தமிழக சட்டமன்றத்தில் அதிமுக சார்பில் தேர்ந்தெடுக்கப்பட்ட ஆறு உறுப்பினர்களின் ராஜினாமாவை சபாநாயகர் ஏற்றுக்கொண்ட உத்தரவை எதிர்த்து தொடரப்பட்ட வழக்கில் சென்னை உயர்நீதிமன்றம் முக்கிய தீர்ப்பை வழங்கியுள்ளது. இந்த வழக்கை தலைமை நீதிபதி அமர்வு விசாரித்து, சபாநாயகரின் முடிவை சட்டப்படி செல்லத்தக்கதாக அறிவித்துள்ளது. அதே நேரத்தில், அவர்களுக்கு எதிரான தகுதி நீக்க நடவடிக்கைகளை இரண்டு மாதங்களுக்குள் முடிக்க வேண்டும் என்றும் உத்தரவிட்டுள்ளது.2026 ஆம் ஆண்டு நடைபெற்ற தமிழக சட்டப்பேரவைத் தேர்தலில் அதிமுக சார்பில் போட்டியிட்டு வெற்றி பெற்ற மரகதம் குமரவேல், சத்தியபாமா, இசக்கி சுப்பையா, ஜெயக்குமார், எம்.ஆர். விஜயபாஸ்கர், சி. விஜயபாஸ்கர் ஆகியோர் அடங்கிய ஆறு பேர், பின்னர் தங்கள் பதவிகளை ராஜினாமா செய்தனர்.

நம்பிக்கை வாக்கெடுப்பின்போது கட்சி கொறடா உத்தரவை மீறி தமிழக வெற்றிக் கழக அரசுக்கு ஆதரவாக வாக்களித்ததையடுத்து, அவர்களுக்கு எதிராக தகுதி நீக்க நடவடிக்கை தொடங்கப்பட்டது. இந்த நிலையில் அவர்கள் ராஜினாமா கடிதங்களை சபாநாயகரிடம் அளித்தனர். சபாநாயகர் அவற்றை ஏற்றுக்கொண்டு அறிவித்தார். இதனால் தொகுதிகள் காலியாகி இடைத்தேர்தல் அறிவிக்கப்பட்டது.இந்த முடிவை எதிர்த்து அதிமுக கொறடா அக்ரி கிருஷ்ணமூர்த்தி சென்னை உயர்நீதிமன்றத்தில் வழக்கு தொடர்ந்தார். தகுதி நீக்க நடவடிக்கை நிலுவையில் இருக்கும்போது ராஜினாமாவை அவசரமாக ஏற்றுக்கொண்டதில் உள்நோக்கம் உள்ளதாகவும், சரியான விசாரணை இல்லாமல் ஏற்றுக்கொள்ளப்பட்டதாகவும் வாதிடப்பட்டது. கட்சித் தலைமையின் ஒப்புதல் இல்லாமல் முடிவு எடுக்கப்பட்டதாகவும் கூறப்பட்டது. ராஜினாமாவை ரத்து செய்யக் கோரி மனு தாக்கல் செய்யப்பட்டது.

வழக்கில் சபாநாயகர் தரப்பில், உறுப்பினர்கள் தானாகவே ராஜினாமா செய்ததாகவும், அதன் உண்மைத்தன்மையை உறுதிப்படுத்திய பின்னரே ஏற்றுக்கொள்ளப்பட்டதாகவும் விளக்கம் அளிக்கப்பட்டது. ஒவ்வொரு உறுப்பினரையும் தனித்தனியாக விசாரித்து, அவர்கள் சுயவிருப்பத்துடன் செயல்பட்டதை உறுதிசெய்ததாகத் தெரிவிக்கப்பட்டது. ஒரு உறுப்பினர் பதவியை விட்டு விலக விரும்பினால் அவரை வலுக்கட்டாயமாகத் தடுத்து நிறுத்த முடியாது என்றும் வாதிடப்பட்டது. ராஜினாமா மற்றும் தகுதி நீக்கம் ஆகியவை தனித்தனியான விஷயங்கள் என்றும், ராஜினாமாவை ஏற்றுக்கொண்டதால் தகுதி நீக்க நடவடிக்கை முடிவுக்கு வராது என்றும் கூறப்பட்டது.

இதையும் படிங்க: அதிமுகவில் ஓரணியில் திரளும் அதிருப்தி ’தலைகள்’... 13 தோல்வி பழனிசாமிக்கு எதிராக ’மூவர் அணி’ அதிரடி மூவ்...!

நீதிமன்றம் இரு தரப்பு வாதங்களையும் கேட்ட பிறகு, ஆறு பேரின் ராஜினாமாவும் உண்மையானது என்றும், சபாநாயகர் விரிவான விசாரணை நடத்த வேண்டிய அவசியம் இல்லை என்றும் தெரிவித்துள்ளது. அரசியலமைப்புச் சட்டத்தின்படி, ராஜினாமாவின் உண்மைத்தன்மையை மட்டும் உறுதிசெய்தால் போதுமானது என்றும், அதன் பின்னணியில் உள்ள நோக்கத்தை ஆராய வேண்டியதில்லை என்றும் கூறப்பட்டுள்ளது. எனவே சபாநாயகரின் உத்தரவு சட்டப்படி செல்லும் என்று நீதிமன்றம் அறிவித்துள்ளது. அதிமுக கொறடா தொடர்ந்த வழக்கு இதனால் தள்ளுபடி செய்யப்பட்டுள்ளது.அதே நேரத்தில், ஆறு பேருக்கு எதிரான தகுதி நீக்க நடவடிக்கை தொடர்ந்து நடைபெறும் என்றும், அதை இரண்டு மாதங்களுக்குள் முடித்து முடிவெடுக்க வேண்டும் என்றும் சபாநாயகருக்கு உத்தரவிடப்பட்டுள்ளது. 

இதையும் படிங்க: அதிமுக 55 ஆம் ஆண்டு தொடக்க நாள்..! தமிழகம் முழுவதும் பொதுக்கூட்டம்... இபிஎஸ் அறிவிப்பு..!!