தமிழகத்தில் நடைபெறும் சிறப்பு வாக்காளர் பட்டியல் திருத்தப் பணிக்கு (எஸ்.ஐ.ஆர்.) எதிர்ப்பு தெரிவித்து தமிழக வெற்றிக் கழகம் (த.வெ.க.) நாளை (நவம்பர் 16, 2025) மாநிலம் முழுவதும் கண்டன ஆர்ப்பாட்டம் நடத்துகிறது. இந்தப் போராட்டத்தில் தி.மு.க.,வை மிஞ்சும் அளவுக்கு கட்சியின் பலத்தை காட்ட வேண்டும் என்று த.வெ.க. தலைவர் விஜய் அனைத்து மாவட்ட நிர்வாகிகளுக்கும் உத்தரவிட்டுள்ளார். அதேநேரம், போலீசார் அனுமதி அளிக்கும் இடத்தில் மட்டுமே போராட்டம் நடத்த வேண்டும், பொதுமக்களுக்கோ வாகன போக்குவரத்துக்கோ இடையூறு ஏற்படுத்தக் கூடாது என்றும் அறிவுறுத்தியுள்ளார்.

கடந்த செப்டம்பர் 27-ம் தேதி கரூர் மாவட்டம் வேலுச்சாமிபுரத்தில் நடந்த த.வெ.க. பிரசாரக் கூட்டத்தில் ஏற்பட்ட கூட்ட நெரிசலில் 41 பேர் உயிரிழந்தனர். இந்த சோக சம்பவத்தால் விஜய் உள்ளிட்ட கட்சியின் முதன்மை நிர்வாகிகள் ஒரு மாத காலம் அரசியல் நடவடிக்கைகளில் இருந்து விலகி இருந்தனர். உயிரிழந்தவர்களின் குடும்பங்களுக்கு ஆறுதல் கூறுவதிலும், இழப்பீடு வழங்குவதிலும் கவனம் செலுத்தினர். தற்போது மீண்டும் கட்சி பணிகளில் தீவிரமாக இறங்கியுள்ளனர்.

இந்நிலையில் தமிழக தேர்தல் ஆணையம் நடத்தி வரும் சிறப்பு வாக்காளர் பட்டியல் திருத்தப் பணிக்கு த.வெ.க. கடும் எதிர்ப்பு தெரிவித்துள்ளது. இந்தப் பணியின் மூலம் போலி வாக்காளர்கள் சேர்க்கப்படுவதாகவும், உண்மையான வாக்காளர்கள் பட்டியலில் இருந்து நீக்கப்படுவதாகவும் கட்சி குற்றம் சாட்டுகிறது. இதைத் தடுக்கும் வகையில் நாளை தமிழகம் முழுவதும் கண்டன ஆர்ப்பாட்டங்கள் நடத்தப்படுகின்றன.

இதையும் படிங்க: ஓபிஎஸ், தினகரன், செங்கோட்டையனுக்கு மீண்டும் வாய்ப்பு! இறங்கி வரும் எடப்பாடி! ஆனா ஒரு கண்டிஷன்!!

சென்னையில் கட்சியின் பொதுச்செயலர் ஆனந்த் தலைமையில் போராட்டம் நடக்கிறது. மற்ற மாவட்டங்களில் மாநில நிர்வாகிகள் தலைமை தாங்குகின்றனர். இதற்கான ஏற்பாடுகளை உறுதி செய்யும் வகையில் விஜய் அனைத்து மாவட்டச் செயலர்களுக்கும் மின்னஞ்சல் அனுப்பியுள்ளார். அதில், “போலீசார் அனுமதி அளிக்கும் இடத்தில் மட்டுமே ஆர்ப்பாட்டம் நடத்த வேண்டும். கறுப்பு உடை அணிந்து, அமைதியான முறையில் கோஷங்கள் எழுப்ப வேண்டும். பொதுமக்களுக்கு இடையூறு ஏற்படுத்தக் கூடாது. வாகனங்களைத் தடுக்கக் கூடாது” என்று தெளிவான அறிவுரைகள் வழங்கியுள்ளார்.

ஆனால், விஜய் தொடர்ந்து “2026 சட்டசபைத் தேர்தலில் தி.மு.க.,வுக்கும் த.வெ.க.,வுக்கும் இடையே மட்டுமே நேரடிப் போட்டி” என்று கூறி வருவதால், நாளை நடக்கும் ஆர்ப்பாட்டத்தில் தி.மு.க.,வை மிஞ்சும் அளவுக்கு கட்சியின் பலத்தை காட்ட வேண்டும் என்றும் உத்தரவிட்டுள்ளார். “பெரும் எண்ணிக்கையில் தொண்டர்கள் பங்கேற்க வேண்டும். காட்சிகள் ஊடகங்களில் பிரதிபலிக்க வேண்டும்” என்றும் வலியுறுத்தியுள்ளார்.

இந்த இரு உத்தரவுகளால் மாவட்ட நிர்வாகிகள் சற்று குழப்பம் அடைந்துள்ளனர். “பலத்தை காட்ட வேண்டும் என்றால் பெரிய கூட்டம் தேவை. ஆனால் போலீசார் அனுமதி அளிக்கும் இடத்தில் மட்டும் நடத்த வேண்டும் என்றால் எப்படி?” என்று சிலர் கேள்வி எழுப்புகின்றனர். இருப்பினும், அனைத்து மாவட்டங்களிலும் போராட்ட ஏற்பாடுகள் தீவிரமாக நடந்து வருகின்றன.

த.வெ.க.வின் இந்தப் போராட்டம், 2026 சட்டசபைத் தேர்தலுக்கு முன்னோட்டமாகவும் பார்க்கப்படுகிறது. வாக்காளர் பட்டியல் திருத்தம் தொடர்பான சர்ச்சை தமிழக அரசியலில் புதிய பரபரப்பை ஏற்படுத்தியுள்ளது.

இதையும் படிங்க: எப்படியாச்சும் காப்பத்துப்பா!! ரூ.888 கோடி முறைகேடு புகார்!! காலை சுற்றும் ED!! திருப்பதியில் நேரு பிரார்த்தனை!!