வரும் 2026 தமிழக சட்டமன்றத் தேர்தலுக்கான தொகுதிப் பங்கீட்டுப் பணிகளில் அதிமுக தலைமையிலான கூட்டணி விறுவிறுப்பாக ஈடுபட்டு வரும் நிலையில், தமிழ் மாநில காங்கிரஸ் (தமாகா) கட்சிக்கு 5 தொகுதிகள் ஒதுக்கீடு செய்யப்பட்டுள்ளன. இது தொடர்பாக அதிமுக பொதுச்செயலாளர் எடப்பாடி பழனிசாமி மற்றும் தமாகா தலைவர் ஜி.கே.வாசன் இடையே இன்று அதிகாரப்பூர்வ ஒப்பந்தம் கையெழுத்தானது.
இந்த 5 தொகுதிகளிலும் தமாகா வேட்பாளர்கள் 'தாமரை' சின்னத்திலேயே போட்டியிடுவார்கள் என்று அக்கட்சியின் தலைவர் ஜி.கே.வாசன் அறிவித்துள்ளார். தேசிய ஜனநாயக கூட்டணியின் (NDA) அங்கமாகத் தமாகா நீடிப்பதால், ஒருமித்த கருத்தின் அடிப்படையில் இந்த முடிவு எடுக்கப்பட்டுள்ளதாக அவர் குறிப்பிட்டுள்ளார்.
தமாகா போட்டியிடும் 5 தொகுதிகள்: ஒட்டஞ்சத்திரம், ராணிப்பேட்டை, கிள்ளியூர், ஈரோடு மேற்கு, கும்பகோணம்
ஏற்கனவே அதிமுக கூட்டணியில் பாஜக (27 இடங்கள்), பாமக (18 இடங்கள்) மற்றும் அமமுக (11 இடங்கள்) ஆகிய கட்சிகளுக்குத் தொகுதிகள் ஒதுக்கப்பட்டுள்ள நிலையில், தற்போது தமாகாவுக்கான இடங்களும் உறுதி செய்யப்பட்டுள்ளன. "தமிழகத்தில் ஒரு மாற்றத்தை ஏற்படுத்தவும், திமுக அரசை வீழ்த்தவும் இந்த வெற்றிக் கூட்டணி ஒருங்கிணைந்து செயல்படும்" என்று ஜி.கே.வாசன் செய்தியாளர்களிடம் தெரிவித்தார்.
இதையும் படிங்க: "திமுகவின் மக்கள் விரோத போக்கே எங்கள் வெற்றிக்கு வழி" - ஜி.கே.வாசன் அதிரடி பேட்டி!
தனது கட்சியின் பலம் வாய்ந்த மற்றும் வெற்றி வாய்ப்புள்ள தொகுதிகளைத் தேர்ந்தெடுத்துள்ள தமாகா, வேட்பாளர் பட்டியலை விரைவில் வெளியிடும் என எதிர்பார்க்கப்படுகிறது. அதிமுக கூட்டணியின் இந்த அடுத்தடுத்த நகர்வுகள் தமிழக தேர்தல் களத்தில் அனலைப் பறக்க விட்டுள்ளன.
இதையும் படிங்க: விவசாயிகளுக்கான மத்திய நிதியை திருப்பி அனுப்பியது திமுக! ஜி.கே.வாசன் பரபரப்பு புகார்!