மதுரையில் கடந்த 21ம் தேதி நடைபெற்ற தமிழக வெற்றிக் கழகத்தின் (தவெக) இரண்டாவது மாநில மாநாட்டில், கட்சித் தலைவர் விஜய், முதலமைச்சர் மு.க. ஸ்டாலினை “அங்கிள்” என்று குறிப்பிட்டு கடுமையாக விமர்சித்தது தமிழக அரசியல் களத்தில் பெரும் சர்ச்சையை கிளப்பியுள்ளது. மூன்று லட்சத்துக்கும் மேற்பட்ட தொண்டர்கள் கலந்துகொண்ட இந்த மாநாட்டில், விஜய், திமுக ஆட்சியை “மன்னராட்சி” என்றும், ஊழல் மற்றும் பெண்களுக்கு பாதுகாப்பு இல்லை என்றும் குற்றம்சாட்டினார். “நேர்மை, நியாயம், சட்டம் ஒழுங்கு இருக்கிறதா, ஸ்டாலின் அங்கிள்?” எனக் கேள்வி எழுப்பி, திமுகவை தாக்கினார்.

விஜய்யின் இந்த பேச்சுக்கு திமுகவினர் கடும் எதிர்ப்பு தெரிவித்தனர். மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ. சண்முகம், “அங்கிள் என்று அழைத்தது அரசியல் அற்ற, தரம்தாழ்ந்த வார்த்தை” என கண்டித்தார். விடுதலை சிறுத்தைகள் கட்சியின் எம்.பி. ரவிக்குமார், இது ஆபாசமான கலாச்சாரத்தை அறிமுகப்படுத்துவதாகவும், விஜய் உடனடியாக மன்னிப்பு கேட்க வேண்டும் என்றும் வலியுறுத்தினார். திமுக வர்த்தக அணியின் கூட்டத்தில், விஜய் மீது வழக்கு பதிவு செய்ய வேண்டும் என தீர்மானம் நிறைவேற்றப்பட்டது. அதேசமயம், பாஜக மாநிலத் தலைவர் அண்ணாமலை, விஜய்யின் பேச்சு ஆரோக்கியமற்ற அரசியலுக்கு உதாரணம் என விமர்சித்தார். 

இதையும் படிங்க: மருத்துவமனையில் அட்மிட்டான நல்லக்கண்ணு.. தவெக தலைவர் விஜய் செய்த செயல்..!!

மாநாட்டின் முக்கிய நிகழ்வாக விஜய்யின் 800 மீட்டர் ரேம்ப் வாக் நடைபெற்றது. இதன்போது, விஜய்யை நெருங்க முயன்ற தொண்டர்களை பவுன்சர்கள் கடுமையாகத் தடுத்து, சிலரை தூக்கி வீசிய சம்பவங்கள் வீடியோவாகப் பதிவாகி, சமூக வலைதளங்களில் வைரலாகின. மேலும், விஜய்யின் வேண்டுகோளை மீறி, குழந்தைகளுடன் வந்த பெண்கள் மற்றும் முதியோரை பவுன்சர்கள் வெளியேற்றியதாகவும் புகார்கள் எழுந்தன.

இந்த சம்பவங்கள் விஜய்யின் பிம்பத்திற்கு பின்னடைவாக அமைந்துள்ளன. முன்னதாக, கல்வி விருது விழா உள்ளிட்ட நிகழ்வுகளிலும் பவுன்சர்களின் அடாவடி நடவடிக்கைகள் விமர்சனத்திற்கு உள்ளாகியுள்ளன. இதற்கு பொறுப்பேற்க வேண்டியது தவெக நிர்வாகமா அல்லது பாதுகாப்பு நிறுவனமா என கேள்விகள் எழுப்பப்பட்டு வருகின்றன.

இந்நிலையில் தவெக தலைவரும் நடிகருமான விஜய் மீது திருவாரூர் மாவட்டம் திருத்துறைப்பூண்டி காவல் நிலையத்தில் புகார் பதிவு செய்யப்பட்டுள்ளது. இந்த புகாரை வழக்கறிஞர் சிவசாகர் என்பவர் அளித்துள்ளார். கடந்த ஆகஸ்ட் 21ம் தேதி அன்று மதுரையில் நடைபெற்ற தவெகவின் 2வது மாநில மாநாட்டில் விஜய், தமிழக முதலமைச்சர் மு.க. ஸ்டாலினை “அங்கிள்” என்று குறிப்பிட்டு கேலி செய்யும் விதமாகவும், தரக்குறைவாகவும் பேசியதாக புகாரில் குற்றம்சாட்டப்பட்டுள்ளது. இது திமுகவினரிடையே கடும் கொந்தளிப்பை ஏற்படுத்தியுள்ளது.

மேலும், மாநாட்டின்போது விஜய்யின் பாதுகாவலர்கள் (பவுன்சர்கள்) கட்சித் தொண்டர்களை மனிதநேயமற்ற முறையில் தூக்கி வீசியதாகவும் சிவசாகர் தனது புகாரில் குறிப்பிட்டுள்ளார். இந்தச் செயல் மனிதாபிமானமற்றது எனவும், விஜய்யின் பேச்சு முதலமைச்சரின் மரியாதைக்கு பங்கம் விளைவித்ததாகவும் புகாரில் தெரிவிக்கப்பட்டுள்ளது. இதனைத் தொடர்ந்து, விஜய் மற்றும் அவரது பாதுகாவலர்கள் மீது உரிய நடவடிக்கை எடுக்க வேண்டும் என புகாரில் கோரிக்கை விடுக்கப்பட்டுள்ளது.

விஜய், தவெகவை தொடங்கி, 2026 சட்டமன்றத் தேர்தலை இலக்காகக் கொண்டு அரசியல் பயணத்தை மேற்கொண்டு வருகிறார். மாநாட்டில் அவர் திமுக மற்றும் பாஜகவை கடுமையாக விமர்சித்திருந்தார். இந்த புகார் தொடர்பாக திமுகவினர், விஜய்யின் பேச்சு தரம் தாழ்ந்தது எனக் கூறி, வரும் தேர்தலில் தக்க பதிலடி கொடுப்போம் என எச்சரித்துள்ளனர். இந்த புகார் தமிழக அரசியல் களத்தில் பரபரப்பை ஏற்படுத்தியுள்ளது.

இதையும் படிங்க: இல்லங்கள் தோறும் அமைதி, வளம் பெருக.. கிருஷ்ணஜெயந்தி வாழ்த்து சொன்ன தவெக தலைவர் விஜய்..!