தமிழ்நாட்டில் இடைநிலை சுகாதாரப் பணியாளர்களாகப் பணியாற்றும் செவிலியர்கள் தங்கள் நியாயமான கோரிக்கைகளை முன்வைத்து அமைதியான முறையில் போராட்டத்தில் ஈடுபட்ட நிகழ்வு சமீபத்தில் பெரும் கவனத்தை ஈர்த்தது. பணி நிரந்தரம், சம வேலைக்கு சம ஊதியம், நிலுவையில் உள்ள ஊக்கத்தொகை வழங்கல், பணிப் பாதுகாப்பு உள்ளிட்ட பல்வேறு கோரிக்கைகளை வலியுறுத்தி தமிழ்நாடு இடைநிலை சுகாதாரப் பணியாளர்கள் சங்கத்தினர் சென்னை எழும்பூர் ராஜரத்தினம் மைதானம் அருகே ஒருநாள் உண்ணாவிரதப் போராட்டத்தை நடத்தினர்.

ஆயிரக்கணக்கான செவிலியர்கள் மாநிலம் முழுவதிலும் இருந்து திரண்டு இந்தப் போராட்டத்தில் பங்கேற்றனர். அவர்கள் தற்போது பெறும் மாத ஊதியம் மிகவும் குறைவாக இருப்பதாகவும், அதனால் குடும்பங்களைக் கவனிப்பதில் சிரமம் ஏற்படுவதாகவும் சுட்டிக்காட்டினர். மேலும் முந்தைய ஆண்டுகளுக்கான ஊக்கத்தொகைகள் இன்னும் வழங்கப்படவில்லை என்றும், மகப்பேறு விடுப்பு உள்ளிட்ட அடிப்படை வசதிகள் கூட சரியாகக் கிடைக்கவில்லை என்றும் குறைபட்டனர்.போராட்டம் அமைதியாகத் தொடங்கியது. செவிலியர்கள் தங்கள் கோரிக்கைகளை முழக்கங்களாக எழுப்பினர்.

அரசுடன் பேச்சுவார்த்தை நடத்த தயாராக இருப்பதாகவும் தெரிவித்தனர். ஆனால் மாலை நேரத்தைக் கடந்தும் போராட்டம் தொடர்ந்தபோது காவல்துறையினர் தலையிட்டனர். பேச்சுவார்த்தைக்காக ஐந்து பிரதிநிதிகளைத் தலைமைச் செயலகத்திற்கு அழைத்துச் சென்றதாகவும், பின்னர் அவர்களைக் கைது செய்ததாகவும் செவிலியர்கள் தரப்பில் புகார் எழுந்தது. இதைத் தொடர்ந்து போராட்டத்தில் ஈடுபட்டிருந்த பலரைக் குண்டுக்கட்டாகக் கைது செய்யும் நடவடிக்கை மேற்கொள்ளப்பட்டது. மின்சாரம் துண்டிக்கப்பட்ட நிலையில் டார்ச் வெளிச்சத்தில் போராட்டம் தொடர்ந்ததும் பரபரப்பை ஏற்படுத்தியது. இது போலீஸ் அரசு போன்ற நடவடிக்கை என்றும், அமைதியான போராட்டத்தை ஒடுக்க முயற்சிப்பதாகவும் குற்றச்சாட்டுகள் எழுந்தன.இந்தச் சூழலில் திமுக எம்பி கனிமொழி தனது சமூக ஊடகப் பதிவில் கடும் கண்டனம் தெரிவித்தார்.

இதையும் படிங்க: “அந்த பயத்தைக் காட்டியிருக்கோம்...” - தாராபுரம் கள நிலவரம் குறித்து திமுக வேட்பாளர் சுகன்யா ஓபன் டாக்...!

பணி நிரந்தரம், சம ஊதியம், ஊக்கத்தொகை உள்ளிட்ட கோரிக்கைகளை முன்வைத்து அமைதியாகப் போராடிவரும் செவிலியர்களை ஒடுக்க முற்படுகிறது தவெக அரசு என்று அவர் குறிப்பிட்டார். தற்காலிகப் பணியில் உள்ள செவிலியர்கள் பணி நிரந்தரம் செய்யப்படுவார்கள் எனத் தேர்தல் வாக்குறுதியில் ரீல் விட்டுவிட்டு, இப்போது அதே செவிலியர்களை ஏமாற்றியிருக்கிறது இந்த ரீல் அரசு என்றும் அவர் விமர்சித்தார். செவிலியர்களின் கோரிக்கைகளுக்கு உடனடியாகத் தீர்வு காண வேண்டும் என்று வலியுறுத்தினார். தேர்தல் நேரத்தில் அளிக்கப்பட்ட வாக்குறுதிகள் நிறைவேற்றப்படாமல் இருப்பதாகவும், அதனால் இந்தப் போராட்டம் எழுந்துள்ளதாகவும் அவர் சுட்டிக்காட்டினார்.

இதையும் படிங்க: "காமாட்சி விளக்கும், புடவையும்"..! தூய சக்தியின் தூய அரசியலை பாருங்க..! செந்தில் பாலாஜி விளாசல்.!!