பசும்பொன் முத்துராமலிங்கத் தேவரின் 119-வது ஜெயந்தி மற்றும் 64-வது குருபூஜை விழா இன்று (அக்டோபர் 30) ராமநாதபுரம் மாவட்டம் பசும்பொன்னில் நடைபெறுகிறது. இதையொட்டி கடந்த 28-ம் தேதி ஆன்மிக நிகழ்ச்சிகளுடன் விழா தொடங்கியது. சிறப்பு யாகசாலை பூஜைகள், அபிஷேகம், தீபாராதனை உள்ளிட்ட நிகழ்ச்சிகள் நடைபெற்ற நிலையில், இன்று அரசு விழா மற்றும் அரசியல் தலைவர்கள் மரியாதை செலுத்தும் நிகழ்ச்சிகள் நடைபெறுகின்றன.

விழாவையொட்டி பசும்பொன் தேவர் நினைவிடத்தில் பொதுமக்கள், அரசியல் கட்சியினர் மற்றும் முக்கியப் பிரமுகர்கள் எளிதாக வந்து மரியாதை செலுத்தும் வகையில் விரிவான ஏற்பாடுகள் செய்யப்பட்டுள்ளன. ஆண்கள், பெண்களுக்கு தனித்தனி வரிசைகள் அமைக்கப்பட்டுள்ளதுடன், முக்கியப் பிரமுகர்கள் வந்து செல்வதற்கும் தனிப்பாதை ஏற்படுத்தப்பட்டுள்ளது. மேலும், போக்குவரத்து நெரிசலைக் குறைக்கும் வகையில் ரூ.2.17 கோடி மதிப்பில் புதிய சாலை அமைக்கும் பணிகளும் மேற்கொள்ளப்பட்டுள்ளன. குடியரசுத் துணைத் தலைவர் வருகையையொட்டி ஹெலிகாப்டர் இறங்குதளமும் தயார் செய்யப்பட்டுள்ளது.

இந்த ஆண்டு தேவர் ஜெயந்தி விழாவில் குடியரசுத் துணைத் தலைவர் சி.பி. ராதாகிருஷ்ணன் பங்கேற்று பசும்பொன் முத்துராமலிங்கத் தேவர் நினைவிடத்தில் மலர் தூவி மரியாதை செலுத்துகிறார். இதற்கான அதிகாரப்பூர்வ அறிவிப்பை குடியரசுத் தலைவர் செயலகம் வெளியிட்டுள்ளது.

இதையும் படிங்க: பசும்பொன் முத்துராமலிங்க தேவர் குருபூஜைக்கு செல்லாத விஜய்? பழனிசாமிக்கும் நெருக்கடி! உளவுத்துறை எச்சரிக்கை!

மேலும், திமுக தலைவரும் முன்னாள் முதலமைச்சருமான மு.க. ஸ்டாலின், அதிமுக பொதுச்செயலாளர் எடப்பாடி பழனிசாமி, அமமுக பொதுச்செயலாளர் டிடிவி தினகரன், நாம் தமிழர் கட்சியின் தலைமை ஒருங்கிணைப்பாளர் சீமான், மதிமுக பொதுச்செயலாளர் வைகோ உள்ளிட்ட முக்கிய அரசியல் தலைவர்களும் தேவர் நினைவிடத்தில் மரியாதை செலுத்த உள்ளதாக அறிவிக்கப்பட்டுள்ளது. 

பசும்பொன்னில் உள்ள தேவர் நினைவிடத்திற்கு செல்வதற்கு முன்பாக, மதுரை கோரிப்பாளையத்தில் உள்ள தேவர் சிலைக்கும் பல்வேறு அரசியல் கட்சித் தலைவர்கள் மாலை அணிவித்து மரியாதை செலுத்துவது வழக்கம். அந்த வகையில் இன்று தவெக அமைச்சர் நிர்மல் குமார் முதல் ஆளாக தேவர் சிலைக்கு மாலை அணிவித்து மரியாதை செலுத்தினார். 

இந்த ஆண்டு தேவர் ஜெயந்தி விழாவில் முதலமைச்சர் விஜய் நேரடியாக பங்கேற்பாரா என்ற எதிர்பார்ப்பு அரசியல் வட்டாரத்தில் அதிகமாக இருந்தது. முதலில் விஜய் பசும்பொன் வருவதற்கான ஏற்பாடுகள் நடைபெறுவதாக செய்திகள் வெளியான நிலையில், பின்னர் அவர் பங்கேற்க மாட்டார் என்ற தகவல் வெளியானது.

இதுகுறித்து விளக்கமளித்த அமைச்சர் சி.டி.ஆர். நிர்மல்குமார், பசும்பொன்னில் எதிர்பார்க்கப்படும் மக்கள் கூட்டத்தைக் கருத்தில் கொண்டு முதலமைச்சர் விஜய் வருவதற்கு வாய்ப்பில்லை என்றும், அங்கு அமைக்கப்பட்டுள்ள ஹெலிகாப்டர் இறங்குதளம் குடியரசுத் துணைத் தலைவரின் வருகைக்காக ஏற்படுத்தப்பட்டதாகவும் தெரிவித்திருந்தார்.

இதற்கிடையே, முதல்வர் விஜய் பசும்பொன் செல்லாமல் சென்னை நந்தனத்தில் உள்ள முத்துராமலிங்கத் தேவர் சிலைக்கு மரியாதை செலுத்த உள்ளதாகவும் செய்திகள் வெளியாகியுள்ளன. முதல்வர் விஜய் பசும்பொன் செல்லாதது தொடர்பாகப் பல்வேறு அரசியல் விவாதங்கள் எழுந்துள்ளன. குறிப்பாக, தேவர் ஜெயந்திக்கு மட்டும் நேரில் சென்று மரியாதை செலுத்தினால், ஏற்கெனவே இம்மானுவேல் சேகரனாரின் நினைவு நாளில் நேரில் பங்கேற்காதது விமர்சனத்துக்கு உள்ளாகும் என்ற அரசியல் கணக்கீடு இருப்பதாகக் கூறப்படுகிறது.

தவெகவுக்கு பல்வேறு சமூகத்தினரின் ஆதரவு தேவைப்படும் நிலையில், ஒரு சமூகத்தின் விழாவில் பங்கேற்று மற்றொரு சமூகத்தின் நினைவு நாளில் பங்கேற்காமல் இருப்பது எதிர்கால அரசியல் மற்றும் தேர்தல் கணக்கீடுகளில் பாதிப்பை ஏற்படுத்தலாம் என்ற கருத்துக்களும் எழுந்துள்ளன. 
 

இதையும் படிங்க: அடுத்த 36 மணி நேரத்தில் ஆட்டம் ஆரம்பம்... தமிழகத்தை நோக்கி நகரும் காற்றழுத்த தாழ்வு மண்டலம்... எங்கெல்லாம் மழைக்கு வாய்ப்பு?