தமிழக சட்டமன்ற தேர்தல் 2026 நெருங்கி வரும் நிலையில், நடிகர் விஜய்யின் தமிழக வெற்றிக் கழகம் (தவெக) விறுவிறுப்பாக தயாராகி வருகிறது. மாநிலம் முழுவதும் 234 தொகுதிகளிலும் போட்டியிடுவதற்கு பதிலாக, குறிப்பிட்ட 50 தொகுதிகளில் மட்டும் முழு கவனத்தை செலுத்தி, அதில் கணிசமான இடங்களை கைப்பற்ற தவெக புதிய வியூகம் வகுத்துள்ளது. மற்ற தொகுதிகளில் வேட்பாளர் நிறுத்தினாலும், விஜய் அங்கு பெரிதாக பிரச்சாரம் செய்ய மாட்டார் என்று கட்சி வட்டாரங்கள் தெரிவிக்கின்றன.

தவெக நடத்திய சர்வேகளின் கள நிலவரங்களின்படி, சென்னை முதல் விழுப்புரம் வரையிலான வட தமிழக மாவட்டங்களில் கட்சிக்கு பலமான ஆதரவு இருப்பது தெரிய வந்துள்ளது.

குறிப்பாக இளைஞர்கள், முதல்முறை வாக்காளர்கள், நகர்ப்புற மக்கள் மத்தியில் விஜய்யின் வருகை பெரும் எதிர்பார்ப்பை ஏற்படுத்தியுள்ளது. ஆனால் தென் தமிழகம் மற்றும் மத்திய மாவட்டங்களில் ஆதரவு எதிர்பார்த்த அளவுக்கு இல்லை. இதனால்தான் கட்சி தனது பலத்தை 50 தொகுதிகளில் மட்டும் குவிக்க முடிவு செய்துள்ளது.

இதையும் படிங்க: விஜய் தேர்தல் வாக்குறுதி என்ன? தவெக தேர்தல் அறிக்கை!! தென் மாவட்டங்களில் இருந்து ஆட்டம் ஆரம்பம்!!

இந்த 50 தொகுதிகளில் குறைந்தது 25 முதல் 30 இடங்களையாவது வென்று விட வேண்டும் என்பது விஜய்யின் தற்போதைய இலக்கு. தமிழகத்தில் தொங்கு சட்டமன்றம் (Hung Assembly) உருவானால், இந்த 30 இடங்கள் மிகப்பெரிய சக்தியாக மாறும். அப்போது தவெக 'கிங்மேக்கர்' ஆகி, யார் ஆட்சி அமைக்கலாம் என்பதை தீர்மானிக்கும் நிலைக்கு வரும்.

விஜய்யிடம் அந்த அளவு வாக்கு வங்கி இருந்தால், அவர் ஒரு வீட்டோ (Veto Power) அதிகாரத்தை பெற்றவராக மாறுவார். ஒரு கூட்டணியின் வெற்றியை தடுக்கவோ அல்லது ஆதரவு அளித்து ஆட்சி அமைக்கவோ முடியும்.

இந்த திட்டத்தை வெற்றிகரமாக செயல்படுத்த, அந்த 30 தொகுதிகளில் போட்டியிடும் வேட்பாளர்களின் தேர்தல் செலவுகளுக்கு விஜய் தனது சொந்த பணத்தை நேரடியாக செலவிட திட்டமிட்டுள்ளார். மற்ற பெரிய கட்சிகளின் பண பலத்தை ஈடுகட்டவும், எந்த சமரசமும் இன்றி வெற்றியை உறுதி செய்யவும் இந்த முடிவு எடுக்கப்பட்டுள்ளது. சென்னை முதல் விழுப்புரம் வரையிலான வட மாவட்டங்களில் உள்ள செல்வாக்கை முதலீடாக கொண்டு, 2026-ல் பலமான சக்தியாக உருவெடுக்க தவெக தயாராகி வருகிறது.

இந்த "டார்கெட் 50" திட்டம் வெற்றி பெற்றால், தமிழக அரசியலில் பல ஆண்டுகளுக்கு பிறகு தொங்கு சட்டமன்றம் உருவாக வாய்ப்பு உள்ளது. விஜய்யின் இந்த வியூகம் எந்தளவு கைகொடுக்கும் என்பதை பொறுத்திருந்து பார்க்க வேண்டும். தேர்தல் களம் இன்னும் சுவாரஸ்யமடைந்து வருகிறது.
 

இதையும் படிங்க: இப்போவே முட்டிக்குதே! மாமல்லபுரம் சென்ற முதல்வர் கான்வாய்!! நீலாங்கரையில் நிறுத்திவைக்கப்பட்டது விஜய் கார்!