ஐபிஎல் 2026 தொடரின் தொடக்க ஆட்டத்தில், நடப்புச் சாம்பியனான ராயல் சேலஞ்சர்ஸ் பெங்களூரு (RCB) அணி, சன்ரைசர்ஸ் ஹைதராபாத் (SRH) அணியை 6 விக்கெட் வித்தியாசத்தில் வீழ்த்தி தனது சாம்பியன் அந்தஸ்தை நிலைநாட்டியுள்ளது. 202 ரன்கள் என்ற கடினமான இலக்கை நோக்கி ஆடிய பெங்களூரு அணி, இன்னும் 26 பந்துகள் மீதமிருக்கையிலேயே இலக்கை எட்டிப் பிடித்துப் அபார வெற்றி பெற்றது.

பெங்களூரு சின்னசாமி மைதானத்தில் நடைபெற்ற இந்தப் போட்டியில், டாஸ் வென்ற ஆர்சிபி கேப்டன் ரஜத் படிதார் பந்துவீச்சைத் தேர்வு செய்தார்.

முதலில் பேட்டிங் செய்த ஹைதராபாத் அணி, ஒரு கட்டத்தில் 29 ரன்களுக்கு 3 விக்கெட்டுகளை இழந்து தடுமாறியது. இருப்பினும், கேப்டன் இஷான் கிஷன் அதிரடியாக விளையாடி 38 பந்துகளில் 80 ரன்களைக் குவித்தார். இறுதியில் அனிகேட் வர்மாவின் (43 ரன்கள்) அதிரடியால் ஹைதராபாத் 20 ஓவர்களில் 201 ரன்களை எடுத்தது.

இதையும் படிங்க: வரலாற்று சாதனை: ₹16,732 கோடிக்கு விற்பனையானது ஆர்சிபி! ஐபிஎல் வரலாற்றிலேயே விலையுயர்ந்த அணி!

பில் சால்ட் ஆரம்பத்திலேயே வெளியேறினாலும், தேவதூத் படிக்கல் சின்னசாமி மைதானத்தில் சூறாவளியாக மாறினார். வெறும் 21 பந்துகளில் அரைசதம் கடந்த அவர், மொத்தம் 26 பந்துகளில் 61 ரன்களை (7 பவுண்டரி, 4 சிக்ஸர்) விளாசினார்.

ஒருபுறம் படிக்கல் அதிரடி காட்ட, மறுபுறம் நங்கூரமாக நின்ற விராட் கோலி, 38 பந்துகளில் 69 ரன்கள் (5 பவுண்டரி, 5 சிக்ஸர்) எடுத்து அணியின் வெற்றியை உறுதி செய்தார். இறுதியில் ஹர்ஷல் படேல் வீசிய ஓவரில் தொடர்ச்சியான பவுண்டரிகளுடன் கோலி ஆட்டத்தை முடித்து வைத்தார்.

ஆர்சிபி சார்பில் அறிமுக வீரர் ஜேக்கப் டஃபி 3 விக்கெட்டுகளை வீழ்த்தி அசத்தினார். ரொமாரியோ ஷெப்பர்டும் 3 விக்கெட்டுகளைக் கைப்பற்றினார்.

இந்த வெற்றியின் மூலம் பெங்களூரு அணி புள்ளிப் பட்டியலில் முதலிடத்தைப் பிடித்துள்ளது. நாளை (மார்ச் 29) மும்பை வான்கடே மைதானத்தில் நடைபெறவுள்ள போட்டியில் மும்பை இந்தியன்ஸ் மற்றும் கொல்கத்தா நைட் ரைடர்ஸ் அணிகள் மோதவுள்ளன.

இதையும் படிங்க: வான்கடே மைதானத்தில் தோனி - ரோஹித் சந்திப்பு! டி-20 உலகக்கோப்பை அரையிறுதியில் நெகிழ்ச்சி!