இந்தியத் தலைமைத் தேர்தல் ஆணையர் பொறுப்பில் இருந்து ஞானேஷ் குமார் உடனடியாகப் பதவி விலக வலியுறுத்தி, நாளை (2026 அக்டோபர் 2) காந்தி ஜெயந்தி தினத்திலிருந்து நாடு தழுவிய அளவில் தொடர் போராட்டங்கள் முன்னெடுக்கப்படும் என்றும், அவர் பதவி விலகும் வரை இந்தப் போராட்டம் ஓயாது என்றும் காக்ரோச் ஜனதா கட்சியின் நிறுவனத் தலைவர் அபிஜீத் திப்கே அதிரடியாக அறிவித்துள்ளார்.

தலைமைத் தேர்தல் ஆணையத்தின் நடுநிலைமை மற்றும் தேர்தல் நடைமுறைகளின் நம்பகத்தன்மை குறித்து எதிர்க்கட்சிகளும் பல்வேறு அமைப்புகளும் கடுமையான குற்றச்சாட்டுகளைத் தொடர்ச்சியாக எழுப்பி வருகின்றன. குறிப்பாக, மூன்று ஆணையர்களைக் கொண்ட தேர்தல் ஆணையத்தில், பிற ஆணையர்களின் கருத்துகளைப் புறந்தள்ளிவிட்டுத் தலைமைத் தேர்தல் ஆணையர் ஞானேஷ் குமார் தன்னிச்சையாக முடிவுகளை எடுப்பதாகவும், ஜனநாயக விழுமியங்களுக்கு எதிரான நிலைப்பாட்டை மேற்கொள்வதாகவும் தேசிய அரசியலில் பெரும் சர்ச்சை வெடித்துள்ளது.   

முன்னதாக, தன்னிச்சையான செயல்பாடுகளுக்குப் பொறுப்பேற்று 48 மணி நேரத்திற்குள் ஞானேஷ் குமார் தனது பதவியை ராஜினாமா செய்ய வேண்டும் என சி.ஜே.பி சார்பில் கெடு விதிக்கப்பட்டிருந்தது. இந்நிலையில், அந்தக் காலக்கெடு முடிந்தும் தேர்தல் ஆணையர் பதவி விலகாததைக் கண்டித்து, நாளை முதல் போராட்டக் களத்தில் இறங்க உள்ளதாக அபிஜீத் திப்கே அறிவித்துள்ளார். இது தொடர்பாகச் செய்தியாளர்களிடம் பேசிய அபிஜீத் திப்கே, இந்திய ஜனநாயகத்தின் தூணாக விளங்க வேண்டிய தேர்தல் ஆணையத்தின் தன்னாட்சித் தன்மை தற்போது ஆளும் வர்க்கத்தின் அழுத்தங்களால் கடுமையாகச் சிதைக்கப்பட்டுள்ளது என்று குற்றம்சாட்டினார்.

இதையும் படிங்க: தேர்தல் ஆணையர் படம் எரிப்பு... சாலை மறியல்! உளுந்தூர்பேட்டையில் காங்கிரஸ் கட்சியினர் கைது!

தொடர்ந்து பேசிய அவர், அரசியலமைப்புச் சட்டத்திற்கு விரோதமாகச் செயல்படும் தலைமைத் தேர்தல் ஆணையர் ஞானேஷ் குமார் இனியும் அந்த உயர் பொறுப்பில் நீடிக்கத் துளியும் தார்மீகத் தகுதி அற்றவர்; அவர் உடனடியாகப் பதவி விலக வேண்டும் என்பதை வலியுறுத்தி அக்டோபர் 2 முதல் நாட்டின் அனைத்துப் பிரதான நகரங்களிலும் தீவிரமான அறப்போராட்டம் வெடிக்கும் எனத் தெரிவித்தார்.   

மேலும், இது வெறும் ஒருநாள் அடையாளப் போராட்டம் அல்ல; ஞானேஷ் குமார் தனது பதவியை விட்டு வெளியேறும் வரை தேசிய அளவில் இளைஞர்களையும் ஜனநாயக சக்திகளையும் ஒருங்கிணைத்து இந்தப் போராட்டம் இடைவிடாது தொடரும் என்று அவர் எச்சரித்துள்ளார்.
 

இதையும் படிங்க: ஞானேஷ் குமாருக்கு வலுக்கும் எதிர்ப்பு... இளைஞர் காங்கிரஸ் ஆர்ப்பாட்டம்... தள்ளுமுள்ளு..!!