பிரதமர் நரேந்திர மோடியின் பிறந்த நாளை முன்னிட்டு திருப்பூரில் பாஜக சார்பில் மக்களுக்கான சேவை இயக்கம் நடைபெற்றது. இதில், திருப்பூர் மாவட்டத்திற்கு பிரதமர் மோடி வழங்கிய திட்டங்களை ரங்கோலியாக வரைந்திருந்தனர். இந்த நிகழ்ச்சியில்
பாஜகவின் ஆந்திர மாநில இணைப் பொறுப்பாளர் வானதி ஸ்ரீனிவாசன் சிறப்பு விருந்தினராக பங்கேற்றார்.

பின்னர் செய்தியாளர்களிடம் பேசுகையில், பிரதமர் மோடியின் பிறந்த நாளை முன்னிட்டு ஒரு மாத காலத்தில் நாடு முழுவதும் மக்களுக்கான சேவை இயக்கம் நடைபெற்று வருகிறது. திருப்பூர் மாவட்டத்திற்கு மட்டும் கடந்த 12 ஆண்டுகளில் ரூ.4,900 கோடி நிதியை பிரதமர் மோடி தலைமையிலான மத்திய அரசு ஒதுக்கியுள்ளது. இஎஸ்ஐ மருத்துவமனை, சாலைகள், ரயில் நிலையம், அரசு மருத்துவக் கல்லூரி, ஸ்மார்ட் சிட்டி என பல திட்டங்களை மத்திய அரசு செயல்படுத்தியுள்ளது.

இந்தியா 2047 ஆம் ஆண்டில் வளர்ந்த நாடாக மாற வேண்டும் என்கிற கனவில் பயணிக்க வேண்டும். திருப்பூர் மாவட்டம் அன்னிய செலாவணியை கொண்டு வந்து குவிக்கும் மாவட்டம் என்பதால், ஜவுளி உற்பத்திக்கு உதவும் வகையில் பருத்தி இறக்குமதிக்கு வரியை நீக்கியிருப்பது உள்ளிட்ட பல்வேறு உதவிகளை பிரதமர் மோடி செய்துள்ளார்.

இதையும் படிங்க: சட்டம் ஒழுங்கு சந்தி சிரிக்குது CM..! உயிரை கையில் பிடித்துக் கொண்டிருக்கும் அவலம்.. வானதி சீனிவாசன் தாக்கு..!!

திருப்பூரில் ஒரு தொகுதிக்கு இடைத்தேர்தல் வந்துள்ளது. தொகுதிக்கே வராமல் வென்ற ஒரு கட்சி, ஒரு முதலமைச்சர் கிராமம் கிராமமாக மக்களை சந்திக்க வேண்டிய சூழலுக்கு தள்ளப்படும் அளவிற்கு 4 மாத ஆட்சி பயத்தை ஏற்படுத்தியுள்ளது. மின் வெட்டு திருப்பூர், கோவை மாவட்டங்களை கடுமையாக பாதித்துள்ளது.

தொழில்கள் கடுமையாக பாதிக்கப்பட்டுள்ளன. ஆரம்பத்தில் ரீல்ஸ் பார்த்து மக்கள் ஆர்வத்தில் ஓட்டு போட்டுவிட்டனர். இன்று மின் தடை ஏற்படும்போதெல்லாம் ரீல்ஸ் பார்த்து எப்படி மின் வெட்டை சரி செய்வது என பார்க்கின்றனர். ரீல்ஸ் பார்த்து பெண்கள் சுந்தரமாக நடமாட முடியும் என நம்பி ஓட்டு போட்டும் எதுவும் மாறவில்லை.

சட்டம் ஒழுங்கு மோசமாக உள்ளது. மத்திய அரசின் திட்டங்களை வேகமாக கொண்டு வர மாநில அரசு எந்த முயற்சியும் செய்யவில்லை. தாங்களாகவே இந்த மாநிலத்தின் வளர்ச்சிக்கு சாதிப்பார்கள் என பார்த்தால் அதுவும் இல்லை. கடந்த மூன்று மாத காலமாக நமது வரி வசூல் வீதம் குறைந்து கொண்டே வருகிறது. வளர்ச்சி அடைந்த மாநிலத்தின் வரி வசூல் குறைவதில் மாநில அரசு கவனம் செலுத்த வேண்டும்.

தமிழகத்திற்கு வர வேண்டிய நிறைய முதலீடுகள் வேறு மாநிலங்களுக்கு சென்று கொண்டிருக்கின்றன. தமிழகத்திற்கு நீண்ட காலத்திற்கு இது மிகப்பெரிய பாதிப்பை ஏற்படுத்தும். மக்களிடம் நல்ல பேசி கைத்தட்டல் வாங்க வேண்டும் என்று பார்க்காமல், மாநிலத்தின் வளர்ச்சிக்கு எது வேண்டும் என சிந்தித்து செயல்பட வேண்டும்.

இரண்டு தொகுதி இடைத்தேர்தல் வெற்றி என்பது எந்த மாற்றத்தையும் கொண்டு வரப்போவதில்லை. ஆனால் தங்களை தூய சக்தி என்றும், மாற்றத்திற்கான தூதுவர்கள் என்றும் பேசிக்கொண்டிருக்கும் ஒரு கட்சி என்னவெல்லாம் செய்து கொண்டிருக்கிறது என்பதற்கு இந்த இடைத்தேர்தல் பதில் கொடுக்கலாம்.

இப்போது நடிகர்கள் கட்சி தொடங்குவது பேஷன் ஆகிவிட்டது. எல்லா நடிகர்களும் வெற்றி பெறுவதில்லை. நானே ஒரு நடிகரை எதிர்த்து தான் வெற்றி பெற்றேன். அதற்கு ஒரு சூழல், அர்ப்பணிப்பு, அதிர்ஷ்டம் தேவைப்படுகிறது. மக்களுக்கு நல்லது செய்ய வேண்டும் என நினைப்பவர்கள் யார் வேண்டுமானாலும் அரசியலுக்கு வரலாம் என்றார்.

இதையும் படிங்க: கனிம வளத்தை சுரண்டி கோடிக்கணக்கில் அபராதம்..! இதான் தூய ஆட்சியா விஜய்.? விளாசிய வானதி சீனிவாசன்.!