அண்ணாமலை தனிக்கட்சி தொடங்குகிறார் என்றெல்லாம் திமுகவினர் விஷம பிரச்சாரம் செய்து வருகின்றனர் தமிழக பாஜக துணை தலைவர் கே.பி. ராமலிங்கம்  சாடினார்.

தருமபுரியில் கே.பி.ராமலிங்கம் செய்தியாளர்களைச் சந்தித்தார். அப்போது அவர் கூறுகையில், "அமலாக்கத் துறை தமிழகத்தின் டாஸ்மாக் ஊழல் குறித்து விசாரணை நடத்தி வருகிறது. இந்த விவகாரத்தில் பலரும் விரைவில் சிக்குவார்கள்.  ஓரிரு மாதங்களில் தமிழகத்தில் ஆளும்கட்சியினர் செய்துள்ள முறைகேடுகள் ஒவ்வொன்றாக வெளியே வரும். டெல்லியில் ஊழல் வழக்கில் முதல்வர் கைதாகி, ஜாமீனில் வெளியே வந்து தேர்தல் பிரச்சாரத்தில் ஈடுபட்டது போல தமிழகத்திலும் நடக்கும்.

வரவிருக்கும் தமிழக சட்டப்பேரவை தேர்தலில்  எடப்பாடி பழனிசாமி தலைமையில் அதிமுகவுடன் பாஜக கூட்டணி அமைத்துள்ளது. தமிழகத்திலிருந்து தீய சக்தியான திமுக ஆட்சியை அகற்றும் ஒற்றை புள்ளியை செயல்திட்டமாக இலக்கை கொண்டு பயணிக்கிறோம். அதிமுக - பாஜக கூட்டணியில் யாருக்கு எதை தர வேண்டும் என்பதையெல்லாம், கூட்டணியின் தலைமை பொறுப்பை ஏற்றுள்ள அதிமுக முடிவு செய்யும்.
பாஜக முன்னாள் மாநில தலைவர் அண்ணாமலை மென்மேலும் பல பொறுப்புகளுக்கு செல்ல இருக்கிறார். திமுகவை வீழ்த்த வேண்டும் என்று அவர் உழைக்கிறார்.

இதற்கிடையில், அவர் தனிக்கட்சி தொடங்குகிறார் என்றெல்லாம் சிலர் விஷம பிரச்சாரம் செய்து வருகின்றனர். அதிமுக-பாஜக கூட்டணியை சகித்துக் கொள்ள முடியாத திமுகவினர் செய்துவரும் பிரச்சாரம்தான் இது. அமைச்சர் பொன்முடியின் படத்தை பெண்கள் செருப்பால் அடித்தது தவறு.
ஏனெனில் உயிரில்லாத படத்தை செருப்பால் அடிப்பதால் பயன் ஒன்றும் இல்லை. தமிழகத்தில் பெண்கள் பொன்முடி மீது கோபத்தில் இருக்கிறார்கள்.

இதையும் படிங்க: 2026 தேர்தலில் டெபாசிட் கூட கிடைக்காது.. டெல்லி எஜமானர்களிடம் சொல்லிடுங்க.. நயினாரை நயப்புடைத்த ஆர்.எஸ். பாரதி!!

தமிழகத்தில் ஸ்டாலின் தலைமையில் இயங்கும் அமைச்சரவையே அந்த நிலையில்தான் உள்ளது. பொன்முடிக்கு கிடைத்து வரும் பெருமை அனைத்தும் முதல்வர் ஸ்டாலினையும் சேரும். பொன்முடியை மட்டும் அமைச்சரவையில் இருந்து வெளியேற்றக் கூடாது. 2026 தேர்தலில் தமிழகத்தின் ஒட்டுமொத்த அமைச்சரவையையும் தூக்கி எறிய வேண்டும். இதற்கான பாடத்தை தேர்தலில் பெண்கள் புகட்டுவார்கள்" என்று கே.பி. ராமலிங்கம் கூறினார்.

இதையும் படிங்க: திமுக வாக்குகள் பிரிப்பு.. பாஜக கூட்டணிக்கு நல்லது செய்யும் விஜய்.. பாஜக நிர்வாகி தாறுமாறு!!