சென்னை, மார்ச் 9: அதிமுக மாநிலங்களவை உறுப்பினர் மு.தம்பிதுரைக்கு சொந்தமான செயின்ட் பீட்டர்ஸ் கல்வி நிறுவனம் ஆக்கிரமித்துள்ள நிலத்தை மீட்க சென்னை உயர்நீதிமன்றம் உத்தரவிட்டுள்ளது. 

திருவள்ளூர் மாவட்டம் ஆவடி அருகே கோனம்பேடு கிராமத்தில் உள்ள இந்த கல்வி நிறுவனம் அரசு நிலம் மற்றும் நீர்நிலைகளை ஆக்கிரமித்து விடுதிகள், துணை மின் நிலையம், தனியார் பாதைகள் அமைத்துள்ளதாக கிராம பொதுநல சங்கம் சார்பில் 2021 செப்டம்பரில் வழக்கு தொடரப்பட்டது.

வழக்கில், கோனம்பேடு கிராமத்திற்கு அருகிலுள்ள ஆவடி நகராட்சி உயர்நிலைப் பள்ளியில் அடிப்படை வசதிகள் குறைவாக உள்ளதால், மீட்கப்படும் நிலங்களை அந்தப் பள்ளிக்கு வழங்க வேண்டும் என்றும் கோரிக்கை வைக்கப்பட்டிருந்தது. 

இதையும் படிங்க: அமைச்சர் நேரு ஊழல் வழக்கு!! சிக்கப்போகும் அதிகாரிகள்?! 6 ஐஏஎஸ், 3 ஐபிஎஸ் 2 எம்.எல்.ஏ-க்களுக்கு திக்!! திக்!!

இந்த வழக்கு நீதிபதிகள் எஸ்.எம். சுப்பிரமணியம் மற்றும் குமரப்பன் அமர்வு முன் பிப்ரவரி 10 அன்று விசாரணைக்கு வந்தபோது, அரசு தாக்கல் செய்த நில அளவீட்டு அறிக்கைக்கு அதிருப்தி தெரிவித்த நீதிபதிகள், ஆக்கிரமிக்கப்பட்ட நிலங்களை மீண்டும் அளவீடு செய்து இரு வாரங்களில் விரிவான அறிக்கை தாக்கல் செய்ய உத்தரவிட்டனர்.

இன்று (மார்ச் 9) விசாரணை மீண்டும் நடைபெற்றது. திருவள்ளூர் மாவட்ட ஆட்சியர் சார்பில் தாக்கல் செய்யப்பட்ட அறிக்கையில், தம்பிதுரைக்கு சொந்தமான கல்வி நிறுவனம் 61.18 செண்ட் நிலத்தை ஆக்கிரமித்துள்ளதாக தெரிவிக்கப்பட்டது.

ஆக்கிரமிப்புகளை அகற்ற நடவடிக்கை எடுக்கப்படும் என்றும் உறுதியளிக்கப்பட்டது. இதையடுத்து, நீதிபதிகள் 12 வாரங்களுக்குள் (சுமார் 3 மாதங்கள்) சம்பந்தப்பட்ட ஆக்கிரமிப்பு நிலங்களை மீட்க உத்தரவிட்டனர்.

இந்த உத்தரவு வெளியான அதே நாளில், அதிமுக சார்பில் 6-வது முறையாக ராஜ்யசபா எம்பியாக தம்பிதுரை போட்டியின்றி தேர்ந்தெடுக்கப்பட்டுள்ளார். இது அரசியல் வட்டாரத்தில் பரபரப்பை ஏற்படுத்தியுள்ளது. கோனம்பேடு கிராம மக்கள் நீண்டகாலமாக இந்த ஆக்கிரமிப்புக்கு எதிர்ப்பு தெரிவித்து வருகின்றனர். அரசு நிலங்கள் மீட்கப்பட்டால், அவை பொதுமக்கள் நலனுக்காக பயன்படுத்தப்பட வேண்டும் என்ற எதிர்பார்ப்பு நிலவுகிறது.

இந்த வழக்கு அதிமுகவின் மூத்த தலைவர் ஒருவரின் கல்வி நிறுவனம் மீதான ஆக்கிரமிப்பு குற்றச்சாட்டை மீண்டும் வெளிச்சத்துக்கு கொண்டு வந்துள்ளது. உயர்நீதிமன்ற உத்தரவை அரசு எவ்வாறு நிறைவேற்றுகிறது என்பதை பொறுத்திருந்து பார்க்கலாம். இது தமிழகத்தில் நில ஆக்கிரமிப்பு பிரச்னைகளுக்கு எதிரான நீதிமன்ற நடவடிக்கைகளுக்கு முன்மாதிரியாக அமையலாம்.

இதையும் படிங்க: உதயநிதி ஸ்டாலின், கமல், விஜய் வீட்டுக்கு சிக்கல்! ஈ.சி.ஆரில் விதிமீறல் கட்டிடங்களா? ஐகோர்ட் அதிரடி உத்தரவு!