தொடர்ந்து உயர்ந்து வரும் டீசல் விலை உயர்வுக்கு ஏற்ப தமிழ்நாட்டில் தனியார் பேருந்து கட்டணங்களை உடனடியாக உயர்த்தி நிர்ணயம் செய்ய அரசுக்கு உத்தரவிடக் கோரிய வழக்கில், உயர்நிலைக் குழுவின் கூட்டத்தில் எடுக்கப்பட்ட முடிவுகள் மற்றும் நடவடிக்கைகள் குறித்து நான்கு வாரங்களுக்குள் விரிவான அறிக்கை தாக்கல் செய்ய வேண்டும் எனத் தமிழக அரசுக்குச் சென்னை உயர்நீதிமன்றம் உத்தரவிட்டுள்ளது.

தமிழ்நாட்டில் கடந்த பல ஆண்டுகளாகப் பேருந்து கட்டணங்கள் மாற்றியமைக்கப்படாத நிலையில், டீசல் விலை உயர்வு, உதிரிபாகங்களின் விலை ஏற்றம் மற்றும் பராமரிப்புச் செலவுகள் பன்மடங்கு அதிகரித்துள்ளதால் தங்களால் பேருந்துகளை இயக்க முடியாத சூழல் ஏற்பட்டுள்ளதாகத் தனியார் பேருந்து உரிமையாளர்கள் சங்கங்களின் கூட்டமைப்பு சார்பில் சென்னை உயர்நீதிமன்றத்தில் வழக்குத் தொடரப்பட்டது. டீசல் விலை உயர்வை ஈடுசெய்யும் வகையில் பேருந்து கட்டணங்களை உடனடியாக உயர்த்தி அறிவிக்கத் தமிழக அரசுக்குப் போதிய உத்தரவுகளைப் பிறப்பிக்க வேண்டும் என்று அந்த மனுவில் அவர்கள் கோரியிருந்தனர்.

இதையும் படிங்க: நவோதயா பள்ளிகளுக்கு 3 மாதங்களில் இடம் தேர்வு செய்க! தமிழக அரசுக்கு உச்சநீதிமன்றம் கெடு!

இந்த மனு மீதான விசாரணை இன்று சென்னை உயர்நீதிமன்ற நீதிபதி ஹேமந்த் சந்தன் கவுடர் முன்னிலையில் விசாரணைக்கு வந்தது. அப்போது தமிழக அரசு சார்பில் ஆஜரான வழக்கறிஞர், பேருந்து கட்டண உயர்வு தொடர்பாக ஏற்கனவே அமைக்கப்பட்ட உயர்நிலைக் குழுவின் ஆலோசனைக் கூட்டத்தில் விரிவான விவாதங்கள் மேற்கொள்ளப்பட்டு, அதனடிப்படையில் தயார் செய்யப்பட்ட ஆய்வறிக்கை மற்றும் பரிந்துரைகள் அனைத்தும் முடிவெடுப்பதற்காகப் போக்குவரத்துத் துறை அமைச்சருக்கு அனுப்பி வைக்கப்பட்டுள்ளதாக நீதிமன்றத்தில் தெரிவித்தார்.

அரசு தரப்பு வாதத்தைப் பதிவு செய்துகொண்ட நீதிபதி, உயர்நிலைக் குழுவின் ஆலோசனைக் கூட்டத்தில் எடுக்கப்பட்ட நடவடிக்கைகள் என்னென்ன என்பது குறித்து முழுமையான விவரங்களுடன் நான்கு வாரங்களுக்குள் அறிக்கை தாக்கல் செய்ய வேண்டும் எனத் தமிழக அரசுக்கு உத்தரவிட்டார். மேலும், வழக்கின் அடுத்தகட்ட விசாரணையை வரும் அக்டோபர் 26-ஆம் தேதிக்குத் தள்ளிவைத்து நீதிபதி ஹேமந்த் சந்தன் கவுடர் உத்தரவு பிறப்பித்துள்ளார்.

இதையும் படிங்க: டாஸ்மாக் கடைகளில் காலி பாட்டில்களை திரும்ப பெற நவீன இயந்திரங்கள்! உயர்நீதிமன்றத்தில் தமிழக அரசு தகவல்!