தமிழ்நாடு சட்டமன்றத்தில் தவெக, திமுக, அதிமுக எனப் பிரதான கட்சிகளின் உறுப்பினர்கள் பெருமளவில் அமர்ந்திருந்தாலும், முதலாளித்துவ மூலதனக் கொள்ளைக்கு எதிராக ஒருபோதும் வாய் திறப்பதில்லை என்றும், கம்யூனிஸ்ட் கட்சியின் உறுப்பினர்கள் எண்ணிக்கை குறைவாக இருந்தாலும் மக்கள் நலனுக்காக சமரசமின்றிச் செயல்பட்டு வருவதாகவும் இந்திய கம்யூனிஸ்ட் கட்சியின் (சிபிஐ) மாநிலச் செயலாளர் வீரபாண்டியன் மிக ஆவேசமாகக் குற்றம்சாட்டியுள்ளார்.

திருப்பூர் மாவட்டம் தாராபுரம் சட்டமன்றத் தொகுதி இடைத்தேர்தலை முன்னிட்டு, இந்திய கம்யூனிஸ்ட் கட்சியின் வேட்பாளர் லட்சுமணனை ஆதரித்துத் தாராபுரத்தில் தீவிரப் பிரச்சாரம் மேற்கொண்ட மாநிலச் செயலாளர் வீரபாண்டியன் செய்தியாளர்களைச் சந்தித்துப் பேசினார். அப்போது பேசிய அவர், தாராபுரம் தொகுதி இடைத்தேர்தலில் எங்களது வேட்பாளர் லட்சுமணனுக்காக ஏற்கனவே கட்சியின் மூத்த தலைவரும் திருப்பூர் நாடாளுமன்ற உறுப்பினருமான கே.சுப்பராயன் உள்ளிட்ட பல முக்கியத் தலைவர்கள் வீடு வீடாகச் சென்று தீவிரப் பிரச்சாரத்தில் ஈடுபட்டு வருகின்றனர். அதேபோல், மதுராந்தகம் இடைத்தேர்தல் பிரச்சாரக் களத்திலும் கம்யூனிஸ்ட் கட்சிக்கு உழைக்கும் பாட்டாளி மக்கள் மகத்தான ஆதரவைத் தந்து வருகின்றனர். இவ்விரு தொகுதிகளிலும் உழைக்கும் மக்களின் சார்பாகக் களம் காணும் எங்கள் வேட்பாளர்களுக்கு மக்கள் ஒரு வாய்ப்பளிக்க வேண்டும் என்று கேட்டுக்கொண்டார்.

தமிழக சட்டமன்றத்தின் செயல்பாடுகள் குறித்து மிகக் காட்டமாக விமர்சித்த அவர், இன்றைய சட்டமன்றத்தில் தவெக, திமுக, அதிமுக ஆகிய கட்சிகளின் சட்டமன்ற உறுப்பினர்கள் பெரும் எண்ணிக்கையில் அமர்ந்திருக்கிறார்கள். ஆனால், கார்ப்பரேட்டுகளின் மூலதனக் கொள்ளைக்கும் சுரண்டல்களுக்கும் எதிராக அவர்கள் துளியும் குரல் கொடுப்பதில்லை; மாறாக, சட்டமன்றத்தில் எங்கள் கம்யூனிஸ்ட் கட்சியின் உறுப்பினர்கள் நான்கு பேரே இருந்தாலும், மக்களுக்கான பிரச்சனைகளைத் துணிச்சலோடு எடுத்துரைத்து எதிர்த்துப் போராடி வருகிறோம். வெற்றி தோல்வியைத் தாண்டி, தமிழகத்தின் அடித்தட்டு பாட்டாளி மக்களை வர்க்க ரீதியாக ஒன்றுபடுத்தும் அரசியல் தளமாகவே இந்த இடைத்தேர்தலை நாங்கள் பார்க்கிறோம் என்று திட்டவட்டமாகத் தெரிவித்தார்.

இதையும் படிங்க: அரசியல், அதிகாரம், பணம்..! ஜெம் வீரமணி வலைப்பின்னல் என்ன.? சீமான் சரமாரி கேள்வி..!!

மேலும், தனியார்மயக் கொள்கைகள் குறித்து எச்சரித்த அவர், இன்று தமிழகத்தில் கல்வி மற்றும் மருத்துவக் கட்டமைப்புகள் மிக மோசமான சரிவைச் சந்தித்துள்ளன; எங்கு நோக்கினாலும் தனியார்மயத்தின் கோரப்பிடி தாண்டவமாடுகிறது. கல்வி மற்றும் மருத்துவத்தை முழுமையாக அரசுடைமையாக்கி, ஏழை எளிய சாமானிய மக்களுக்கு இலவசமாகவும் தரமாகவும் வழங்க வேண்டும் என்பதே இடதுசாரிகளின் அசைக்க முடியாத கொள்கை நிலைப்பாடு. பாட்டாளி மக்களின் உரிமைகளைச் சட்டமன்றத்தில் ஓங்கி ஒலிக்கச் செய்ய, தாராபுரத்தில் கம்யூனிஸ்ட் கட்சியின் வேட்பாளர் லட்சுமணனுக்கு மக்கள் தங்களின் அமோக ஆதரவை வழங்கி வெற்றி பெறச் செய்ய வேண்டும் என அறைகூவல் விடுத்தார்.

இதையும் படிங்க: மளமளவென பரவும் டெங்கு பாதிப்பு..! பாதுகாப்பு வழிமுறைகளை வெளியிடுக..! EPS வலியுறுத்தல்..!!