தமிழகத்தில் 2026 சட்டமன்றத் தேர்தலை முன்னிட்டு அதிமுக உட்கட்சி பிளவுகள் மேலும் ஆழமடைந்து வரும் நிலையில், ஓ.பன்னீர்செல்வம் (ஓபிஎஸ்) அணியில் இருந்து தொடர் விலகல்கள் ஏற்பட்டு வருகின்றன. ஓபிஎஸ் கூட்டணி தொடர்பான இறுதி முடிவை எடுப்பதில் தடுமாற்றம் காட்டி வருவதால், தாங்கள் திமுகவில் இணைவதாக முன்னாள் எம்எல்ஏ குன்னம் ராமச்சந்திரன் உறுதிப்படுத்தியுள்ளார். 

இதற்கு முன்னதாக, ஒரத்தநாடு தொகுதி எம்எல்ஏ ஆர். வைத்திலிங்கம் தனது எம்எல்ஏ பதவியை ராஜினாமா செய்து, தனது மகன் பிரபுவுடன் அண்ணா அறிவாலயம் சென்று முதல்வர் மு.க. ஸ்டாலின் முன்னிலையில் திமுகவில் இணைந்தார்.

வைத்திலிங்கம், ஜெயலலிதா காலத்தில் வீட்டு வசதி மற்றும் நகர்ப்புற வளர்ச்சித் துறை அமைச்சராக பதவி வகித்தவர். டெல்டா மாவட்டங்களில் அதிமுகவின் முக்கிய முகமாக இருந்தவர். 2022-இல் ஓபிஎஸ்-ஐ ஆதரித்ததால் அதிமுகவிலிருந்து நீக்கப்பட்ட பின்னர் ஓபிஎஸ் அணியில் மிக முக்கிய பங்காற்றி வந்தார். 

இதையும் படிங்க: காலியாகும் ஓபிஎஸ் கூடாரம்!! அடுத்த விக்கெட் வெல்லமண்டி நடராஜன்?! திமுக பக்கா ஸ்கெட்ச்!

ஆனால் ஓபிஎஸ் அணியின் 'காத்திருந்து பார்க்கும்' கொள்கை மற்றும் முடிவெடுப்பதில் தாமதம் ஏற்படுத்தியதால், திமுகவில் இணைந்ததாக அவர் தெரிவித்துள்ளார். இணைப்புக்குப் பிறகு செய்தியாளர்களிடம் பேசிய வைத்திலிங்கம், "முதல்வர் ஸ்டாலின் மக்கள் நலத் திட்டங்களை சிறப்பாக செயல்படுத்தி வருகிறார். திமுக மட்டுமே தமிழக மக்களின் முன்னேற்றத்திற்காக பாடுபடுகிறது. ஓபிஎஸ்-ன் தடுமாற்றம் எங்களை இந்த முடிவுக்கு தள்ளியது" என்று கூறினார்.

இதேபோல், முன்னாள் சுற்றுலாத்துறை அமைச்சர் வெல்லமண்டி நடராஜன், குன்னம் தொகுதி முன்னாள் எம்எல்ஏ ராமச்சந்திரன் உள்ளிட்டோரும் இன்று திமுகவில் இணைவது உறுதியாகியுள்ளது. வெல்லமண்டி நடராஜன் திருச்சி கிழக்கு தொகுதியில் 2016-இல் வெற்றி பெற்று அமைச்சரானவர். 2021 தேர்தலில் தோல்வியடைந்த பின்னர் ஓபிஎஸ் அணியில் முக்கிய பங்கு வகித்தார். 

ராமச்சந்திரன், ஓபிஎஸ் நடத்திய கூட்டங்களில் தே.ஜ. கூட்டணி அல்லது தனித்து போட்டியிட வேண்டும் என்று வலியுறுத்தியவர். ஆனால் ஓபிஎஸ்-ன் முடிவின்மை காரணமாக திமுகவை நோக்கி திரும்பியுள்ளார்.

ஓபிஎஸ் அணியின் 'அதிமுக உரிமை மீட்புக் குழு' தற்போது பலவீனமடைந்து வருகிறது. ஏற்கனவே பால் மனோஜ் பாண்டியன், சுப்ரமணியம், பாலகங்காதரன் உள்ளிட்டோர் திமுக அல்லது வேறு கட்சிகளில் இணைந்தனர்.

 ஓபிஎஸ் அதிமுகவுடன் இணைவதா, தனித்து போட்டியிடுவதா, திமுகவுடன் கூட்டணி அமைப்பதா என்ற முடிவை இன்னும் எடுக்காதது இந்த விலகல்களுக்கு முக்கிய காரணமாக கருதப்படுகிறது. டெல்டா மாவட்டங்களில் வலுவான செல்வாக்கு கொண்ட இவர்களின் இணைப்பு திமுகவுக்கு பெரும் பலத்தை சேர்க்கும் என எதிர்பார்க்கப்படுகிறது.

இதனால் ஓபிஎஸ் அணியின் எதிர்காலம் கேள்விக்குறியாகியுள்ளது. திமுக தரப்பு அதிமுகவிலிருந்து ஆதரவாளர்களை ஈர்க்கும் உத்தியை தீவிரப்படுத்தியுள்ள நிலையில், தமிழக அரசியல் களம் மேலும் சூடுபிடித்துள்ளது!

இதையும் படிங்க: கூட்டணியில் இணைந்த டிடிவி!! நேரில் சந்திக்க முரண்டு பிடிக்கும் எடப்பாடி! பரபரக்கும் அரசியல் பின்னணி!