சென்னை: தமிழகத்தில் ஆவின் பால் விலையை லிட்டருக்கு ரூ.5 உயர்த்த வேண்டும் என்று ஆவின் நிர்வாகம் அரசுக்குப் பரிந்துரை செய்துள்ளது. இந்தப் பரிந்துரைக்கு அரசு ஒப்புதல் அளித்தால், ஆவின் பால் விலை உயர்வதுடன், பாலகங்களை நடத்துவோருக்கும் கூடுதல் வருவாய் கிடைக்கும்.

தமிழகம் முழுவதும் ஆவின் நிறுவனம் மூலம் தினமும் சுமார் 35 லட்சம் லிட்டர் பால் கொள்முதல் செய்யப்படுகிறது. இதில் சென்னையில் மட்டும் நாள்தோறும் 15 லட்சம் லிட்டர் பால் விற்பனையாகிறது. தற்போது ஆரஞ்சு நிற 500 மி.லி. பால் பாக்கெட் ரூ.30-க்கும், பச்சை மற்றும் ஊதா நிறப் பால் பாக்கெட்டுகள் ரூ.24-க்கும், நீல நிறப் பால் பாக்கெட் ரூ.20-க்கும் விற்பனை செய்யப்படுகின்றன.

குறைந்த கமிஷனால் ஆவின் பாலகங்கள் நடத்துவதில் சிக்கல்!

ஆவின் பால் பாக்கெட் ஒன்றை விற்பனை செய்யும் பாலக உரிமையாளர்களுக்கு 75 காசுகள் மட்டுமே கமிஷனாகக் கிடைக்கிறது. இந்த வருவாயைக் கொண்டு கடை வாடகை, மின்சாரக் கட்டணம் உள்ளிட்ட செலவுகளைச் சமாளிப்பது கடினமாக இருப்பதாக பாலக உரிமையாளர்கள் தெரிவிக்கின்றனர்.

இதையும் படிங்க: ஆளுங்கட்சியின் ஐ.டி விங் போல செயல்படும் காவல்துறை!! எதுவுமே கட்டுப்பாட்டில் இல்லை! கனிமொழி காட்டம்!

இதன் காரணமாகப் பல மாவட்டங்களில் புதிதாகத் தொடங்கப்படும் ஆவின் பாலகங்கள் சில மாதங்களிலேயே மூடப்படும் நிலை தொடர்கிறது. பாலகங்களை நடத்துவதற்கான செலவுகள் அதிகரித்துள்ள நிலையில், விற்பனை மூலம் கிடைக்கும் கமிஷன் போதுமானதாக இல்லை என்பதும் முக்கியப் பிரச்சினையாக உள்ளது.

தனியார் பாலை விட ஆவின் விலை குறைவு – கடைகளில் தட்டுப்பாடு!

தனியார் பால் நிறுவனங்கள் ஒரு லிட்டர் பாலை ரூ.75-க்கும் அதிகமான விலையில் விற்பனை செய்கின்றன. இதனுடன் ஒப்பிடும்போது ஆவின் பால் குறைந்த விலையில் கிடைப்பதால், ஹோட்டல்கள், தேநீர்க் கடைகள், இனிப்பகங்கள் உள்ளிட்ட வணிக நிறுவனங்கள் அதிக அளவில் ஆவின் பாலை வாங்குகின்றன.

வணிகப் பயன்பாட்டுக்கான தேவை அதிகரிப்பதால், ஆவின் பாலகங்களில் பொதுமக்களுக்குத் தேவையான பால் கிடைக்காமல் தட்டுப்பாடு ஏற்படும் சூழலும் உருவாகிறது. விவசாயிகள், ஆவின் நிர்வாகம் மற்றும் பாலக உரிமையாளர்களின் நலனைக் கருத்தில் கொண்டு விலையை உயர்த்த வேண்டிய அவசியம் ஏற்பட்டுள்ளதாக ஆவின் தரப்பில் தெரிவிக்கப்பட்டுள்ளது.

ரூ.5 விலை உயர்வில் ஆவினுக்கு ரூ.4; பாலகங்களுக்கு ரூ.1!

பால் கொள்முதல் விலையை அரசு ஏற்கெனவே உயர்த்தியுள்ள நிலையில், ஆவின் நிர்வாகத்தின் செலவுகளையும் பாலகங்களின் வருவாயையும் சமநிலைப்படுத்தும் நோக்கில் புதிய விலை உயர்வுக்குப் பரிந்துரை செய்யப்பட்டுள்ளது.

இதன்படி, ஒரு லிட்டர் பாலுக்கு ரூ.5 உயர்வு அமலுக்கு வந்தால், அதில் ரூ.4 ஆவின் நிறுவனத்துக்கும், ரூ.1 பாலக உரிமையாளர்களுக்கும் கிடைக்கும் வகையில் திட்டமிடப்பட்டுள்ளது. அரசின் ஒப்புதல் கிடைத்த பிறகே இந்த விலை மாற்றம் நடைமுறைக்கு வரும்.

கர்நாடகாவில் ரூ.8 உயர்வு – தமிழகத்திலும் பால் விலை அதிகரிக்குமா?

அண்மையில் கர்நாடகாவில் பால் விலை லிட்டருக்கு ரூ.8 வரை உயர்த்தப்பட்டுள்ளது. இதனுடன் ஒப்பிடும்போது தமிழகத்தில் ரூ.5 மட்டுமே உயர்த்தப் பரிந்துரை செய்யப்பட்டுள்ளதாக ஆவின் வட்டாரங்கள் தெரிவிக்கின்றன.

அரசு இந்தப் பரிந்துரைக்கு ஒப்புதல் அளிக்குமா, ஆவின் பால் விலை எப்போது மாறும் என்ற எதிர்பார்ப்பு நுகர்வோர் மத்தியில் எழுந்துள்ளது.

இதையும் படிங்க: "BLACK TICKET"..! பழக்க தோஷத்துல வித்துடாதீங்க..! ஆவின் பொருட்கள் விலை உயர்வு.. EPS விளாசல் .!!