக்கு வாய்ப்பு அளித்து கட்சியில் புதிய இரத்தம் பாய்ச்சும் வகையில் பல்வேறு பதவிகளுக்கு உச்ச வயது வரம்பு நிர்ணயிக்கப்பட்டுள்ளது. அதில் மிக முக்கியமான ஒன்று மாவட்டக் கழகச் செயலாளர்களுக்கான அதிகபட்ச வயது 70 என நிர்ணயிக்கப்பட்டது. இதனால் தற்போது மாவட்டச் செயலாளர் பொறுப்பில் உள்ளவர்களில் 70 வயதைக் கடந்த 13 பேர் அந்தப் பொறுப்பிலிருந்து விடுவிக்கப்பட உள்ளனர்.

கடந்த சட்டமன்றத் தேர்தலில் கட்சி எதிர்கொண்ட சவால்களை ஆராய்ந்து, அமைப்பு ரீதியான மாற்றங்கள் அவசியம் என்ற முடிவுக்கு வந்த தலைமை, மாவட்டச் செயலாளர்களின் எண்ணிக்கையை 78-இலிருந்து 110 ஆக உயர்த்தவும் தீர்மானித்துள்ளது. இரண்டு சட்டமன்றத் தொகுதிகளுக்கு ஒரு மாவட்டச் செயலாளர் என்ற அடிப்படையில் இந்த மறுசீரமைப்பு மேற்கொள்ளப்படும். மேலும் ஒருவர் அதிகபட்சம் இரண்டு முறை மட்டுமே மாவட்டச் செயலாளர் பதவியை வகிக்க முடியும் என்ற விதியும் கொண்டு வரப்பட்டுள்ளது.

மாநகரச் செயலாளர் பதவி இனி இருக்காது என்றும் அறிவிக்கப்பட்டுள்ளது.இந்த வயது வரம்பு காரணமாக பொறுப்பிலிருந்து விடுவிக்கப்பட உள்ளவர்கள் கட்சியின் மூத்த தலைவர்களாகவும், பல ஆண்டுகளாக மாவட்ட அளவில் செல்வாக்கு செலுத்தி வந்தவர்களாகவும் உள்ளனர்.

இதையும் படிங்க: DMK-வில் அதிரடி மாற்றம்..! 70 வயதுக்கு மேல் மாவட்டச் செயலாளர் பதவி இல்லை.! ஸ்டாலின் போட்ட அதிரடி விதி..!!

அவர்களில் திருவண்ணாமலை மாவட்டச் செயலாளர் எ.வ.வேலு, விழுப்புரம் வடக்கு மாவட்டச் செயலாளர் செஞ்சி மஸ்தான், விருதுநகர் மாவட்டச் செயலாளர் கே.கே.எஸ்.எஸ்.ஆர். ராமச்சந்திரன், தூத்துக்குடி தெற்கு மாவட்டச் செயலாளர் அனிதா ராதாகிருஷ்ணன், ராணிப்பேட்டை மாவட்டச் செயலாளர் ஆர்.காந்தி, ஈரோடு தெற்கு மாவட்டச் செயலாளர் முத்துசாமி, தஞ்சாவூர் வடக்கு மாவட்டச் செயலாளர் சாக்கோட்டை அன்பழகன், புதுக்கோட்டை தெற்கு மாவட்டச் செயலாளர் ரகுபதி, காஞ்சிபுரம் தெற்கு மாவட்டச் செயலாளர் சுந்தர், சேலம் கிழக்கு மாவட்டச் செயலாளர் எஸ்.ஆர்.சிவலிங்கம், மதுரை மாநகர் மாவட்டச் செயலாளர் தளபதி, தேனி தெற்கு மாவட்டச் செயலாளர் ராமகிருஷ்ணன், திருநெல்வேலி மேற்கு மாவட்டச் செயலாளர் ஆவுடையப்பன் ஆகியோர் அடங்குவர்.

இதையும் படிங்க: செக் வைத்த மு.க.ஸ்டாலின்! திமுகவில் வயது உச்சவரம்பு தீர்மானம்!! பதவி பறிபோகும் சீனியர்கள் யார்? யார்? முழு விவரம்!