தமிழக சட்டமன்றத் தேர்தலில் தமிழக வெற்றிக் கழகம் (தவெக) அதிக இடங்களைக் கைப்பற்றுவதற்கு சிறுபான்மை இன மக்களின் ஓட்டுகள் முக்கியப் பங்கு வகித்துள்ளன. தமிழகத்தில் கிறிஸ்துவர் மற்றும் இஸ்லாமிய சமூகத்தினரின் ஓட்டுகள் சுமார் 13 சதவீதம் உள்ளன. இந்த ஓட்டுகள் பெரும்பாலான தொகுதிகளில் பரவலாக இருப்பதால், வெற்றி-தோல்வியை தீர்மானிக்கும் சக்தியாக உள்ளன.

குறிப்பாக பெரம்பூர், வாணியம்பாடி, ஆம்பூர், நாகப்பட்டினம், நன்னிலம், நாகர்கோவில், குளச்சல், கன்னியாகுமரி உள்ளிட்ட சுமார் 50 தொகுதிகளில் சிறுபான்மையினரின் ஓட்டுகள் அடர்த்தியாக உள்ளன. காலம் காலமாக இந்த ஓட்டு வங்கி தி.மு.க. மற்றும் காங்கிரஸ் கட்சிகளுக்கு சாதகமாக இருந்து வந்தது. இரு கட்சிகளும் கூட்டணி அமைக்கும் போதெல்லாம் இந்த ஓட்டுகள் அவர்களுக்கு பெரும் உதவியாக இருந்தன.

எம்.ஜி.ஆர். அதிமுகவைத் தொடங்கியபோது சிறுபான்மையினரை கணிசமாக ஈர்த்தார். பின்னர் ஜெயலலிதாவும் பல நலத் திட்டங்கள் மூலம் அந்த ஓட்டு வங்கியைத் தக்கவைத்தார். ஆனால், அதற்குப் பிறகு வந்த தலைமையால் அந்த ஆதரவைத் தக்கவைக்க முடியவில்லை. 

இதையும் படிங்க: அரசியல் அதிரடி ஆரம்பம்! சினிமாவை விட்டு முழுதாக விலகும் விஜய்!! யூகங்களுக்கு முற்றுப்புள்ளி!!

இந்தத் தேர்தலில் தவெக-வுக்கு சிறுபான்மையினர் பெரும் ஆதரவு அளித்துள்ளனர். சிறுபான்மையினர் அதிகம் வாழும் பெரம்பூர், ஆவடி, ஆயிரம்விளக்கு, அம்பத்தூர், மாதவரம், குடியாத்தம், ஆம்பூர், திருப்பத்தூர், திருச்சி, நாங்குநேரி, ராதாபுரம் உள்ளிட்ட பல தொகுதிகளில் தவெக அதிக ஓட்டுகளைப் பெற்று வெற்றி பெற்றுள்ளது. விஜய்யின் புதிய அரசியல் அணுகுமுறை மற்றும் உள்ளடக்கிய பேச்சுகள் சிறுபான்மையினரிடையே நம்பிக்கையை ஏற்படுத்தியுள்ளதாகக் கூறப்படுகிறது.

இந்த மாற்றம் தமிழக அரசியல் சமன்பாட்டை மாற்றியுள்ளது. தவெக தனிப்பெரும் கட்சியாக உருவெடுப்பதற்கு சிறுபான்மை ஓட்டுகள் கைகொடுத்துள்ளன என்பது தெளிவாகத் தெரிகிறது. பாரம்பரிய கட்சிகளுக்கு இது ஒரு பெரிய எச்சரிக்கையாக அமைந்துள்ளது.

தவெக-வின் வெற்றியில் சிறுபான்மையினரின் பங்களிப்பு முக்கியமானது என அரசியல் பார்வையாளர்கள் கருதுகின்றனர். இனி வரும் காலங்களில் அரசியல் கட்சிகள் சிறுபான்மை மக்களின் பிரச்னைகளுக்கு முக்கியத்துவம் அளிக்க வேண்டிய நிலை உருவாகியுள்ளது.

இதையும் படிங்க: விஜயை ஏன் தொட்டோம்னு வருத்தப்படுவீங்க!! சொன்னதை செஞ்சு காட்டிய தவெக தலைவர்! சபதம் நினைவிருக்கா?!