சிங்கப்பூரிலிருந்து சென்னை சர்வதேச விமான நிலையத்திற்கு விமானம் மூலம் கடத்தி வரப்பட்ட சுமார் ₹2.10 கோடி மதிப்பிலான 1.65 கிலோ 24 கேரட் தங்கப் பசையைச் சென்னை விமான நிலைய சுங்கத்துறை ஏர் இன்டெலிஜென்ஸ் அதிகாரிகள் பறிமுதல் செய்தனர். இது தொடர்பாகச் சென்னையைச் சேர்ந்த இரண்டு கடத்தல் பயணிகளைக் கைது செய்து தீவிர விசாரணை மேற்கொண்டு வருகின்றனர்.

சிங்கப்பூரிலிருந்து சென்னைக்குத் தனியார் பயணிகள் விமானத்தில் பெருமளவில் தங்கம் கடத்தி வரப்படுவதாகச் சென்னை விமான நிலைய சுங்கத்துறைக்கு ரகசியத் தகவல் கிடைத்தது. இதையடுத்து, சுங்கத்துறையின் ஏர் இன்டெலிஜென்ஸ் பிரிவு அதிகாரிகள் நேற்று நள்ளிரவில் சென்னை சர்வதேச முனையத்தில் தீவிரக் கண்காணிப்புப் பணியில் ஈடுபட்டனர். அப்போது சிங்கப்பூரிலிருந்து வந்த விமானத்தில் இறங்கிய பயணிகளை வரிசையாகக் கண்காணித்தபோது, சுற்றுலாப் பயணிகளாகச் சென்றுவிட்டுத் திரும்பிய சென்னையைச் சேர்ந்த 2 ஆண் பயணிகளின் நடவடிக்கையில் சந்தேகம் ஏற்பட்டது.

அவர்களை இடைமறித்து விசாரித்தபோது, இருவரும் முன்னுக்குப் பின் முரணாகப் பேசியதுடன், தங்களிடம் சுங்கத் தீர்வை செலுத்த வேண்டிய பொருட்கள் எதுவும் இல்லை எனக் கூறிவிட்டு கிரீன் சேனல் (Green Channel) வழியாக அவசரமாக வெளியேற முயன்றனர். சந்தேகம் வலுத்ததைத் தொடர்ந்து, அவர்களைத் தடுத்து நிறுத்திய அதிகாரிகள் தனி அறைக்கு அழைத்துச் சென்று உடைமைகளை முழுமையாகச் சோதனையிட்டனர். உடமைகளில் எதுவும் சிக்காத நிலையில், அவர்களை முழு உடல் பரிசோதனைக்கு உட்படுத்தினர்.

இதையும் படிங்க: சென்னை ஏர்போர்ட் தனியார் கைக்கு போகிறதா..? மத்திய அரசின் அடுத்த அதிரடி..!

அப்போது, இரு பயணிகளும் தங்களது ஆசனவாய்ப் பகுதியில் ஓவல் வடிவ கேப்சூல் உருளைகளை மறைத்து வைத்திருந்தது கண்டறியப்பட்டது. உடலுக்குள் இருந்து எடுக்கப்பட்ட 6 கேப்சூல்களைத் திறந்து பார்த்தபோது, அதில் 1.65 கிலோ எடையுள்ள 24 கேரட் சுத்தமான தங்கப் பசை இருப்பது உறுதியானது. இதன் சர்வதேசச் சந்தை மதிப்பு சுமார் ₹2.10 கோடியாகும்.

பறிமுதல் செய்யப்பட்ட தங்கத்தைப் பறிமுதல் செய்த சுங்கத்துறையினர், கடத்தல் பயணிகளான இருவரையும் கைது செய்தனர். அவர்களிடம் நடத்திய முதற்கட்ட விசாரணையில், சர்வதேசத் தங்கக் கடத்தல் கும்பல் இவர்களைக் 'கடத்தல் குருவிகளாக' பயன்படுத்திச் சிங்கப்பூருக்கு அனுப்பி வைத்ததும், அங்கு தங்கப் பசையைப் பெற்றுக்கொண்டு சென்னைக்குக் கடத்தி வந்ததும் அம்பலமானது.

இந்தச் சம்பவத்தின் பின்னணியில் உள்ள முக்கியக் கடத்தல் புள்ளிகள் யார், இவர்கள் ஏற்கனவே இதுபோன்று கடத்தலில் ஈடுபட்டுள்ளனரா என்பது குறித்துப் பல்வேறு கோணங்களில் சுங்கத்துறை அதிகாரிகள் தீவிர விசாரணை நடத்தி வருகின்றனர்.

இதையும் படிங்க: 845 புதிய பணியிடங்கள் நிரப்பப்படும்: ஏடிசி தின விழாவில் மத்திய விமான போக்குவரத்து அமைச்சர் அறிவிப்பு!