சென்னை: ம.தி.மு.க.வில் பெரும் பின்னடைவு ஏற்பட்டுள்ளது. கட்சியின் முக்கிய முடிவுகளை எடுக்க உள்ள இன்றைய பொதுக்குழு கூட்டத்தில் துணைப் பொதுச் செயலாளர் மற்றும் கடையநல்லூர் எம்.எல்.ஏ. ராஜேந்திரன் கலந்து கொள்ளவில்லை. இதற்கு முன்பே சீர்காழி எம்.எல்.ஏ. செந்தில் செல்வம் ம.தி.மு.க.வில் இருந்து விலகியிருந்தார்.

நேற்று ம.தி.மு.க. உயர்நிலைக் குழு கூட்டம் சென்னை எழும்பூர் தாயக அலுவலகத்தில் கட்சி அவைத் தலைவர் ஆடிட்டர் அர்ஜுனன் தலைமையில் நடைபெற்றது. பொதுச் செயலர் வைகோ, முதன்மை செயலர் துரை வைகோ, பொருளாளர் செந்திலதிபன் உள்ளிட்ட முக்கிய நிர்வாகிகள் இதில் பங்கேற்றனர். ஆனால் கட்சியின் இரு எம்.எல்.ஏ.க்களில் ஒருவரான செந்தில் செல்வம் ஏற்கெனவே கட்சியில் இருந்து விலகுவதாக அறிவித்துவிட்டார். 

இந்நிலையில் இன்றைய பொதுக்குழு கூட்டத்திலும் கடையநல்லூர் எம்.எல்.ஏ. ராஜேந்திரன் பங்கேற்கவில்லை. இது வைகோ தரப்புக்கு பெரும் அதிர்ச்சியை ஏற்படுத்தியுள்ளது. ம.தி.மு.க.வின் இரு எம்.எல்.ஏ.க்களும் தி.மு.க. நிலைப்பாட்டை ஆதரித்ததால், கட்சிக்குள் பிளவு தெளிவாகத் தெரியத் தொடங்கியுள்ளது.

இதையும் படிங்க: அதிமுக பிளவை சரி செய்ய போராடும் எடப்பாடி பழனிசாமி! வேலுமணிக்கு பதவி?! சி.வி.சண்முகத்துடன் மோதல்?!

இன்றைய பொதுக்குழுவில் முக்கிய தீர்மானங்கள் நிறைவேற்றப்பட உள்ளன. இனி வரும் தேர்தல்களில் தனித்த சின்னத்தில் போட்டியிடுவது, தி.மு.க. கூட்டணியில் இருந்து விலகுவது மற்றும் த.வெ.க. அரசுக்கு ஆதரவு அளிப்பது உள்ளிட்ட முடிவுகள் எடுக்கப்படலாம் என எதிர்பார்க்கப்படுகிறது. 

தேர்தல் தோல்விக்குப் பிறகு ம.தி.மு.க.வுக்கு ஏற்பட்டுள்ள இந்த உட்கட்சி நெருக்கடி வைகோவுக்கு பலத்த அடியாக அமைந்துள்ளது. கட்சியின் சட்டமன்ற உறுப்பினர்களே முக்கிய முடிவுகளுக்கு எதிராக நடந்து கொள்வது பொதுச் செயலருக்கு பெரும் சவாலாக உருவெடுத்துள்ளது.

ம.தி.மு.க.வின் இந்த உள்ளடி பிரச்னை தமிழக அரசியல் களத்தில் புதிய மாற்றங்களுக்கு வழி வகுக்கும் என அரசியல் பார்வையாளர்கள் கருதுகின்றனர். தி.மு.க. கூட்டணியில் இருந்து வெளியேறி த.வெ.க.வுக்கு ஆதரவு அளிக்கும் முடிவை எடுத்தாலும், கட்சியின் சட்டமன்ற பலத்தை இழக்கும் நிலை ஏற்பட்டுள்ளது.

வைகோ தலைமையிலான ம.தி.மு.க. இந்த நெருக்கடியை எப்படி சமாளிக்கப் போகிறது என்பது அடுத்த சில நாட்களில் தெளிவாகும். தற்போது கட்சியில் உள்ள உட்கட்சி மோதல் வெளிப்படையாகத் தெரியத் தொடங்கியுள்ளது.

இதையும் படிங்க: மு.க.ஸ்டாலினுடன் வைகோவை மோதவிட விஜய் திட்டம்!? இடைத்தேர்தலில் ட்விஸ்ட்! திமுக VS மதிமுக! தவெக வியூகம்!