மேற்கு வங்க சட்டமன்றத் தேர்தலின் இரண்டாம் மற்றும் இறுதிக்கட்ட வாக்குப்பதிவு இன்று மாலை 6 மணியுடன் நிறைவடைந்தது. மாலை 5 மணி நிலவரப்படி சுமார் 89.99% (சுமார் 90 சதவீதம்) வாக்குகள் பதிவாகியுள்ளதாகத் தேர்தல் ஆணையம் தெரிவித்துள்ளது. 

திரிணாமுல் காங்கிரஸின் கோட்டையாகக் கருதப்படும் தெற்கு வங்காளத்தின் 142 தொகுதிகளில் நடைபெற்ற இந்தத் தேர்தல், 2026-ஆம் ஆண்டின் அதிகாரப் போட்டியைத் தீர்மானிக்கும் முக்கியக் காரணியாகப் பார்க்கப்படுகிறது.

இரண்டாம் கட்டத் தேர்தலில் மாவட்ட வாரியாகப் பதிவான வாக்குகளின் விபரங்களாவது, 

புர்பா பர்தமான்: 92.46% (மாநிலத்திலேயே மிக அதிகம்)

ஹூக்ளி: 90.34%

நதியா: 90.28%

தெற்கு 24 பர்கானாஸ்: 89.74%

கொல்கத்தா தெற்கு: 86.11% (குறைந்தபட்சம்)

முதலமைச்சர் மம்தா பானர்ஜி மற்றும் பாஜகவின் சுவேந்து அதிகாரி ஆகியோர் நேருக்கு நேர் மோதும் பவானிபூர் தொகுதியில் இன்று காலை முதலே பதற்றம் நிலவியது. இருவரும் ஒரே வாக்குச்சாவடி பகுதிக்கு நேரில் வந்தபோது தொண்டர்களிடையே தள்ளுமுள்ளு ஏற்பட்டது. "மத்தியப் படைகளை வைத்து பாஜக முறைகேடு செய்யப் பார்க்கிறது" என மம்தா குற்றம் சாட்டினார். இதற்குப் பதிலடி கொடுத்த சுவேந்து அதிகாரி, "இந்துக்கள் அனைவரும் பாஜக பக்கம் உள்ளனர்; மம்தாவின் தோல்வி உறுதி" என முழங்கினார். இத்தொகுதியில் சுமார் 85.5% வாக்குகள் பதிவாகியுள்ளன.

இதையும் படிங்க: EVM மிஷினில் டேப்..!! இது செல்லாது.. மீண்டும் வாக்குப்பதிவு நடத்த கோரும் பாஜக..!! மேற்கு வங்கத்தில் பரபரப்பு..!!

இரண்டு கட்டங்களாக நடைபெற்ற இந்தத் தேர்தலில், முதற்கட்டமாக 152 தொகுதிகளுக்கும், இரண்டாம் கட்டமாக 142 தொகுதிகளுக்கும் வாக்குப்பதிவு முடிந்துள்ளது. ஆங்காங்கே சிறிய அளவிலான வன்முறைச் சம்பவங்கள் மற்றும் ஈவிஎம் (EVM) கோளாறு புகார்கள் எழுந்தாலும், ஒட்டுமொத்தமாகப் பெரிய அசம்பாவிதங்கள் இன்றி தேர்தல் நிறைவடைந்தது. மேற்கு வங்கம் மட்டுமல்லாது தமிழ்நாடு, கேரளா, அசாம் மற்றும் புதுச்சேரி ஆகிய மாநிலங்களின் தேர்தல் முடிவுகளும் வரும் மே 4-ஆம் தேதி வெளியாகவுள்ளன. அன்று மதியத்திற்குள் மேற்கு வங்கத்தின் அடுத்த முதலமைச்சர் யார் என்பது தெரிந்துவிடும்.

இதையும் படிங்க: மேற்கு வங்கம் சட்டசபைத் தேர்தல்: உற்சாகமான முதல் கட்ட வாக்குப்பதிவுக்கு பிறகு நாளை இறுதிக் கட்டம்..!!