வளிமண்டல மேலடுக்கு சுழற்சி மற்றும் வெப்பச்சலனம் காரணமாக, தமிழகத்தின் 5 மாவட்டங்களில் இன்று இரவு 7:00 மணி வரை இடி மற்றும் மின்னலுடன் கூடிய லேசானது முதல் மிதமான மழை பெய்ய வாய்ப்புள்ளதாக சென்னை மண்டல வானிலை ஆய்வு மையம் எச்சரிக்கை விடுத்துள்ளது.

இன்று பிற்பகல் 4:00 மணியளவில் வானிலை மையம் வெளியிட்டுள்ள உடனடி வானிலை முன்னறிவிப்பு அறிக்கையின்படி, தமிழகத்தில் தஞ்சாவூர், புதுக்கோட்டை, சிவகங்கை, கரூர் மற்றும் ராமநாதபுரம் ஆகிய ஐந்து மாவட்டங்களின் ஓரிரு இடங்களில் இடி, மின்னலுடன் கூடிய லேசானது முதல் மிதமான மழை பெய்யக்கூடும் எனத் தெரிவிக்கப்பட்டுள்ளது. இந்த எச்சரிக்கை இன்று இரவு 7:00 மணி வரை நடைமுறையில் இருக்கும் என அறிவிக்கப்பட்டுள்ளது.

திடீர் மழையின் காரணமாக தாழ்வான பகுதிகளில் தற்காலிக நீர் தேக்கம் ஏற்படவும், சாலைகள் வழுக்கும் தன்மை அடைந்து சில பகுதிகளில் போக்குவரத்து பாதிக்கப்படவும் வாய்ப்புள்ளதாகத் தெரிவிக்கப்பட்டுள்ளது. வாகன ஓட்டிகள் கவனமுடன் செல்லுமாறு அறிவுறுத்தப்பட்டுள்ளனர்.

இதையும் படிங்க: கேரளா போறீங்களா?மீண்டும் கனமழை எச்சரிக்கை! 6 மாவட்டங்களுக்கு Yellow Alert! இரவு பயணத்துக்கு தடை!

மேலும், இடி மற்றும் மின்னலின் போது பொதுமக்கள் பாதுகாப்பாக இருக்க வேண்டிய வழிகாட்டு நெறிமுறைகளும் வெளியிடப்பட்டுள்ளன. அதன்படி, வானம் இருண்டு பலத்த காற்று வீசும் போதோ அல்லது இடி சத்தம் கேட்கும் போதோ உடனடியாகப் பாதுகாப்பான கட்டடங்களுக்குள் செல்ல வேண்டும்.

வீடுகளில் உள்ள கதவுகள் மற்றும் ஜன்னல்களை மூட வேண்டும்; மின் சாதனங்களின் இணைப்புகளைத் துண்டித்து வைப்பதுடன், மின்சாரம் கடத்தும் குழாய்கள் மற்றும் ஓடும் தண்ணீரைப் பயன்படுத்துவதைத் தவிர்க்க வேண்டும்.

வெளியே இருப்பவர்கள் மரங்களின் அடியிலோ, உலோக அமைப்புகளின் அருகிலோ ஒதுங்கக் கூடாது என்றும், திறந்தவெளிகளில் இருக்கும் சூழல் ஏற்பட்டால் தரையில் படுக்காமல், கால்களை ஒன்றாக வைத்துத் தலையைக் குனிந்தபடி அமர்ந்து கொள்ள வேண்டும் என்றும் அறிவுறுத்தப்பட்டுள்ளது. இருசக்கர வாகனம் அல்லது மிதிவண்டியில் பயணிப்பவர்கள் உடனடியாகப் பாதுகாப்பான இடங்களுக்குச் செல்ல வேண்டும் என்றும் வானிலை ஆய்வு மையம் மற்றும் பேரிடர் மேலாண்மை ஆணையம் பொதுமக்களுக்கு எச்சரிக்கை விடுத்துள்ளது.

இதையும் படிங்க: வங்கக்கடலில் ஆழ்ந்த காற்றழுத்தத் தாழ்வு மண்டலம்! சென்னை உள்பட வட மாவட்டங்களில் மழை எச்சரிக்கை!