தமிழக சட்டமன்றத் தேர்தலில் தமிழக வெற்றிக் கழகம் (தவெக) தனிப்பெரும் கட்சியாக உருவெடுத்துள்ள நிலையில், எந்தக் கட்சியின் ஓட்டுகளை விஜய் அலை அதிகம் பாதித்தது என்பது குறித்த விவாதம் அரசியல் வட்டாரத்தில் தீவிரமடைந்துள்ளது.

2021 சட்டமன்றத் தேர்தலில் தி.மு.க. 37.30 சதவீதம் (1,74,30,179) ஓட்டுகளுடன் 133 இடங்களில் வெற்றி பெற்றது. அதிமுக 33.29 சதவீதம் (1,53,91,055) ஓட்டுகளுடன் 66 இடங்களில் இரண்டாவது இடத்தைப் பிடித்தது. நாம் தமிழர் கட்சி 6.58 சதவீதம் (30,42,307) ஓட்டுகளைப் பெற்றும் ஒரு இடத்தில் கூட வெற்றி பெறவில்லை.

ஆனால் 2026 தேர்தலில் புதிதாகக் களமிறங்கிய தவெக 34.92 சதவீதம் (1,72,26,209) ஓட்டுகளுடன் 108 இடங்களைக் கைப்பற்றியது. தி.மு.க. 24.19 சதவீதம் (1,19,29,144) ஓட்டுகளாகக் குறைந்தது. அதிமுக 21.21 சதவீதம் (1,04,62,146) ஓட்டுகளாக சரிந்தது. நாம் தமிழர் கட்சி 4 சதவீதம் (19,72,537) ஓட்டுகளுடன் பின்னுக்கு தள்ளப்பட்டது.

இதையும் படிங்க: ஸ்ரீபெரும்புதூர் தொகுதி சென்டிமெண்ட் மீண்டும் வெற்றி!! தவெக விஜய் ஆட்சியில் அமர மிகப்பெரிய உதவி!

ஓட்டு சதவீத அடிப்படையில் பார்க்கையில் தி.மு.க. 13.11 சதவீதமும், அதிமுக 12.08 சதவீதமும், நாம் தமிழர் 2.58 சதவீதமும் இழந்துள்ளன. எண்ணிக்கையில் தி.மு.க. 55 லட்சத்துக்கும் மேற்பட்ட ஓட்டுகளையும், அதிமுக சுமார் 49 லட்சம் ஓட்டுகளையும் இழந்துள்ளது. அதாவது, விஜய் அலை தி.மு.க. மற்றும் அதிமுகவிடம் இருந்து மொத்தம் சுமார் ஒரு கோடியே நான்கு லட்சத்துக்கும் மேற்பட்ட ஓட்டுகளை பெற்றுள்ளது.

ஆச்சரியமான விஷயம் என்னவென்றால், 2021-ல் தி.மு.க. பெற்றதை விட 2 லட்சத்துக்கும் மேற்பட்ட ஓட்டுகள் குறைவாகவே பெற்றும் தவெக தனிப்பெரும் கட்சியாக உருவெடுத்து ஆட்சி அமைக்கும் நிலைக்கு வந்துள்ளது. இது தவெக-வின் ஓட்டு திறன் மற்றும் தொகுதி வாரியாக பெற்ற வெற்றியின் திறமையை பிரதிபலிக்கிறது.

ஒட்டுமொத்தமாக, விஜய் அலை தி.மு.க. மற்றும் அதிமுக ஆகிய இரு முக்கிய கட்சிகளின் ஓட்டு வங்கியையும் சம அளவில் பாதித்துள்ளது. இந்த மாற்றம் தமிழக அரசியலில் புதிய சகாப்தத்தை உருவாக்கியுள்ளது.

இதையும் படிங்க: தவெகவுக்கு நிபந்தனையற்ற ஆதரவு!! ராகுல்காந்தி புது திட்டம்! வரிசையில் காத்திருக்கும் கட்சிகள்!