நகராட்சி நிர்வாகம் மற்றும் குடிநீர் வழங்கல் துறையில் டெண்டர் எடுப்பதில் மட்டும் ரூ.1,020 கோடி ஊழலைக் கண்டறிந்துள்ளதாக தமிழக பொறுப்பு டி.ஜி.பி.க்கு கடிதம் எழுதியுள்ளதாக செய்திகள் வருகிறது என அதிமுக பொதுச் செயலாளர் எடப்பாடி பழனிச்சாமி தெரிவித்துள்ளார். ஸ்டாலின் மாடல் திமுக அரசின் அமைச்சர் கே. என். நேரு தனது உறவினர்கள் வாயிலாக டெண்டருக்கு 7.5% முதல் 10% வரை கமிஷன் கொள்ளை அடித்துள்ளது, இக்கடிதம் வாயிலாக வெளிவந்துள்ளது என்று குறிப்பிட்டு உள்ளார்.
கழிப்பறை கட்டுவது முதல், நபார்ட் வங்கி திட்டங்கள் வரை பட்டியல் போட்டு, 20%- 25% வரை பல்வேறு நிலைகளில் இந்த மெகா ஊழல் நடைபெற்றுள்ளதாகவும், மேலும், இதெல்லாம் "Tip of the Iceberg" தான் என தெரிவித்துள்ள அமலாக்கத் துறை இதனை முழுமையாக விசாரிக்குமாறு தெரிவித்துள்ளது என்றும் கூறினார்.
வரலாறு நெடுக விஞ்ஞான ஊழல்களுக்கே பெயர்போன கட்சியான திமுக நடத்தும் ஸ்டாலின் மாடல் ஆட்சி என்பதே, வெறும் கமிஷன்- கலெக்ஷன்- கரப்ஷன் மாடல் தான் என்பதை தான் அடிக்கடி தெரிவித்து வருவதாகவும் குறிப்பிட்ட எடப்பாடி பழனிச்சாமி ஏற்கனவே ED அனுப்பிய ரூ. 888 கோடி Cash For Jobs முறைகேட்டை இன்று வரை விசாரிக்காமல், ஸ்டாலின் அரசு ஊழல் அமைச்சரைக் காப்பாற்றி வருகிறது என்றும் தற்போது, அடுத்த ஊழலும் வெளிவந்துள்ளது எனவும் தெரிவித்தார்.
இதையும் படிங்க: இபிஎஸ் தேர்வு செல்லாது... உடனே அறிவிக்கணும்...! உச்ச நீதிமன்றத்தில் மனுத் தாக்கல்..!
திமுக அமைச்சரவை கொள்ளையடித்த ஊழல் பணத்தையெல்லாம் மீட்டெடுத்தாலே, மதுரை, கோவை மெட்ரோ ரயில் திட்டத்தை மாநில அரசே செயல்படுத்தலாம், ஆண்டுதோறும் மாணவர்களுக்கு லேப்டாப் கொடுத்திருக்கலாம், பொங்கலுக்கு ரேஷன் கார்டுக்கு ரூ.5000 தாரளாமாக வழங்கலாம், அவ்வளவு ஏன், தமிழ்நாட்டிற்கு ஒரு ஆண்டிற்கான பட்ஜெட்டையே தாக்கல் செய்துவிடலாம் என்றும் விமர்சித்தார்.
காலம் மாறுகிறது., காட்சிகள் மாறத் தொடங்கிவிட்டன என்று கூறிய அவர், அதிமுக ஆட்சி அமைந்ததும் திமுக-வின் ஊழல் கறைவேட்டிகள் யாராக இருந்தாலும், கம்பி எண்ணப் போவது உறுதி என்று தெரிவித்தார். உண்மையிலேயே முதல்வர் ஸ்டாலினுக்கு மடியில் கனமில்லை என்றால், வழியில் பயமின்றி இந்த ஊழல்கள் குறித்து நேர்மையான விசாரணை நடத்த உத்தரவிட வேண்டும் என்றும் செய்வாரா எனவும் கேள்வி எழுப்பினார்.
இதையும் படிங்க: ”அமித் ஷாவை கேட்காமல் இபிஎஸ் இதைக்கூட செய்ய மாட்டார்” - அதிமுகவை வச்சி செய்த உதயநிதி ஸ்டாலின்...!