ஈரான் - அமெரிக்கா இடையிலான மோதல் நீடித்து வரும் நிலையில், இரு நாடுகளுக்கும் இடையே வார்த்தைப் போர் மட்டுமின்றி, சமூக வலைதளங்களிலும் ‘மேப் போர்’ தொடங்கியுள்ளது. அமெரிக்க அதிபர் டொனால்ட் டிரம்ப் வெளியிட்ட சர்ச்சைக்குரிய வரைபடத்துக்கு பதிலடியாக, ஈரான் தற்போது அமெரிக்காவின் முக்கிய மாகாணங்களில் ஒன்றான கலிபோர்னியாவை ஈரானின் பிராந்திய பகுதியாக சித்தரிக்கும் வரைபடத்தை வெளியிட்டுள்ளது.

மத்திய கிழக்கில் இருந்து உலகின் பல்வேறு நாடுகளுக்கு எண்ணெய் மற்றும் எரிவாயுவை கொண்டு செல்லும் முக்கிய கடல்வழிப் பாதையான ஹார்முஸ் ஜலசந்தியை சுற்றி ஏற்கனவே பதற்றம் நீடித்து வருகிறது. இந்த சூழலில், ஹார்முஸ் தங்களது கட்டுப்பாட்டில் இருப்பதாக டிரம்ப் சமூக வலைதளத்தில் வரைபடம் ஒன்றை வெளியிட்டிருந்தார்.

அதில் ஹார்முஸ் பகுதி அமெரிக்காவின் ஒரு பிராந்தியமாக சித்தரிக்கப்பட்டிருந்ததாக கூறப்படுகிறது. அமெரிக்க வெள்ளை மாளிகையின் அதிகாரப்பூர்வ எக்ஸ் கணக்கும் அந்த பதிவை மறுபதிவு செய்தது.

இதையும் படிங்க: ஈரானுக்கு எதிராக டிரம்ப் அடுத்த அதிரடி! “இதுவரை இல்லாத பொருளாதார போர்” - அமெரிக்கா கடும் எச்சரிக்கை

இதற்கு பதிலடி கொடுக்கும் வகையில் ஈரான் புதிய வரைபடத்தை வெளியிட்டுள்ளது. இந்தியாவின் ஐதராபாத்தில் உள்ள ஈரான் தூதரகத்தின் அதிகாரப்பூர்வ எக்ஸ் கணக்கில் இந்த வரைபடம் பகிரப்பட்டுள்ளது. அதில் கலிபோர்னியா மாகாணம் தனியாக நீல நிறத்தில் குறிப்பிடப்பட்டு, அது “இஸ்லாமிய குடியரசான ஈரானின் புதிய பிராந்திய பகுதி” என நகைச்சுவை கலந்த வகையில் சித்தரிக்கப்பட்டுள்ளது.

கலிபோர்னியாவை ஈரான் தேர்வு செய்ததற்கும் பின்னணி இருப்பதாக கூறப்படுகிறது. அமெரிக்காவில் அதிக அளவில் ஈரானிய வம்சாவளியினர் வசிக்கும் பகுதிகளில் கலிபோர்னியா முக்கியமானதாகும். குறிப்பாக லாஸ் ஏஞ்சல்ஸ் கவுண்டியில் சுமார் 1.41 லட்சம் ஈரானிய வம்சாவளி அமெரிக்கர்கள் வசிப்பதாக தகவல்கள் தெரிவிக்கின்றன.

லாஸ் ஏஞ்சல்ஸில் உள்ள வெஸ்ட்வுட் பகுதி, அங்கு கணிசமான அளவில் ஈரானியர்கள் வசிப்பதால் “தெஹ்ரான்கலெஸ்” என்ற பெயராலும் அழைக்கப்படுகிறது. 1979-ம் ஆண்டு ஈரானில் ஏற்பட்ட இஸ்லாமியப் புரட்சிக்குப் பிறகு அமெரிக்காவுக்கு இடம்பெயர்ந்த ஈரானியர்களுக்கு இந்தப் பகுதி முக்கிய மையமாக மாறியது.

இதனால் டிரம்பின் வரைபடத்துக்கு ஈரான் வெளியிட்டுள்ள இந்த ‘பதிலடி மேப்’ தற்போது சமூக வலைதளங்களில் கவனம் பெற்றுள்ளது. ஹார்முஸ் ஜலசந்தி தொடர்பான பதற்றத்துக்கு மத்தியில், இரு நாடுகளின் இந்த சமூக வலைதள நடவடிக்கைகள் சர்வதேச அளவில் பரபரப்பை ஏற்படுத்தியுள்ளன.

இதையும் படிங்க: ஹார்முஸ் அமெரிக்காவுக்கா? கலிபோர்னியா ஈரானுக்கா? டிரம்புக்கு அதிரடி பதிலடி!!