தமிழக அரசியலில் மீண்டும் ஒரு சட்டப் போர் வெடித்துள்ளது. பொதுப்பணித்துறை மற்றும் விளையாட்டு மேம்பாட்டுத் துறை அமைச்சர் ஆதவ் அர்ஜுனா, திமுக தலைவர் மு.க. ஸ்டாலினுக்கு எதிராக சென்னை உயர் நீதிமன்றத்தில் மான நஷ்ட ஈடு வழக்கு தொடர்ந்தார். இந்த வழக்கின் பின்னணியில் ஜூன் 8 ஆம் தேதி திமுக தகவல் தொழில்நுட்பப் பிரிவின் அதிகாரப்பூர்வ சமூக வலைதளப் பக்கத்தில் வெளியான ஒரு பதிவு உள்ளது.

அந்தப் பதிவில் ரூபாய் 258 கோடி மதிப்பிலான போதைப்பொருள் கடத்தல் வழக்கில் முக்கிய குற்றவாளியாகக் குறிப்பிடப்பட்ட ஜான் பிரிட்டோ என்பவர் அமைச்சர் ஆதவ் அர்ஜுனாவின் நெருங்கிய உறவினர் என்று கூறப்பட்டிருந்தது. இந்தக் குற்றச்சாட்டு தனது நற்பெயருக்கு கடும் களங்கம் ஏற்படுத்தியதாகவும், மன உளைச்சலை உண்டாக்கியதாகவும் கூறி அமைச்சர் ஒரு கோடி ரூபாய் இழப்பீடு கோரி நீதிமன்றத்தை அணுகினார்.

மேலும் அந்தப் பதிவை நீக்கவும், நிபந்தனையற்ற மன்னிப்பு கேட்கவும், இனிமேல் இதுபோன்ற அவதூறுகளை வெளியிடாமல் இருக்க நிரந்தரத் தடை விதிக்கவும் அவர் கோரியிருந்தார்.இந்த வழக்கில் திமுக தலைவர் ஸ்டாலின் தரப்பில் பதில் மனு தாக்கல் செய்யப்பட்டுள்ளது. அந்தப் பதில் மனுவில் ஆதவ் அர்ஜுனாவின் கை சுத்தமில்லை என்றும், சுத்தமான கரங்களுடன் நீதிமன்றத்தை அணுகாததால் எந்தவித நிவாரணத்தையும் கோர அவருக்கு உரிமை இல்லை என்றும் தெளிவாகக் குறிப்பிடப்பட்டுள்ளது.

இதையும் படிங்க: சேவல் சண்டைக்கு தடை இல்லை..! முறைப்படுத்தும் சுற்றறிக்கை... உயர்நீதிமன்றத்தில் டிஜிபி விளக்கம்.!!

உள்நோக்கத்துடன் பதிவுகளை வெளியிட்டதாக ஆதவ் அர்ஜுனா கூறும் குற்றச்சாட்டுகளுக்கு எந்த அடிப்படை ஆதாரமும் இல்லை என ஸ்டாலின் தரப்பு வலியுறுத்தியுள்ளது. மேலும் ஆதவ் அர்ஜுனா மற்றும் அவரது குடும்பத்தினருக்கு எதிராக ஏற்கனவே பல்வேறு வழக்குகள் நிலுவையில் உள்ளன. அநத வழக்குகளை மறைத்து இந்த மான நஷ்ட ஈடு வழக்கை தொடர்ந்திருப்பதாகவும் குற்றம் சாட்டப்பட்டுள்ளது. எனவே இந்த வழக்கை தள்ளுபடி செய்ய வேண்டும் என்று ஸ்டாலின் தரப்பு நீதிமன்றத்தில் வலியுறுத்தியுள்ளது.

இதையும் படிங்க: ஆக்கிரமிப்புகளை அனுமதிப்பதா.? அறநிலையத்துறைக்கு நீதிமன்றம் கண்டனம்.!!