தொழில்நுட்ப உலகில் தொடர்ந்து புதிய சாதனைகள் அறிமுகமாகி வரும் நிலையில், ஐக்கிய அரபு எமிரேட்ஸில் நடைபெற்ற வித்தியாசமான நிகழ்வு ஒன்று உலக கவனத்தை ஈர்த்துள்ளது. மனித வடிவ ரோபோவான ‘பு சுனைதா’ தனது இணை ரோபோவான ‘மொசா’வை பாரம்பரிய முறைப்படி திருமணம் செய்துகொண்டதாக வெளியான தகவல்கள் இணையத்தில் வேகமாக பரவி வருகின்றன.

ஆராய்ச்சி மற்றும் தொழில்நுட்ப விளக்கங்களுக்காக உருவாக்கப்பட்ட ‘யூனிட்ரீ ஜி1’ (Unitree G1) வகையைச் சேர்ந்த இந்த மனித வடிவ ரோபோ, கடந்த ஆண்டு சாலையில் மனிதர்களைப் போல நடந்து காட்டியதன் மூலம் உலக அளவில் கவனம் பெற்றது. மனிதர்களின் உடல் இயக்கங்களை ஒத்த செயல்பாடுகளை மேற்கொள்ளும் திறன் கொண்ட இந்த ரோபோ, ரோபோட்டிக்ஸ் துறையில் முக்கியமான முன்னேற்றமாக பார்க்கப்பட்டது.

இந்த நிலையில், பு சுனைதா மற்றும் மொசா ஆகிய இரு ரோபோக்களுக்கும் ஐக்கிய அரபு எமிரேட்ஸில் கடந்த 1-ம் தேதி சிறப்பு நிகழ்ச்சி நடத்தப்பட்டதாக தெரிவிக்கப்பட்டுள்ளது. இந்த நிகழ்வில் சக ரோபோக்கள் மற்றும் அழைக்கப்பட்ட விருந்தினர்கள் பங்கேற்றதாக கூறப்படுகிறது.

இதையும் படிங்க: Deepfake-க்கு செக்! இனி 36 மணி நேரம் இல்லை... வெறும் 3 மணி நேரம் மட்டும் தான்! ஏஐ போலி பதிவுகளுக்கு மரண அடி!

திருமண நிகழ்ச்சியில் மணமகனாக இருந்த பு சுனைதா, ஐக்கிய அரபு எமிரேட்ஸின் பாரம்பரிய ஆடையான ‘கண்டுரா’ அணிந்திருந்ததாகவும், மணமகள் மொசா ‘அபயா’ உடையில் காட்சியளித்ததாகவும் தெரிவிக்கப்பட்டுள்ளது.

எமிரேட்ஸ் பாரம்பரிய இசை நிகழ்ச்சிகள், வாணவேடிக்கைகள் மற்றும் விருந்தினர்களின் கொண்டாட்டங்களுடன் இந்த நிகழ்வு நடைபெற்றதாக கூறப்படுகிறது. மனிதர்களின் திருமண நிகழ்ச்சிகளை போன்று அலங்காரங்கள் மற்றும் சடங்கு அம்சங்கள் இடம்பெற்றது பலரின் கவனத்தையும் ஈர்த்துள்ளது.

ரோபோக்களுக்கு இடையிலான இந்த நிகழ்வு உண்மையான திருமண உறவாக அல்லாமல், மனித வடிவ ரோபோக்களின் திறன்கள் மற்றும் செயற்கை நுண்ணறிவு தொழில்நுட்பத்தின் வளர்ச்சியை விளக்கும் ஒரு காட்சிப்படுத்தல் நிகழ்வாக பார்க்கப்படுகிறது.

செயற்கை நுண்ணறிவு மற்றும் மனித வடிவ ரோபோ தொழில்நுட்பம் வேகமாக வளர்ந்து வரும் நிலையில், எதிர்காலத்தில் ரோபோக்கள் மனிதர்களுடன் எவ்வாறு தொடர்பு கொள்ளும், அவற்றின் சமூகப் பயன்பாடு எந்த அளவுக்கு இருக்கும் என்பது குறித்த விவாதங்களையும் இதுபோன்ற நிகழ்வுகள் உருவாக்கி வருகின்றன.

தொழில்நுட்பமும் பாரம்பரிய கலாசார அம்சங்களும் இணைந்த இந்த வித்தியாசமான நிகழ்வு, சமூக வலைதளங்களில் பலரின் கவனத்தை ஈர்த்து வருகிறது.

இதையும் படிங்க: AI-ஐ கற்றுக்கொள்ளுங்கள்! தொழில் தொடங்க இது சரியான நேரம்... இளைஞர்களுக்கு நிர்மலா சீதாராமன் அட்வைஸ்!